Read Konyak Naga HINSHEN 2 Bible Online

HINSHEN 2 - Konyak Naga bible

HINSHEN 2

¹“Tüophei me Youngwanpawe üte ngaopu kih-e, Ütak Yengching yekao me teman-e leihye-e phaonyu jongte yayong, hüyange hipak nangjange teman-e Seir kahtang neikon-e kem.

²Hüwante Youngwanpawe üte i,

³‘Numan-e tüopa kahtang neikon-e wangman-e kemtepu; apyekaote lüppe yetüoh.

⁴Hüyange kahtalante itüoh, Seir me ngohpu numan jeiheinao Esau hayim yikeng kaiye tailak ngoiteiye ngohnang; hüyange iman-e numante nyamlak tüokhei numan-e meiye jaiyah;

⁵hüpoi iman phei tahtee; hangjingne Taowe numante iman kahmük yaphalok-e okjang nehoi yephalak, hangjingne Taowe Esaute Seir kahtanga mothleilak jingne phayangki.

⁶Numan-e iman mepu ngin phei hahlak hahying shaklak; hüyange üne-o numan-e nginte numan-e yinglak yeng iman mepu shak ne ok.

⁷Teihtüoyah numan Youngwanpa Kahwange numan-e lingpu toishao lili me hangke moiman tam. Tüopa wanwüng jeng khaopu me numan waakem wante Iye numante paowe tükyangki. Tüopa lintepu wangpeng deli mongme I numan phei ngohyangki, hüyange numan-e lengpu khongküm tüoyangki.’

⁸“Tüokhei Seir me ngohpu teman jeiheinao Esau hayimlan mepu teman-e yanne Arabah lam mepu Elath me hüyange Ezion Geber mepu tai. “Hüyange teman leihye, hüyange Moab phaonyu yekao me lin-e tai.

⁹Hüyange Youngwanpawe üte i, ‘Moab phei tahmop, yejema-a iman phei hoklak tahsheng; hangjingne iman kahtok hanghe-o numante Taowe yephalak, hangjingne Taowe Lot hayimte Ar mothlei phayangki.’

¹⁰“(Emim she nyikpu kheyongpu wongnangpu jatli ja Ar me nyoi ngoh yangki. Iman-a ülao jatli ja Anakim she nyikpu jatli shinne daowe ngoh.

¹¹Anakim kih-e imante Rephaim she-o nyik, hüpoi Moab lan-e imante Emim she nyik.

¹²Horlan-o üshongpe Seir me ngoh, hüpoi Esau hayimlan-e iman jange tei, hüyange iman sheshao me iman mahne tam, hüyange iman nanleiye ngoh; hüke Youngwanpawe imante phapu kahmük me Israel lan-e linge tampuke ling.)

¹³‘Sha-a hüma-a, Wadi yengyin kaine yayong tüoh.’ Tüokhei toman-e Wadi yengyin kai.

¹⁴Hüyange toman-e Kadesh Barnea mepu yayonge peipu hipak mepu Zered yengyin kaipute ngoi-e wangpeng delüm me tet ngoh yangki. Youngwanpawe hüke iman li ei ja she ngaowe tampu kih-e tüopa jin me ngohpu wetaipalan üshei liküm yangki.

¹⁵Tüotokte iman manmahküm she iman lakjing yo mepu mahtamlak Youngwanpa yak iman kaiye ngoh yangki.

¹⁶“Tüokhei wehokte tai okpu kahtalan khongküm liye mahne tamyang phei me,

¹⁷Youngwanpawe üte ngaowe i,

¹⁸‘Tenyih numan-e Moab yikeng Ar yekaote kailak;

¹⁹hüyange aope Ammonlan yikeng shongte owe numan peilakeih, iman phei we ne tahmeng, yejema-a iman phei tah hok; hangjingne Taowe numante Ammonlan kahmük mothlei ne yetamlak; hangjingne Taowe Lot hayimlante hatüo mothlei phateki.’

²⁰(Tüopate üne-o Rephaim kahmük she nyik-e ngoh yangki: üshongpe Rephaim tüome ngoh; hüpoi Ammonlan-e imante Zamzummim she nyik;

²¹kahtalan üngang hüyange wongnangpu jatli ne ngoh, hüyange Anakim kih-e jindaowe ngoh. Hüpoi iman sheshao me Youngwanpawe iman mahne tam; tüokhei Amorlan-e iman jange tei hüyange iman ngohjing me chingnyoi.

