Read Konyak Naga HINSHEN 20 Bible Online

HINSHEN 20 - Konyak Naga bible

HINSHEN 20

¹“Aope nang wepa phei tüi-e wehokte tailakei, hüyange nang phei shenyei she koiponglan hei pongtongtoi, hüyange nyahpong nangjange ngelakei, nange imante nyam-e tahteih; hangjingne Egypt mepu nang woi ngaipu Youngwanpa nang Kahwang nang phei ngohnang.

²Aope numan wehok ja shongte owe peilakeih, hüwante ngengpa sheshao yete peiye yongyange nyahponglan te ilak yang,

³Iye imante ilak, ‘Israel kahtalan, jaiyah! Tenyih numan shapjute tainang. Numan wepalante nyam-e tahteih, yejema-a mong yeyongpe tahngoh, yejema-a mokh tahteih.

⁴Hangjingne Youngwanpa numan Kahwang numan phei tainang; numan wepa phei tüi-e numan jingne hoklak, hüyange numante Iye okpu phalak.’

⁵“Tüophei me woipalan-e kahtalante hüke ilak, ‘Aoyinne nok üla weyange hatüo manjaotampe ngohnang! I nokte leihyepu oklak, hüke yelingpe I wehok me lima-a, ülao kahta ütam jawe hatüo jaotamlak.

⁶Aoyinne wuwüngkah deiye hamme angyange tüopa mepu ülick manhah nyüo! I nokte leih yepu oklak, hüke ye-i-pe I wehok me lima-a, ülao kahta jawe pelick-a yahlak.

⁷Kahta ütam-e sheko khümyange ngoh, hüpoi yha phei nokne manmeng! I nokte leih yepu oklak, hüke üyepe I wehok shapju me lima-a ülao kahtawe yha yahlak.’

⁸“Hüyange woipalan-e kahtalante üne-o hüke ilak, ‘Aohipa nyamnang hüyange mongshoiye teihnang! I nokte leih yelak yang; hüke yeyema-a I shümpalan I kaiye I kih-e mongshoi ne tam-e menglak.’

⁹Aope woipalan-e kahta lante ngaopu sholakei, nyahponglan ükhong ükhong tang me woipalan iman-e lelak yang.

¹⁰“Aope nange chingnyu ja chinghahlak jingne peiyalakei, nange üwangne tüopa mepu kahtalante chingmei linglak jingne hipak phatüoh.

¹¹Hüwante iman-e chingmei lingne hüyange numante peten epma-a, iman khongkümpuwa numan jing rha ne menglak, hüyange iman-a numan jingne kange toi lingtamlak hüyange numan shaoshan tamlak.

¹²Hüpoi, chingnyuwe nang phei chingmei yelingpe, hüyange nang phei tüi-e, hokne yongma-a hüwante nang jing nyahponglan-e hatüowa neikon tüoh;

¹³hüyange aope Youngwanpa nang Kahwange hatüo nangte phünne phane tamlakei nange tüome ngohpu netan khongküm yanglow phei toi ne tamtüoh.

¹⁴Hüpoi shekonyuha, nahalan, hüyange tampu yinmok, hüyange chingnyu me ngohpu khongküm, hüke chinghah yange yah yepu toinan khongküm, nang nying nyingke yahpeipu toinan ne menge yahlak; hüyange Youngwanpa nang Kahwange nangte phapu wepalan jing chinghah yange yahpeipu-a nange tükke jonlak yang.

¹⁵Chingnyu hanghepa nang neikon-e ngohpu jat jingne yeje, nang mepu üjaite taiye ngohpu chingnyu khongküm pute hüke nange lingtüoh.

¹⁶“Hüpoi tüome ngohpu jat chingnyu me, hanghepa Youngwanpa nang Kahwange nangte mothleilak jingne pha nang, nange üyin ja nehoi towe ye-angpe toitüoh.

¹⁷Hüke Youngwanpa nang Kahwange nangte ngaowe tampuke, nange meimeiye, Hitlan, Amorlan, Kananlan, Perizzlan, Hivlan, hüyange Jebuslan mahtamlak yang;

¹⁸hümme nakshih iman-e numante iman kahwanglan jingne iman-e lingpu nunushepu toi khongküm shinge yahne yetamlak, hüyange hüke Youngwanpa numan Kahwang phei tüi-e ünu ye-omlak.

¹⁹“Aope numan-e chingnyu ja chinghahlak jingne nganglakei, tüopa chinghah oklak jingne hipak nangjange yah yapoi, tüopa me ngohpu pelick peelan akke tahwin. Ülick hahtüoh, hüpoi pee akke tah win; hangjingne peelan-a nang wepa ne yeje.

²⁰Ülao pee ü-ngalan numan-e akke yah-e chingnyu hah-e man-ok man-ok numan-e meipe latlak jingne jontüoh.