Read Konyak Naga HINSHEN 24 Bible Online

HINSHEN 24 - Konyak Naga bible

HINSHEN 24

¹“Aope netan jawe sheko ja phei nokne menglakei, shekonyu me ülamja mong yehahpu nge okpu jingne, Iye yanpu lai ja nyanne yhate phalak, hüyange hatüo yha yak me phayange I nok mepu yha teilak;

²hüyange Inok mepu yha taiyange, ülao kahta ja sheko ne mengma-a,

³hüyange nishepupa netanpawe-o yha te numa-a hüyange yhate yanlak lai nyanyange phama-a, hüyange hatüo yha yak me phama-a, hüyange Inok mepu yha yanne teima-a; yejema-a I shekonyu ne menglak jingne yha yahpu nishepu netanpa lima-a,

⁴yha üwangpa netanpa aowe yha yanne tei, yha nishe yoi shekonyu ne menglak jingne, yha yejaope nutepuwe, Iye yeyahlak yang; hangjingne Youngwanpa nang Kahwange nangte mothlei ne phapu kahmük nange tahnutam.

⁵“Aope kahta jawe sheko yahpu üla ne ngohlakei, I wetaipalan phei taine ye-omlak yang, yejema-a hanghe toi me-o Ite kangpu yengohlak yang; wangja-a I hüke nok me ngohlak, hüyange Iye yahpu sheko mongmeine tam-e ang tamlak yang.”

⁶“Aowe-o pheeisea teijan pu ne shamshu long yejema-a shamshulong ütokpa yeyah lakyang; hangjingne Iye üyin ja tüopa jingne yahpu ne ngainang.

⁷“Kahta ütam-e yoi kahta Israel yo mepu kahta kuh yahküma-a, hüyange Iye Ite rha ja leye jonma-a, yejema-a I yüoma-a, tüopa kuhpa-a li ne tamlak yang. Hüke numan yo mepu ümengpa nange winlak yang.”

⁸“Ngonwante, Levi ngengpa lan-e numante hangke hüolakei hüke khongkümpu mam mamshe linglak jingne kentinglak yang; taowe imante nyüowelei tamyangpu ke, numan-e hüke jon-e lingtüoh.

⁹Numan Egypt mepu ngaiwante lamme Youngwanpa Kahwange Miriamte hanghe ling teih tüoyah.”

¹⁰“Aope nange ütam jate ülamja üsea phalakei, nange ta-mee yuwe inoksate ye-onglak yang.

¹¹Nang nokshao me tanlak yang, hüyange kahta ao te nange üsea phanang, Iye ta-mee a nokshaote nang tangte yah yüoyange phalak yang.

¹²Hüyange I-a toiha kahta ne mengma-a, Imepu yahpu tamee nang me phapüm ne tahtam.

¹³Tüopa-a yajeih she Ite leih yetamtüoh, hümme nakshih I tüopa phei shipu oklak. Hüwante I mongmeilak, hüyange Youngwanpa nang Kahwange nangte mongmeiye teih-e moimanlak.

¹⁴“Nange yoi kahta ne jeyah, yejema-a nang kahmük me numching mongme ngohpu nenok yinpa ne jeyah, nanpa shaoshanpa ao toinan nang, nange shaoshine yetamlak yang;

¹⁵Wanghe mannyip pe muh, nange I nanmee tüonyih muh phatüoh, hangjingne I toiha hüyange hatüo jingne yoonge ngohnang; hüke yelingma-a Iye nang phei tüi-e Youngwanpate üngwünlak, hüyange hatüo nangjing ne ünu ne ngohlak.”

¹⁶“Hayimlan jingne nyupalan li ne yetamlak yang, yejema-a nyupalan jingne hayimlan li ne yetamlak yang. Kahta lili yoi ünu jingne hei li ne tamlak yang.

¹⁷“Yinpa yejema-a khah-ha ngao phün-e tamlak mepu nange yetüohlak yang, yejema-a wümnyu nyemo yuwe ta-mee ne tah ang.

¹⁸Hüpoi Egypt me nang rha ne menge ngoh, hüyange Youngwanpa nang Kahwange tüomepu yin she nange teih tüoyah.”

¹⁹“Aope nenok kahme nange tah yahlakei, hüyange kahme tah yakshüp peye tüohya lakei, nange hatüo yahlak jingne nishe tahye; nange lingpu toishao khongkümpu me Youngwanpa Kahwange nang moiman tamlak jingne, hatüowa yinpa, khah-ha, hüyange wümnyulan jingne tüotüoh.

²⁰Aope olive pee mepu pelick khailakei, nange nishe pelick yam-e yeyelak yang; hatüowa yinpa, khah-ha, hüyange wümnyulan jingne tüotüoh.

²¹“Aope nenok wuwüng kah me wuwünglick khailakei, nange nishe leihye-e yekhailak yang; hatüowa yinpa, khah-ha, hüyange wümnyulan jingne ngohlak.

²²Egypt kahtok me nang rha ne menge ngoh she nange teihtüolak yang; tüokhei taowe nangte tüopa-a linglak jingne ngaowe tamnang.