Read Konyak Naga HINSHEN 22 Bible Online

HINSHEN 22 - Konyak Naga bible

HINSHEN 22

¹“Nange nang pheipu Israel jeiheinao jing mahu üpong yejema-a nyee lam pien-e taipu ngeyange nang nying nyingke lowe tah ang; nange iman nang jeiheinaolan tangte nishe woi peilak yang.

²Hüyangpoi nang jeihei naowa nang ü-o me yejepe üjai me ngohpu ne meng, yejema-a nange I yeshingma-a, hüwante nange nenokte yinmok-a woi peilak yang, hüyange hatüo nang phei nang jeihei naowe yamme manpei manpei anglak yang; hüyange aope Iye tüopa yamme peikülakeih hüwante nange nishe Ite leih phalak yang.

³Hüyange hüke nange I jing gado jingne-o linglak yang; hüyange I nyemo jingne-o nange hüke linglak yang; hüyange nang jeiheinao mepu mahpu hangheyin, hanghe Iye mah, hüyange hanghe nange tüo, hüke linglak yang; nange nang nying nyingke tahlo.

⁴“Nange nang jeiheinao jing gado yejema-a I jing mahu üpong lamnyu me toitawe ngema-a, nange tüolan mepu nang nying nyingke lowe tahtai, nange ütingme imante jam-e loitam tüoh.

⁵“Sheko jawe netan jing nyemo ye-o-lak yang, yejema-a netane-o sheko jing nyemo ye-o-lak yang; hangjingne aowe tüolan toi linglakei Youngwanpa nang Kahwang sheshao me nulakpa ngohnang.

⁶“Nang taipu lamnyu me awha ülüp ja nang sheshao me ngohma-a, pee ütam me yejema-a kahtok me üha yejema-a ükek ngohma-a, yejema-a Inyuwe ümme ngohma-a, yejema-a ükek me ümme ngohma-a, nange üha pheipu ünyuwa yeyahlak yang.

⁷Nange ühapa-a yah ne ok; hüpoi nange ünyuwa taine tamtüoh; hümme nakshih nang meiye ngohlak, hüyange nang jin laowe ngoh oklak.

⁸“Aope nange nok üla welakei, hüwante nange noktokpe pelak yang, hümme nakshih kahta ütam tüome yeima-a nange nenok tangme iy shaipu ümeng yah yepeilak.”

⁹“Nange nang wuwüng kah me üli ülam ni yedeilak yang; hüke deiye lingma-a pelick khongkümpuwa nange deipu üli, hüyange wuwüngkah mepu ngaipuwa, jaowe tamlak nyoi me phünne phawe tüohlak.”

¹⁰“Nange mahu üpong hei gado ni jam-e kahhok ne yetamlak yang.

¹¹“Nange mat hei pengkhai jam-e nyütyange takpu inkhek ye-in lakyang.

¹²“Nang jing inkhek hanghe nange innang, üjeng peli me nyejeng lingtüoh.”

¹³“Leppu ja me kahta jawe sheko ja yah-e nok ne meng, hüpoi yha phei püng yangphei me, Iye yha yeyah-hu,

¹⁴hüyange yha phei tüi-e ngao ngai-e hüke ngaowe yha yeitam; ‘Taowe tüopa sheko yah, hüpoi aope tao yha phei shi, yha jaowe ngohyangpu ülam taowe yetüo.’

¹⁵Hatüo kih ngaima-a, naoyhanyu üpa hei ünyulan-e naoyhanyu wangngoipu üyüolan hüowe naoyha poiwante iy phowe tampu inkhek yah peiye, peten me chingnyu lwngmeilan te hüowe tamlak.

¹⁶Hüyange naoyhanyu üpawe lwngmeilan te ilak. ‘Taowe tenok naoyha tüopa kahtate shekonyu ne menglak jingne pha, hüyangpoi sha-a Iye yha yelengpe ngainang.

¹⁷Hüyange leihuyah, Iye yhate wüolakpa toi linge tam-e i, “Taowe yha me wangengoipu naoyha üyüo ye-nge.” Tüoyangpoi tüolan-a tenok naoyha wangengoipu naoyha üyüo yepinlakpa ngohnang’ she iyange iman-e chingnyu lwngmeilan sheshao me inkhek nyam-e tüohlak.

¹⁸Chingnyu lwngmeilan-e kahta-a woiye peiye Ite shütlak;

¹⁹hüyange iman-e Ite tang ne khüm ükhüw gho ja hahlak, hüyange naoyhanyu üpate hatüo phalak, hangjingne Iye Israel naoyha ja tangme min meng peiye tam; hüyange yha I shekonyu ne muh ngohlak; Iye I jin küm-e yha yewinpe anglak yang.

²⁰“Hüpoi hatüo kih peipu ütingne mengma-a, hüyange wange ngoipu naoyha üyüo yhame ye-ngema-a,

²¹hüwante iman-e naoyhanyuwa Ipa nok taten shongte woi peilak, hüyange yha chingnyu kahtalan-e yha toitamlak jingne longe shüplak, hangjingne yhawe Israel me, Ipa nok me nuweshakke ling; hüke nange numan yo mepu ümengpa yah winlak yang.

²²“Kahta jawe eiha shekonyu ja phei kuhleih-e ngema-a, hüwante imni moini lilak, shekonyu phei kuhleihpu netanpa, hüyange shekonyu, hüke nange Israel mepu ümenga winlak yang.

²³“Leppu ja me khümyangpu naoyha ja ngohma-a, hüyange kahta jawe chingshao me yha hüowe yha phei kuhleihma-a,

²⁴hüwante nange chingnyu peten te imni moini woi peilak, hüyange numan-e imni moinite longe shüppe toilak yang; hangjingne chingshao me ngohyange shekonyuwe jamlak jingne yewün, hüyange netanpawe-o yoi yupi shekonyu Iye mengetam; hüke nange numan yo mepu ümeng winne tamlak yang.”

²⁵“Leppu ja me kahta jawe khümyangpu naoyha ja phaoyekao me hüoma-a, hüyange netanpawe yha phei kange jonma-a, hüyange shima-a, hüwantepa-a netan aowe yha phei toimeng ling I hei lilak.

²⁶Hüpoi naoyhanyu te nange hango yelinglak yang; shekonyute lilakne wange ünu yenang; hangjingne hatüowa kahta jawe kahta jate shümyange toipu kih-e hei tüopa-o ngainang.

²⁷Hangjingne Iye yha phaoyekao me phowe toimeng ling, naoyhawe yhate jamlak jingne üngwün, hüyange yha yinlak jingne tüome ao-o yenangpe ngoh.

²⁸“Leppu ja me kahta jawe wange ngoipu naoyhaha ja ao üne-o mankhüm, yha phoyange hüyange yha phei kange jonma-a, hüyange iman ngema-a,

²⁹hüwante aowe yha phei toimeng ling Iye naoyhanyu Ipate yhamee ne khüm ükhüw denga phalak, hüyange yha I shekonyu ne menglak, hangjingne Iye yha mengetam, Iye yoi jin küm-e yha yewinpe ngohlak yang.”

³⁰“Kahta aowe-o yoipa shekonyu yeyahlak yang, yejema-a yoipa jing shekonyu shiengnye yelanlak yang.”