Read Konyak Naga HINSHEN 25 Bible Online

HINSHEN 25 - Konyak Naga bible

HINSHEN 25

¹“Leppu ja me Israel kahta nipa me mop ngaiye, iman-e ngaophün jingte peima-a, hüyange kahpalan-e iman ngao phünma-a, hüwante iman-e ngaoting ipa tinge tamlak hüyange ngaoleih ipa-a yeitamlak.

²Hüyange ümengpate shütlak wangma-a, kahpawe I sheshao me I yemeipu phei phinne leiyange shütlak jingne lamyange shanlak yang.

³Hanti deli ngoiye Iye Ite shütne ok, Iye tüo tokte nyeiye yeshütlak yang; hüke yejema-a ünyei shütpu nanjingne nange yoi pheipulan yeine tamnang.”

⁴“Mahu üponge tahnoiwante nange I ju yepang lakyang.”

⁵“Jeiheinao ni mothlei ja me jam-e ngohwante imnipa me ha-nao yetüohpe sheja limah ma-a, litepupa shekonyu eiha jat phei toi yetailak yang; yha netanpa jeihei naowe yha-a shekonyu ne yahlak yang; hüyange yhate jeiheinao netanpa jawe linglak toi yhate linge tamlak yang.

⁶Hüyange yhawe puhpu üwangpa hawe, litepupa jeiheinao min me Israel mepu I min yewinlak jingne moth leilak yang.

⁷Hüpoi kahtawe I jeiheinao tüohpu wümnyu yeyah huma-a, hüwante I jeiheinao shekonyuwe taten shongte lwngmeilan tangte onglak, hüyange ilak, ‘Ü-netanpa jeiheinaowe I jeiheinao min Israel me min angtam she inangki, Iye üte jeiheinao netanpawe linglak toishao minling she ngaoteki.’

⁸Hüwante chingnyu lwngmeilan-e I nyiklak, hüyange Ite ngaolak; hüyange Iye minpo, ‘Taowe yha yeyah hu’ she ngaoma-a,

⁹hüwante I jeiheinao shekonyuwe lwngmeilan sheshao me I tangte wenlak, hüyange I ya mepu yashom ja khok-e yahlak, hüyange I shetate iyphao phaotamlak; hüyange ilak, ‘Ao kahtawe yoi jeiheinao noksa yelinghu, Ite hüke linglak.’

¹⁰Hüyange Israel me I nokphong te, ‘yashom khokpu nokphong she nyiklak.’”

¹¹“Aope kahta ni teeyange seaye ponge talakei, shejapa shekonyuwe yoi netanpa yinlak jingne owe wenne yoi yak noyange japa netanpa jupengte phütyange shuma-a,

¹²nange yhate hango shüpshe yenangpe yha yak lange tamtüoh.”

¹³“Nange nang nyekhok me toklak ja jingne yoi yoi tokyong, üyong, hüyange üjoi ye-anglak yang.

¹⁴Nange nenok me taksheng ja jingne yoi yoi üyong hüyange üjoi ye-anglak yang.

¹⁵Youngwanpa nang Kahwange nangte phapu kahmük me nang jin laowe ngohlak jingne toklak ja jingne tokyong hüyange khakshuwe anglak yang; taksheng wangman-e hüyange khakshuwe nange anglak yang.

¹⁶Hangjingne hüke toi lingpu khongküm, hüke ngaoting ye-i-pe lingpu khongküm Youngwanpa nang Kahwang sheshao me nulakpa ngohnang.”

¹⁷“Numan Egypt mepu ngaiwante Amaleklan-e nangte hanghe ling teih tüoyah.

¹⁸Hüke iman-e nang phei hüo, hüyange nang wong yenangpe hüyange towe nyaiye ngohwante, ükümpalan hüyange nang phei me wong yenangpe ngohpalan Iye toiyewin; hüyange Iye Kahwangte yenyam.

¹⁹Tüokhei, Youngwanpa nang Kahwange numan mothlei ne menglak jingne numante phapu kahmük me, Youngwanpa nang Kahwange numan neikon-e wepa khongkümpu mepu numante toloimei aope phawe ngohlakei, numan-e wangphang me Amalek teihtüopu yenanglak ne ja nehoi yetope phutte winlak; hatüo numan-e yepelak yang.”