Read Konyak Naga HINSHEN 19 Bible Online

HINSHEN 19 - Konyak Naga bible

HINSHEN 19

¹“Aope Youngwanpa nang Kahwange aoyin kahmük nangte phanang, tüolan jat mahne tamlakei, hüyange nange iman jange yanne tam-e iman chingnyu hüyange iman nokme nang ngohlakei,

²nang kahmük me Youngwanpa nang Kahwange hanghepa nangte yahlak phanang, nang jingne chingnyu lüm nange ülaopa ne anglak yang.

³Kahta toipa lili tüokente taiye oklak ne, Youngwanpa nang Kahwange nangte mothlei ne tampu me lamnyu tümlak, hüyange nang kahmük yikenga yenghoi lüm ne tange tamlak yang.

⁴“Kahta jawe Iphei wepa ne-o yemengpute kahta ütam pien-e shaiye toima-a, tüolan chingshaolan jaja pahite phette taiye I yinpu oklak.

⁵Leppu ja me, kahta ni phaote pee akne jam-e ta, hüyange imni yo me shejawe pee akwante yeshingpe I jing wa ümet mepu yuwe shahyange I pheipupa lima-a, shangyinlak yam-e tüopa kahta-a tüolan chingshao lüm yo mepu jaja pahite phetlak.

⁶Hüke yelingma-a, iy shaipute phuh hahpalan-e kahta toipa-a jange teiye, lamlaopu jingne I kem yüowe, hüke I lilak wange yenangyapoi hüyange üshongpe Iye Ite nuwe yenang yahpeyoi shüt toilak.

⁷Tüojingne taowe nangte chingnyu lüm yoi yoine ngohlak jingne ngaowe tamnang.

⁸Hüyange Youngwanpa nang Kahwange numan payimlante numante phalak jingne janpu kih-e kahmük khongkümpu numante phama-a,

⁹tenyih taowe hanghepa phanang, tüopa ngaophapu nange jonlak hüyange linglak ne mengma-a, hüke Youngwanpa nang Kahwangte kenlak, hüyange jinte I lamnyu me kemlak, hüwante tüopa chingnyu lüm tokte kaiye nange chingnyu lüm üne-o paone ok.

¹⁰Hümme Youngwanpa nang Kahwange mothleilak nangte phapu kahmük me ünu yenangpu iy yeshailak, tüo ne yejema-a, iy shaipu ünu nangte shahlak.

¹¹“Hüpoi kahta ütam-e ülao ja phei teinuwe ngohma-a hüyange I jingne tanne ngohyange, hüyange I te phuh hahne yongyange, Ite lilakne shütma-a, hüyange tüolan chingnyu jajahite yinlak yamme I phette taima-a,

¹²hüwante imching lwngmei lan-e mamshe I tüopa nyoi mepu phowe I litamlak jingne iy shaiye phuh hahpalan yak me phün-e phatüoh.

¹³Ite shüpshe tah hüo. Tüopawe toipu ünu mepu Israel jaowe ngohtüoh, hümme nakshih sheminlam phe numan jingne meiye tailak.

¹⁴“Nange Youngwanpa nang Kahwange numan ngohlak jingne phapu numan-e mothleilak kahmük me üshongpe kahtalan-e lingyange ngohpu nenok yupi kahtok yikeng long yah yeteilak yang.”

¹⁵“Kahta ja kaiye saki ja shahawe ngaokhüm mengpu yejema-a ünu ompu hüke hangheyin Iye ünu omlakei yeine tamne ye-ok; saki ni yejema-a saki lüm ju kaiye ngaone mengne ok.

¹⁶Kahta ja kaiye ngaoleih saki ütam ngaiye Iye ümeng lingpu jeng I saki phama-a,

¹⁷hüwante moini yekao mepu moppulan Youngwanpa sheshao me ngengpa sheshao me, hüyange tüopa hipak me ngohpu kahpalan sheshao me yonglak yang.

¹⁸Hüyange kahpalan-e yetüohpe yamlak, hüyange leihu, saki-a ngaoleih saki ne mengma-a hüyange I jeiheinao phei tüi-e lüppelowe saki phama-a,

¹⁹hüwante numan-e Ite, Iye I eihalante linglak jingne teih ngohpu kih-e lingtam tüoh; hüke nange numan yo mepu ümeng kahta winlak yang.

²⁰Hüyange aoyin towe ngohnang, iman-e hatüo jailak, hüyange nyamlak hüyange shaaji numan yo me tüopa kihpu ümeng yejonlak.

²¹Hüyange hükihpu ngao me nang mük-e yeshüp shelak yang; üyin nanlei üyin, mük nanlei ne mük, fa nanleiye fa, yak nanleiye yak; ya nanleiye ya yahlak yang.