²²Youngwanpawe Seir phaotang kahtok me aoyin nyoi, tüoken mepu Esau huhayimlan Seir lante-o jakih muh linge tam. Iye Horlan mahtam, tüokaiye Seirlan-e iman kahmük ommeyah tüome ngoh, tenyihte ngoiye nyoinang.

²³Mediterranean yengnah püowe ngohpu kahmük me Krit dikhot mepu kahtalan nyoi ngoh. Iman-e tüome üwangne chingnyoi nokshaoh ngohpu Avvimlan mahtam, hüyange heyekao me Gaza chingnyu ngoiye imanjing kahmük lanshe yah.)

²⁴Teman-e Moab kaiyang phei me, Youngwanpawe temante i, ‘Sha-a yayong tüoh hüyange Arnon Yengyin kaitüoh. Taowe Ijing kahmük phei jam-e numan wong phangme Sihon Amorlan ahngpa Heshbon phanang. Ite shümtüoh, hüyange I jing kahmük omne ükong wangtüoh.

²⁵Tenyih me wange wangphang me ngohpu üshei yeme numan jeng jaiye mokhlak hüyange nyamlakpa Taowe kahtalante hinne tamlak. Numan min iwante kahta lili ninlak hüyange nyam-e teihlak.’ ”

²⁶“Tüophei me Kedemoth phaonyu jong mepu taowe shongshonpa Heshbon chingnyu me ngohpu Sihon ahngpa tangte chingmei ngao shonne i:

²⁷‘Tao nang kahtok kaiye taine tampha; taowe chingkeng lamnyu me hei yaknya yakjah yete yeleipe tailak.

²⁸Toman-e hahyingpu jingne hüyange yingyangpu yeng jingne toman-e ümee phalak. Toman-e yah-hupu khongkümpu ne-a nang kahmük kaiye,

²⁹hüke toman-e Jordan yeng kaiye toman Kahwang Youngwanpawe tomante phapu kahmük manngoi manngoi toman taihunang, Esau huhayimlan aoyin Seir me nyoi, hüyange Moablan aoyin Ar me nyoi, imane-o tomante iman kahmük kaiye taine tamyangki.’

³⁰“Hüpoi Heshbon ahngpa Sihon-e I kahtok kaiye teman taine yetam. Youngwanpa numan Kahwange I üngei ne linge tam hüyange hokweye yong, tüokaiye teman-e Ite naowe tam hüyange I jing kahmük teman-e yah, hanghepa tenyih te ngoiye teman me ngohnang.

³¹“Hüyange Youngwanpawe üte i, ‘Leihuyah, Ahngpa Sihon hüyange iman kahmük Taowe nangte phünne phalak jingne wangteki; iman kahmük mothleilak jingne hatüo yahne ükong wangtüoh.’

³²Hüwante teman kaiye, Sihon, I hüyange iman kahta khongkümpu Jahaz ching me wehokte ngai.

³³Hüyangpoi Youngwanpa teman Kahwange temante I phünne pha; hüyange teman-e I hüyange Iha hüyange I kahtalan khongkümpu toi.

³⁴Hüyange teman-e tüopa hipak me imching yah, hüyange kahta ngohpu chingnyu khongkümpu teman-e chinghah, hüyange netan, sheko, hüyange nahalan ja nehoi yetüohpe toi.

³⁵Teman-e mahulan yah hüyange chingshao lan-a toinan khongkümpu teman-e menge tamyange yah.

³⁶Arnon kahjee ünah yeme ngohpu Aroer mepu, hüyange kahjee me ngohpu chingnyu mepu, hüke Gilead ngoiye, teman jingne chingnyu ja nehoi teman-e yengoi oklak ne yengoh; Youngwanpa teman Kahwange khongkümpu temante phünne pha.

³⁷Youngwanpa teman Kahwange tienpu jingne hei, numan-e Ammorlan kahmük ü-o-te yejema-a Jabbok yengyin yekao, yejema-a kahtang nyoi shongte yepei.”