Read Konyak Naga HINSHEN 15 Bible Online

HINSHEN 15 - Konyak Naga bible

HINSHEN 15

¹“Wangpeng nyit linpu lep-iye nange pheeisea-a yeyupe tüohlak yang.

²Hatüowa hangke ngaowe tam hükih-e linglak yang. Kahta lili-e yoi pheipu Israel pate pheeisea phayange ngohpu lili shaaji yeyupe tüohlak yang, Iye ngin sea phayangpu shaiyelak jingne yenganglak yang; Youngwanpa I yoiye muh pheeisea lili shaaji yeyulak jingne ponge tamteki.

³Yinpalan-e nangte shümlak ne ngohpu nange yuwe yene ok; hüpoi nangjeihei naolan ütam-e nangte shümlak ne ngohma-a tüolan-a yeyulak yang.

⁴“Youngwanpa nang Kahwange Iye nangte pha ne ngohpu kahmük me moiman yahphalak. Numan yo me ao-o toiha ne menge yengohlak;

⁵nange hi tenyih taowe nangte ngaowe tampu khongkümpu hüyange Youngwanpa nang Kahwange nyüopu jonlak jingne janne jonma-a!

⁶Hangjingne Iye janpu kih-e, aope Youngwanpa nang Kahwange nang moiman tamlakei, nange jatlan maapute ü-sea phalak, hüpoi nange aope-o yuyaipu hei sealeihpu yenanglak; hüyange nange jat maapu tangme wanglam lamlak, hüpoi iman-e nang tangme wanglam yelamlak.

⁷“Numan yo me toihalan ütam, numan jeihei naolan yo me ütam, Youngwanpa nang Kahwang numante phapu chingme ngohma-a, nange nang mongjang wan-e yemahlak yang, yejema-a numan jeiheinao toihalan te nang yak yelanpe yengohlak yang.

⁸Hüpoi nange nang yak Ite lanlak yang, hüyange I wongpong jingne wangman-e yekheihpe seatamlak yang.

⁹Wangpeng nyit shepupa, pheeisea tüohlak wang, owe peinang she nang mongjang me ümeng yeteihlak jingne kenting yah; hüyange nangphei pu toihalan jeiheinao phei ümeng teihyange, Ite nange hango yephape ngohma-a, hüyange nang phei tüi-e Iye Youngwanpate üngwün wante nange ünu omlak.

¹⁰Nange Ite jajang jawe phatüoh, hüyange nange Ite phawante nang mongte yetakpe phatüoh, hangjingne tüopa jingne Youngwanpa nang Kahwange nange hangheyin linglakei khongkümpu me nang moimanlak.

¹¹Hangjingne numan kahmük me toihalan yenangpe aope-o yengohlak; tüopa jingne numan kahmük me numan toihalan, numan jeiheinaolan, hüyange towe ngohpu lante numan yak meimei-e lanlak taowe numante ngaowe tamnang.”

¹²“Nang jeiheinao, Hebrewlan, yejema-a Hebrew sheko ja nangte yaoyange ngohma-a, Iye wangpeng wok nang shaoshanne tamtüoh; hüpoi wangpeng nyit shepupa me nange I nang toishao mepu lantamlak yang.

¹³Hüyange aope nange nang toishao mepu I lantamlakei, nange I yakkeng me yeteilak yang;

¹⁴Youngwanpa nang Kahwange nangte moimanpu phei phinne, Ite nange yekheihpe nang nyee ükhong mepu, tahnoijing mepu Ite phalakyang.

¹⁵Hipak ja me numan-o Egypt kahtok me rha ne menge ngoh yangki, hüyange Youngwanpa nang Kahwange numan lan-e tamyangki she nange teihtüoyah; tüojingne tenyih taowe numante tüopa ngaowe tampu phanang.

¹⁶“Hüpoi rhapawe nangte, taowe nang toi min-ang ngoh she ima-a, hangjingne Iye nang hüyange nenok yetüoh hu, hüyange nang phei meiye toi ling;

¹⁷hüma-a nenok tafün shongte nange I yahwen tüoh hüyange tüoken me I na shunge tamtüoh, hüwante jintepu jingne I nang rha ne menglak. Hüke muh nange rhanyu te-o linglak yang.

¹⁸“Nange nang toishao mepu I lanne tamtüoh, nange hatüowa wannangki she yeteihlak yang; hangjingne Iye nang jingne wangpeng wok nanpa kahta ümee shange Iye toi lingyangki, hüyange nange lingpu khongkümpu me Youngwanpawe nang moimanlak.”

¹⁹“Nangjing mahu hüyange nyeelan ükhong mepu üwangne puhpu khongkümpu Youngwanpa nang Kahwangte phünne phatüoh; üwangne puhpu mahu üpong te hango toi lingne yetamlak yang, yejema-a üwangne puhpu nyee tepu ümin yekhüplak yang.

²⁰Youngwanpawe lepu nyoi me nang hüyange nenok noksawe Youngwanpa nang Kahwang sheshao me wangpeng lep iye tüolan-a hahlak yang.

²¹Hüpoi tüopa me ülam ja tahtüopu hüke yafaipu jeyah, mükmüopu jeyah, yejema-a tahtüopu ümeng ütam ngohma-a, nange hatüo Youngwanpa nang Kahwangte dopu ne tah pha.

²²Hatüo numan-e yoi chingkam mongme yejaopu hüyange jaopu yinmok, hüke meishi yejema-a aolameishi kihpu hahlak yang.

²³Hüpoi numan-e iy hei yehahlak yang; hatüo numan-e yeng kih-e kahtok me shokke winlak wongpong.”