Read Konyak Naga HINSHEN 21 Bible Online

HINSHEN 21 - Konyak Naga bible

HINSHEN 21

¹“Youngwanpa nang Kahwange nang ngohlak jingne phapu kahmük me, üko me kahta ütam, aowe shütte tam hatüo yeshingpe toi-e taiyange ngema-a,

²hüma-a numan lwngmei hüyange kahpalan peilak yang, hüyange I toipu neikonpu chingnyulan mepu hangshin jai, shemlak yang,

³hüyange lipu mang she-o-shepupa me ngohpu chingnyu lwngmeilan-e toi manling nyüopu hüyange kah manhok nyüopu mahu üha ja yahlak yang;

⁴hüyange tüopa chingnyu lwngmei lan-e, aope-o kahyehampu hüyange üli mandeipu yeng ngaiye ngohjing kahjee te woiye peilak, hüyange kahjee me mahu üha üng langlak yang.

⁵Hüyange Levi hayim ngengpa lan-e tüoken te peilak yang, hangjingne iman-e I shaoshanlak, hüyange I min me moimanlak Youngwanpa nang Kahwange iman le, hüyange hüke moppu khongkümpu hüyange teishütpu khongkümpu iman-e phünlak.

⁶Hüyange tüopa chingnyu lwngmei khongküm aoyin lipu mang iman phei owe ngoh, kahjee me mahu üha ünglangpu tangme yak tuhlak.

⁷Tüophei me iman-e hatüo hüke ilak; ‘Toman yak-e hatüo iy yeshai, yejema-a toman mük-e hatüo linge-o ye-nge.

⁸Nang kahta Israel aoyin nange Egypt mepu yin ümeng winpha, O Youngwanpa, hüyange ümeng yenangpu iy jingne nang kahta Israel yo me jhotte tah angpha. Hüyangpoi imante iy shaiyangpu ümeng winpha.’

⁹Hüke Youngwanpa sheshao me hanghe üting ngohnang hatüo nange lingwante ümeng yenangpu iy numan yo mepu jaowe tamlak.”

¹⁰“Aope nang wepa phei tüi-e wehok shapjute tailakei, hüyange Youngwanpawe iman nang yak me phünne phawe, iman phowe angpa ne menge tamlakei,

¹¹phowe angpalan yo me shemei yaomapu sheko ütam nange lenge teihma-a, shekonyu ne menglak jingne nange yha yahne ok;

¹²hüma-a nange yha nenokte woipeilak, hüyange yha shanglinlak, hüyange yha yakkhin winlak;

¹³hüyange yhawe phowantepu nyemo jeileilak, hüyange nenok me ngohlak, hüyange yha inyu ipa jingne leat ja khongkang küm-e mang shap ne tamlak. Tüophei me nange yha tangte ongpu oklak, hüyange nanga yha netanpa ne menglak hüyange yha nang shekonyu ne menglak.

¹⁴Phei me nange yhate mong yehahma-a, nange yha taihupu yete taine tamtüoh; hüpoi nange yha phei shüppe jaiyang pukhei, rhanyu ja leye nange yha nginte yeyüo tamlak yang.”

¹⁵“Leppu ja me kahta jawe sheko ni yahyange jate ken-e hüyange japate yekenpe ngohma-a, hüyange imni moini kenpupawe-o hüyange yekenpupawe-o Ite moi paiye tam, hüyange üwangne puhpu ha-a kenpu nyu mepu ne yejepe ngoh;

¹⁶hüwante Iye yoi halante yoi mothleiye phapu nyih me, Iye kenpunyu ha-a Iye yekenpe ngohpupa nyuwe puhpu ha ao Ime üwangne puhpu ha ne ngohnang, I phei shejei yongpa ne menge tahtam.

¹⁷Hüpoi Iye yelengpe tüohpu nyuwe puhpu üwangpa ha te Ime nangpu khongkümpu mepu üphong ni Ite phawe yoiha jeiyongpa ne yahlak yang. Hangjingne Imepu üwangne jalunpu I ngohnang, hüyange jeiyongpa meitam-a I jing ngoh nang.”

¹⁸“Leppu ja me kahta jawe Iha naoshe ja, iman-e Ite shaoshi pha ne tam-e hüyange winshai yapoi, inyu ipalan ngao yejaipu mükshukhulu hüyange mengshipu ngohma-a;

¹⁹Inyu ipalan-e I-a I ngohpu ching mepu woipalan sheshao me woipeilak yang, hüyange ngaophünlak jingne iman sheshao me I yongne tamlak.

²⁰Hüyange iman-e chingnyu lwngmeilante ilak, ‘Toman ha hatüowa mükshukhulu hüyange mengshi yange toman-e winneshaipu ngao yejai, Iye toman-e ngaopu yejai; Iye shengngin jajangjawe winkümnang; hüyange yuwe jokyange ngohnang.’

²¹Hüwante chingnyu me ngohpu kahta khongkümpuwe Ite longe shüppe toilak; hüke numan yo mepu numan-e ümengpa winlak, hüyange Israel khongküm puwe jaiye nyamlak.”

²²“Hüyange kahta ütam-e lilak wange ünu om ma-a, hüyange I li ne tama-a, hüyange pee me jhottam ma-a,

²³I püm wangnyak phapan pee me yetüohlak yang; hüpoi nange tüonyih muh muwe tüohlak yang, hangjingne ao takke toilakei, I Kahwange phoiwümpu phangme ngoh nang. Hüyange Youngwanpa nang Kahwange numan-e mothlei ne phapu kahmük jhotte angpu kaiye numan-e yenutamlak yang.