Read Konyak Naga HINSHEN 17 Bible Online

HINSHEN 17 - Konyak Naga bible

HINSHEN 17

¹“Nange Youngwanpa nang Kahwangte tahtüopu yejema-a üko nangpu mahulan yejema-a nyee tah do; hangjingne hatüowa Youngwanpa nang Kahwang sheshao me nulakpa ngohnang.

²“Numan yo me hüyange Youngwanpa nang Kahwange nangte phapu chingshao me, yoiye jiengjeppu menge netan-e jeyah shekowe jeyah, Youngwanpa nang Kahwang sheshao me ümeng lingma-a,

³hüyange taiye ülao kahwang shaoshanma-a, hüke taowe yetampu, wanghe yejema-a linnyu, yejema-a wangme ngohpu ükhongte khüm-e ngema-a,

⁴hüyange hatüo numante ima-a, hüyange numan-e hatüo jaima-a, numan-e meimei-e yamlak yang, hüyange leihu, hatüo üting she saki ngaiye hüke Israel me tüopa kihpu nulakpa ling she ütingme ngohma-a;

⁵hüma-a tüopa netan yejema-a tüopa sheko aowe tüopa ünu toi ling numan-e chingshao mepu ü-atte yüotüoh; hüyange numan-e tüopa kahtate long phei shüppe toilak yang.

⁶Tüoyangpoi kahta ni yejema-a lüm saki kaiye yeine tampu kahta hei li ne tamlak yang; kahta ja saki phei I li ne yetamlak yang.

⁷I litamlak jingne I phei tüi-e sakipalan-e üwangne yakyulak yang, tüophei me hei kahta khongkümpuwe yak lelak; hüke numan yo mepu ümengpa-a winlak yang.”

⁸“Ngao ütam numan jingne phünlak yeonge wanne ngaima-a, hüke iy ngaitampu ngaojeng, yejema-a toinan jeng, yejema-a teishütpu, yejema-a numan pa me moppu jeng numching me moppu ngohma-a, hüwante numan-e yayonge Youngwanpa nang Kahwang lepu nyoite ngoitüoh;

⁹hüyange tüopa hipak me Levi ngengpalan hüyange kahpalan tangte nang peilak, hüyange nange iman mepu tonglak, hüyange iman-e nangte ngaophünpu jaine tampha lak.

¹⁰Hüyange nyoi hanghepa Youngwanpawe lelakei, tüoken me iman-e sho-okpu hanghe nangte phalakei, nange tüopa kih-e khakshuwe linglak yang; iman-e nangte hüopu khongküm hüke nange linglak jingne kentinglak yang.

¹¹Hanghepa taisho iman-e tümyange nangte hüolakei tüopa kih-e, hüyange ngaophünpu hanghepa iman-e nangte ilakei, nange linglak yang, yakjah yeme jeyah yaknya yeme jeyah iman-e nangte hüotampu tüopa mepu nang yelüpleih lak yang.

¹²Hüyange kahta aowe Youngwanpa nang Kahwang sheshao me shao shanlak tüome yonge ngohpu ngengpate yejema-a kahpalante yejaipe, yoiye mongpu ke linglakei tüopa kahta lilakyang. Hüke linge numan-e Israel mepu ümengpa-a winlak yang.

¹³Kahta khongkümpuwe hatüo jailak, hüyange nyamlak, hüyange shaaji yoi teihpu kih-e yelinglak.”

¹⁴“Aope Youngwanpa nang Kahwange nangte phapu kahmükte nang peilakeih, hüyange hatüo yoi jingne menge tüome ngohyalakei, hüyange ‘Ü neikon-e ngohpu jatlan kih-e taowe ü-tangme ahngpa ja anglak she ilakei’;

¹⁵Youngwanpa nang Kahwange aohipa lelakei, nange I nang tang me ahngpa ne menge tamlak yang; numan kahtalan yo mepu ja nang tangme ahngpa ne anglak yang; numan kahta ne yejepu yinhulan nange nang tangme Ahngne ye anglak yang.

¹⁶Tüoyangpoi Iye yoi jingne koipong maawe ye-anglak yang, yejema-a koipong maawe anglak jingne kahtalan nishe Egypt te üyetamlak yang; hangjingne Youngwanpawe numante hüke iye ngohnang. ‘Sha-a me peiye numan-e tüoyete shaaji yelüplak yang.’

¹⁷Ahngpawe shekonyu maawe yeyahlak yang, hangjingne hüke angküma-a tüolan kaiye Youngwanpa mepu I lüppe taine ngaikülak. Hüyange Iye yoi haklak jingne khüm hei hon maawe yowe ye-anglak yang.

¹⁸“Aope Iye ahngpa shotjing me shotlakei, Levi toishao lingpu ngengpa lan-e angpu Kahwangpa Ngaokhüm laitep hüyange ütingpa ülangpa nyüopu mepu yahpu laitep ja anglak yang.

¹⁹Hüyange tüopa laitep Iye I shongme anglak, hüke Youngwanpa I Kahwang Iye nyamlak shinglak jingne, hüyange tüopa ngaokhüm hüyange khoih ipu ngaokhümlan linglak jingne, Iye I üyin jin kümme tüopa ilak yang.

²⁰Hüke angyange ipu kaiye I pheipu Israellan phei I Ütahpa she teihlak mepu hüyange hanghelam me jeyah Youngwanpawe phapu ngaokhüm mepu yeyanlak shinglak. Tüophei me Iye wangpeng laolünge wanglam lampu oklak, hüyange Ihu hei halan-e Israel tangme jin maawe wanglam lamlak.”