Read Konyak Naga HINSHEN 18 Bible Online

HINSHEN 18 - Konyak Naga bible

HINSHEN 18

¹“Levi ngengpalan hüke Levi nokphong khongkümpu Israel phei hango meitam yejema-a mothlei yengohlak; tüo nanleiye Youngwanpate phapu dopulan hüyange toidopulan iman-e hah nyoilak.

²Hüyange iman yoi kahtalan yo me iman mothlei kahtok yengohlak, Iye imante ipu kih-e, Youngwanpa-a iman mothlei ngohnang.

³“Hangkih tingme mahulan yejema-a nyee toiye dolakei, ngengpalan-e kahtalan mepu tüolak meitam tüolan ngohkülak: üphak, tahwaan moini, hüyange seanyu,

⁴Nangjing üwangne lickpu tah, wuwüngti, hüyange olive minnga, nang nyee ümin üwangne khüppu, nange Ite phalak yang.

⁵Hangjingne Youngwanpa nang Kahwange nenok nokphong khongkümpu mepu, Youngwanpa min me yongyange I shaoshanlak, Levi hüyange I hayim jintepu jingne leyangki.

⁶“Hüyange Levilan ja, I ngohpu nyoi mepu, chingshao ütam mepu Israel khongkümpu mepu ngaiye peima-a, hüyange I yaha lahnyikpu khongküm puwe Youngwanpawe hanghepa kahmük lelakei tüolante peima-a;

⁷hüwante Levilan I jeiheinao khongkümpuwe Youngwanpa sheshao me yongyange lingpu kih-e, Iye Youngwanpa I Kahwang min me shaoshanlak.

⁸Yoi mothlei yüopu me peipu tokte kaiye, iman hahlak meitam jakih-e ngohlak.”

⁹“Aope Youngwanpa nang Kahwange nangte phapu kahmükte nang peilakeih, tüoken me ngohpu tüolan jat nunushepu toishaolan nange yejonlak yang.

¹⁰Numan yo me aowe-o yoiha yejema-a yoi yhala wümjong me jakke yedolak yang; hitoi, shaotan ngaopu, yejema-a awngao itpa, yejema-a phongyengpu,

¹¹yejema-a ngeipa, yejema-a lopu, yejema-a phonglaishampu, yejema-a hileipu tahjon.

¹²Hangjingne aohipawe tüolan linglakei Youngwanpa sheshao me nulakpa ngohnang; tüolan nulakpa toishao jingne Youngwanpa nang Kahwange numan kempu lamnyu sheshao mepu iman jange teinang.

¹³Nanga Youngwanpa nang Kahwang sheshao me khak wang ngoiye ngohlak yang.”

¹⁴“Tüolan kahmük jatlan aoyin numan-e jange yanlak ne ngohnang, iman-e shaotan ipa, hüyange hitoi lingpalante jai nang, hüpoi Youngwanpa nang Kahwange numante hüke lingne yetam.

¹⁵Youngwanpa nang Kahwange nang jeiheinao, nang kahtalan yo mepu tao kihpu hipa ja ngai tamlak; Ite numan-e jaiyah.

¹⁶“Numan Horeb me jempu nyih hipak me Youngwanpa nang Kahwang te numan-e Youngwanpa ‘Ü-Kahwang ngaowüng nishe üte jaine tahtampha, yejema-a hüke tao yelilak jingne shaaji vün üyong üte ngene tahtam pha,’ she numan-e yoppe tong.

¹⁷Tüowante Youngwanpawe üte i, ‘Iman-e khongkümpu khakshuwe ngaoteki.

¹⁸Taowe iman jingne iman yoi kahta yo mepu nang kihpu hipa ne menglak ngaine tamlak; taowe I ju me ü-ngao hintamlak, hüyange taowe Ite ngaowe tampu Iye imante ilak.

¹⁹Hüyange ü-min me Iye ngaopu yejaipu kahta ütam ngohma-a, taowe tüopa jingne ü-nying nyingke Ite jan tamlak.

²⁰Hüpoi hipa aowe taowe Ite ngaotüoh she yetampute yoi mongpu kaiye ngaolakei, yejema-a aohipawe eiha kahwang min me ngaolakei, tüopa hipa-a lilak.’

²¹Hüyange nange nang mongjang me, ‘Youngwanpawe ngaopu ngao teman-e hangke shinglak?’ she ine ok.

²²Aope Youngwanpa min me hipawe ngaolakei, tüopa ngao yengaima-a, yejema-a yepeima-a, hatüowa Youngwanpawe ngaopu ne yeje, hipawe yoiye mongpu me hei ngaoyangki, nange Ite tahnyam.”