Read Konyak Naga HINSHEN 26 Bible Online

HINSHEN 26 - Konyak Naga bible

HINSHEN 26

¹“Aope Youngwanpa nang Kahwange numante mothleilak jingne phapu kahmükte numan yulakei, hüyange hatüo omlakei, hüyange tüopa me ngohlakei,

²Youngwanpa Kahwange numante phapu kahtok mepu tüopu khongkümpu ülick numan-e yahyange peilak, hüyange hatüowa küm ja me angtüoh, hüyange Youngwanpa nang Kahwange I min hanghepa nyoi me angtamlak jingne lelakei tüokente tailak yang.

³Tüopa hipak me ngengpa aohepa yakjongpane ngoh, I tangte nang tailak yang, hüyange Ite itüoh, ‘Youngwanpawe teman pajeiyonglante janpu kahmükte tao ngoiye ngohnang she tenyih taowe Youngwanpa nang Kahwangte pongtam nang.’

⁴Hüwante ngengpawe nang yak mepu küm-a yahlak, hüyange hatüo Youngwanpa nang Kahwang wümjong shao me anglak.

⁵“Hüyange nange Youngwanpa nang Kahwang sheshao me jan-e ilak, ‘Üjing pajeiyonga waa-e ngohpu Aramelan ja ne ngoh yangki, I ükhong üjoiha ja phei Egypt me ngohlak jingne lai, hüyange tüo me I jat ja ne meng, yonge, wongnangpu phei hüyange üngang.

⁶Hüpoi Egyptlan-e tomante loishe jonpai, toman shaoshi yateng, hüyange tomante rha toishao kitam;

⁷hüwante tomanjing pajeiyonglan Kahwangte toman-e üngwün, hüyange Youngwanpawe ngaowüng jai, hüyange toman shaoshipu, toman towenyaipu, hüyange toman shaoshipu nge.

⁸Tüokhei Youngwanpawe wongnangpu yak hüyange yakhong yange, nyamlak üyong, yepinlakpa, hüyange yashanyali toiye, toman Egypt mepu woitei,

⁹hüyange tüopa kahmükte toman woipei-e, Iye tomante, düamyeng hüyange zahtai jelo yünpu kahtok pha.

¹⁰Hüyange sha-a, leihu, O Youngwanpa, nange üte phapu, kahtok mepu ngaipu üwangpa ülick taowe yahpei nang.’ Hüyange nange Youngwanpa nang Kahwang sheshao me tüopa küm-a tüohlak, hüyange Youngwanpa nang Kahwangte yoppe khümtüoh.

¹¹Hüyange Youngwanpa Kahwange nangte hüyange nenokte phapu meipu khongkümpu jingne nang, hüyange Levilan, numan yo me ngohpu yinpa om-e mongmei tüoh.

¹²“Wangpeng lüm shepupa me, hatüowa penphong phapu wangpeng, aope nange penphong phapu khongküm sholakei, hüwante hatüo nange Levilante, yinpalante khah-halante, hüyange wümnyulan te, numching wankam mongme sea moh-e iman-e hahlakne nange phalak yang,

¹³hüyange Youngwanpa nang Kahwangte nange ilakyang, ‘Nange üte ngaowe tampu kih-e, nange ngaowe tampu hango yemengpe yejema-a tüolan-a yepepe, taowe tenok me taowe phünne phalakpa, toinan yah teiteki, hüyange üne-o taowe hatüo Levilante, ngoiye ngohpu yinpalan, khah-ha, hüyange wümnyute phayangki; nange ngaowe tampu ütam nehoi taowe yemengtam, yejema-a taowe tüolan-a yepetüoh;

¹⁴taowe tüolan hango tao yoonge shonwante yehah, yejema-a yejaope ngohwante taowe hango yewintüoh, yejema-a lipupa jingne hango yepha; taowe Youngwanpa Ü-Kahwang ngaowüng jaiteki, nange üte ngaowe tampu kih-e taowe khongküm lingteki.

¹⁵Nang üjao nyoi, wangdang mepu, leiye taipha, hüyange nang kahta Israel, hüyange toman payimlante janpu, düamyeng hüyange zahtai jelo yünpu kahmük moimantam pha.’ ”

¹⁶“Tenyih Youngwanpa nang Kahwange nyanpu ngaokhüm hüyange linglak ngaokhüm jonlak jingne nangte ngaowe tamnang; tüokhei nange tüolan-a nang mongjang üsheiye hüyange nang yaha üsheiye jontüoh.

¹⁷I lamnyu me kemlak, hüyange I nyanpu ngaokhüm, hüyange Iye ngaowe tampu, hüyange I ngaophünpu, hüyange I ngao jailak, tenyih nang Kahwangne menglak Youngwanpate janyangki;

¹⁸hüyange lye janpu kih-e, nange I ngaokhüm hei anglak ne, Youngwanpawe nang tenyihpu nyih I jingne ülaopa kahtane menglak jingne janteki,

¹⁹hüyange Iye linge ngaipu jat khongkümpu tangme nanga üyongpa ne hüyange minshing puphei, hüyange minyong puphei nang ütahpa ne menge tamlak; hüyange Iye ipuke, Youngwanpa nang Kahwang jingne nang üjao kahta ne ngohlak.”