Read Konyak Naga HINSHEN 23 Bible Online

HINSHEN 23 - Konyak Naga bible

HINSHEN 23

¹“Kahta ao me üyieng paiyange ngoh, yejema-a I jing jupeng wette winyange ngoh, Youngwanpa jing kahtalan jemjing te yepeitamlak.

²“Chingyang hawe Youngwanpa jing kahtalan jempu nokte ye-onglak; pen shepupa jin ngoiye Ime jalunpulan ao-o Youngwanpa jing kahtalan jemjing nokte ye-onglak.

³“Amonlan yejema-a Moablan-e Youngwanpa jing kahtalan jemjing te ye-onglak yang; jin pen shepupa ngoiye iman ao-o Youngwanpa jing kahtalan jemjing te ye-onglak yang.

⁴Hangjingne numan Egypt mepu ngaiwante iman-e hahying hüyange yeng yahyange numan pongte yeyu; hüyange numante phoiwüm tamlak jingne Mesopotamia me ngohpu Pethor mepu Beor üha Balam iman-e nanshak.

⁵Tüoyangpoi Youngwanpawe Balam ngao yejai; hüpoi Youngwanpa nang Kahwange phoiwümpuwa nang jingne moiman-e mengetam; hangjingne Youngwanpa nang Kahwange nangte ken.

⁶Nang jat ja she ngohpu mongme tüolan jat lante jam-e ponglak hango tahling yejema-a iman jalun-e tahtam.”

⁷“Nange Edomlante khah-yeteihlak yang, hangjingne I-a numan pheipu ngohnang. Nange Egyptlante khah-yeteihlak yang, hangjingne iman kahmük me nang hipak ja me yinpa ne ngohyangki.

⁸Jin lüm shepupa me puhpu iman hayimlan-e Youngwanpa jing kahtalan shüp jemjing te ongpu oklak.”

⁹“Aope nang wepalan phei hokke wepu hipak me lakjing me ngohlakei, hüwante wanglam me yejao yeshapu üshei mepu yanne ngohlak yang.”

¹⁰Numan yo me kahta ütam yaning üdi yupu kaiye yejaope ngaima-a, I lakjing mepu ngaiye tailak yang. I lakjing te ye-onglak yang;

¹¹Hüpoi ünpong me, Iye yoi nying nyingke yeng yüolak yang; hüyange wanghe nyüp phei me I lakjing te onglak yang.

¹²“Nange lakjing ü-at yeme nyoijing ja anglak yang, hüyange nange tüoken me nokshaote yuwe winlak yang.

¹³Nang me sheng shaohja kahtok shaolak jingne ngohlak yang hüyange aope nang phaote tailakei , nange tüowe kah koklak yang, hüyange nange winpu-a küppe tüohlak yang.

¹⁴Hangjingne Youngwanpa nang Kahwange, numan yinlak hüyange nang wepalan numan yakme phalak jingne numan lakjing neikon-e kemnang, tüokhei nang me hango yejaoyeshapu ye-nge tamlak, hüyange nang mepu I leih yeyelak jingne, numan lakjing jaosa-e anglak yang.”

¹⁵“Rhapa ja yoi nokpu mepu phette taima-a, hüyange nang tangte yinhuwe phette peiye ngoima-a, nange Iye tüohpu nokpute I shonne üyetamlak yang.

¹⁶Numan yo me Iye ngoh hupu ükhong hanghepa ching me I ngohlak Iye lelakei tüoken me I nang phei ngohlak; nange Ite yemeipe yejonlak yang.”

¹⁷“Israel sheko hüyange netan aowe-o khümjing üsho yüonyu hüyange yüopa ne yemeng lakyang.

¹⁸Youngwanpa nang Kahwang nokte janpu dolak jingne hükihpu (Sheko üsho yüopu yejema-a netan üsho yüopu) tüopu ngin hango yah yepeilak yang; hangjingne moini-a Youngwanpa nang Kahwang sheshao me nulakpa ngohnang.”

¹⁹“Nange nang jeiheinao Israel pate ngin me shompu ne jeyah, hahying me yejema-a sheminlam phe me shompu nangyange yeseatamlak yang.

²⁰Yinhulante nange shompu shüm-e yelakne üsea phapu oklak; hüpoi hanghe kahmük nange yahlak jingne tainang, tüoken me nange lingpu khongkümpu me Youngwanpa nang Kahwange nang moimanlak jingne yoi jeiheinao Israel lante nange shompu nangyange üsea yephalak yang.”

²¹“Aope nange Youngwanpa nang Kahwangte jiengjeplakei, hatüo nange yeshonpe phalak yang; hangjingne Youngwanpa nang Kahwange hatüo nang mepu heiyah külak; hüyange hatüo nang jingne ünu ne ngohkülak.

²²Hüpoi nange yejiengpe ngohma-a, hatüo nang me ünu yenanglak.

²³Ngaowe janpu, hatüo nange monge janpu jingne, Youngwanpa nang Kahwangte nange janpu kih-e nange linglak yang.”

²⁴“Aope nang yupi nok wuwünglick kah kaiye nang kemya lakei, nange hah hupu kih-e wuwünglick okpu shinne hahne ok; hüpoi nange nang gee me hango yehinlak yang.

²⁵Aope nang ütamja jing tahlick pheipu kah kaiye kemyalakei, nange nang yak-e tahlick yütte yah-e hahne ok; hüpoi nang yupinok tahte nange yangkuih yele lak yang.”