Read Konyak Naga HINSHEN 16 Bible Online

HINSHEN 16 - Konyak Naga bible

HINSHEN 16

¹“Abib leat me Yinyepu mo ngohpu kaiye nange nang Kahwang Youngwanpate yihnoon tüoh; hangjingne tüopa leat tepu yaning ja me Iye nang Egypt mepu yin-e tam.

²Numan-e Yinyepu mo jingne nyee ükhong hüyange mahu ükhong mepu, ümeken me Youngwanpawe I min anglak jingne lelakei, tüoken nyoi me taiye Youngwanpa nang Kahwang jingne toitüoh.

³Aope nange tüopa hahying hahlakei, do nyütpu an nange tüopa phei yehahlak yang. Hangjingne nyih nyit nange tüopa phei do yenyetpu an hahlak yang; tüopate shaoshipu an she nyiklak, hangjingne numan Egypt mepu hüke mam-e ngaine ngaipu me hüke hah she, numan jin küm-e numan-e Egypt kahmük tüohyangpu nyih teihtüolak jingne numan-e hahlak yang.

⁴Nyih nyit numan ngohjing hanghe me-o do ngene yetamlak yang; hüyange mei hanghepa üwangpa nyih ünpong me numan-e toiyange doyapei, napning ngoiye hanghe-o towe ye-angpe khongkümpu hahlak yang.

⁵“Youngwanpa nang Kahwange numante phapu chingnyu hanghe me-o numan-e Yinyepu mo toidopuwa yephalak.

⁶Hüpoi Youngwanpa nang Kahwange ümeken me I min anglak lelakei, tüoken me numan-e Egypt tüohyangpu hipak, ünpong, wanghe nyipwante numan-e Yinyepu mo toidopuwa phalak yang.

⁷Youngwanpa nang Kahwange lepu nyoi me numan-e yange kange hahlak yang; hüyange napning numan nyenok yam-e leihyelak yang.

⁸Nyih wok numan-e do yenyetpu an hahlak yang, hüyange nyit shepupa nyih me Youngwanpa nang Kahwangte yoppe khümlak jingne jempu ja ngohlak; hüwante numan-e toi hango yelinglak yang.”

⁹“Numan-e hatmong nyit ilak yang: numan-e tahyahlak jingne tahkekte yangkuih leye wangpu nyih mepu hatmong nyit itüoh.

¹⁰Tüophei me nang Kahwang Youngwanpate yihnoon ne, Iye nangte moiman phapu phei phinne Ite mongloong dopu yah peiyange Tahyah Mo ngohtüoh.

¹¹Hüyange nangha phei, nenok yhala phei, nenok rhapa hüyange rhanyu phei, numching me ngohpu Levilan phei, yinpalan, khah-halan phei, wümnyu, aoyin numan phei ngohnang, Youngwanpa nang Kahwange I min anglak jingne lepu nyoi Youngwanpa nang Kahwang sheshao me numan-e mongmei lakyang.

¹²Numan-o hipak ja me Egypt me rha ne menge ngohyangki she numan-e teihtüolak wongpong; tüokhei numan te tüolan nyüowelei tampu ngaokhümlan kentinge jonlak yang.”

¹³“Nange nang tahnoijing mepu hüyange nang wuwüngti ngütjing mepu shaijem yangphei me nyih nyit mongme peamsheam mo nange nyoilak yang.

¹⁴Hüyange nang, nangha, nang mepu yhala, nenok rhapa, hüyange nenok rhanyu, Levilan, yinpa, khah-ha, wümnyu aoyin numching me ngohnang, iman omme nang mopu me mongmeilak yang.

¹⁵Nyih nyit Youngwanpawe lepu nyoi me Youngwanpa nang Kahwang jingne mo ja ngohlak yang; hangjingne Youngwanpa nang Kahwange nange lingpu khongküm pume, hüyange nang yak-e linge okpu khongkümpu me moiman tamlak, hüyange nang lanshe mongmeiye ngohlak.

¹⁶“Wangpeng ja me lümme numan netan khongkümpuwe Youngwanpa nang Kahwang tangte Iye lepu nyoite peilak yang; hüyange do yenyetpu an mo, Tahyah mo, hüyange Peamsheam mo ngohlak yang. Youngwanpa sheshao me kahta ao-o yakkeng me yepeilak.

¹⁷Kahta liliye Youngwanpa nang Kahwange nangte moimanpu phei phinne Iye okpupa phalak yang.”

¹⁸“Youngwanpa nang Kahwange numante phapu chingshao khongkümpu me, numan jat yoi yoi jingne, kahtalan ngao khakshuwe phünlak jingne kahpalan hüyange toishao me nokpulan lelak yang.

¹⁹Nange ngaotingpa mepu yeyanlak yang, nange sheta yelei lakyang, yejema-a yakjai yeyahlak yang; hangjingne yakjai-e kon nangpalan mük pom tamnang, hüyange üjaolan ngao pienne shaine tamnang.

²⁰Nang üyin ngohlak hüyange Youngwanpa nang Kahwange nangte phapu kahmük yah okke nyoilak jingne jinte ngaotingpa, hüyange ngaotingpa hei nange janglak yang.”

²¹“Nange Youngwanpa nang Kahwang jingne wümjong lingpu tokte kaiye nange Asherah pee ülam hango yedeilak yang;

²²hüyange Youngwanpa nang Kahwange nupu üjao shongnyu deiye ye-anglak yang.