Read Konyak Naga HINSHEN 27 Bible Online

HINSHEN 27 - Konyak Naga bible

HINSHEN 27

¹Sha-a Mosa hei Israel lwngmeilan jamyange kahtalante ngaowe i, “Tenyih taowe numante phapu ngaowe tampu khongkümpu jontüoh.

²Youngwanpa nang Kahwange numante phapu kahmükte numan Jordan kaiye ongpu nyih memuh, numan-e shitte lingyang phei longkhao ja yonglak yang.

³Youngwanpa numan pajeiyonglan Kahwange numante janpuke Youngwanpa nang Kahwange numante phapu, düamyeng hüyange zahtai jelo yünpu kahtokte numan ongwante numan-e tüolan tangme tüopa ngaokhüm ngao khongkümpu nyanlak yang.

⁴Numan Jordan kaipu phei jamshe numan-e tüopa longkhao-a taowe tenyih numante ngaowe tampu kih-e, Ebal kahtang me yong anglak yang, hüyange tüopa-a meimei-e shityange anglak yang.

⁵Hüyange tüome Youngwanpa nang Kahwangte wümjong ja, longphei lingpu wümjong linglak yang; tüolan tangme nange yan toinan hango yejonlak yang.

⁶Youngwanpa nang Kahwang wümjonga yetangpu long phei nange linglak yang; hüyange tüopa me Youngwanpa nang Kahwangte nange jakke dopu phalak;

⁷hüyange nange chingmei dopu dolak, hüyange tüoken me hahlak; hüyange nange Youngwanpa nang Kahwang sheshao me mongmeilak.

⁸Hüyange nange shitte lingyangphei long tang me tüopa Kahwangpa ngaokhüm khongkümpu meimeiye nyanlak yang.”

⁹Tüophei me Mosa hei ngengpalan, aoyin Levilan ne ngoh, Israel khongkümpu te i, “Ngao yengaipe ngohtüoh, hüyange jaiyah, O Israel! Tenyih nang Youngwanpa nang Kahwang kahtane mengteki.

¹⁰Tüokhei nange Youngwanpa nang Kahwang ngao jaitüoh, hüyange Iye ngaowe tampu hüyange nyanpu ngaokhüm hanghepa tenyih taowe nangte phanang, hatüo lingtüoh.”

¹¹Tüonyih muh Mosawe kahtalante ngaokhüm phawe i:

¹²“Aope numan-e Jordan kaiye tailakei, tüolan nokphong kaiye kahtalan moimantamlak jingne Gerizim kahtang me yonglak yang: Simeon, Levi, Judah, Issakhar, Joseph hüyange Benjamin.

¹³Hüyange aope phoiwümpu ngao ponge tamlakei, hüwante Ebal kahtang me tüolan nokphong yonglak yang: Reuben, Gad, Asher, Zebulun, Dan, hüyange Naphtali.

¹⁴Hüwante Levilan-e Israellan khongkümpu te ngaowüng üyong puphei tüolan ngao ilak yang:

¹⁵“ ‘Youngwanpa sheshao me yeonge nulak ne, yak aijonpalan-e yak-e lingpu, lopu nyoi ja me ange moungte lahnyike yejema-a monghuwe linge aowe linglakei, Ite Kahwangpawe phoiwümtüoh.’ Kahta khongkümpuwe jan ilak, ‘Amen!’

¹⁶“ ‘Aowe Ipa yejema-a inyu ye-i-yeshe lakei, Ite Kahwangpawe phoiwümpu shahtüoh.’ Kahta khongkümpuwe ilak, ‘Amen!’

¹⁷“ ‘Aowe yoi yupipa kahtok yikeng sheihsheng lakei, Kahwange Ite phoiwümpu shahtüoh.’ Kahta khongkümpuwe ilak, ‘Amen!’

¹⁸“ ‘Aowe mükmüopalan lamnyong yete woilakei, Ite Kahwangpawe phoiwümpu shahtüoh.’ Kahta khongkümpuwe ilak, ‘Amen!’

¹⁹“ ‘Aowe yinpate, khah-hate, hüyange wümnyulan ngaophünpu yeshupe jonlakei, Ite Kahwangpawe phoiwümpu shahtüoh.’ Kahta khongkümpawe ilak, ‘Amen!’

²⁰“ ‘Aowe yoipa shekonyu phei phwngngampu kaiye yoipa te wüotüone tamlakei, Kahwangpawe phoiwümpu Ite shahtüoh.’ Kahta khongkümpuwe ilak, ‘Amen!’

²¹“ ‘Aowe yinmok ütam ja phei nehoi phwngngamlakei Ite Kahwangpawe phoiwümpu shahtüoh.’ Kahta khongkümpuwe ilak, ‘Amen!’

²²“ ‘Aowe yoi nyanao phei, yoipa üha yejema-a yoinyu üha phei phwngngamlakei, Kahwangpawe phoiwümpu Ite shahtüoh.’ Kahta khongkümpuwe ilak, ‘Amen!’

²³“ ‘Aowe yoi sheko Inyu (yoinyei) phei phwngngam lakei, Kahwangpawe phoiwümpu Ite shahtüoh.’ Kahta khongkümpuwe ilak, ‘Amen!’

²⁴“ ‘Aowe yupipa lowe toilakei Ite Kahwangpawe phoiwümpu shahtüoh.’ Kahta khongkümpuwe ilak, ‘Amen!’

²⁵“ ‘Aowe ümeng yenangpu kahta toilak jingne yakjai ngin yahlakei Ite Kahwangpawe phowe phoiwümpu shahtüoh.’ Kahta khongkümpuwe ilak, ‘Amen!’

²⁶“ ‘Aowe tüopa Kahwangpa ngaokhüm hüyange nyüowe tampu jaiye yeyahlakei, Ite Kahwangpawe phoiwümpu shahtüoh.’ Kahta khongkümpuwe ilak, ‘Amen!’