Read Konyak Naga HINSHEN 28 Bible Online

HINSHEN 28 - Konyak Naga bible

HINSHEN 28

¹“Taowe tenyih numante phapu, Iye ngaowe tampu khongkümpu jonlak she, Youngwanpa nang Kahwang ngao numan-e ye-angpe jailakei she ima-a, Youngwanpawe kahtoknyu jat khongkümpu tangme numan üyongpa ne angtamlak.

²Hüyange Youngwanpa nang Kahwang ngaowüng numan-e jailakei she ima-a, tüolan moiman khongkümpu numan tangte peikülak, hüyange numan pheite woilak.

³“Youngwanpawe numan chingshao hüyange numan jing kah moimanlak.

⁴“Youngwanpawe nangte hayimlan üngang, deihei li ülick maawe, hüyange nyee hei mahulan üngang moimanlak.

⁵“Youngwanpawe nang tah hei cee jonpu küm hüyange hahyingne tüolan tümpu shüm moimanlak.

⁶“Aope nang ong peilakeih nangte moimanlak hüyange aope tailakeih nang moimanlak.

⁷“Wepa aoyinne nang phei hoklakei Youngwanpawe nang sheshao me nao tamlak; nang phei tüi-e iman-e lam ja me peilak, hüpoi iman-e lamnyu nyit kaiye yan-e phetlak.”

⁸“Nenok bunga tah-e maatamlak hüyange Youngwanpa nang Kahwange nange lingpu toishao me moiman tamlak. Iye nangte phanangpu kahmük me Iye nangte moimanlak.

⁹“Youngwanpa nang Kahwange ngaowe tampu nange khongkümpu jonma-a hüyange I lamnyu me kem ma-a, Youngwanpawe nangte janpu kih-e I jingne Iye nang üjao kahta ja ne menge tamlak.

¹⁰Hüyange kahtoknyu kahta khongkümpuwe nange-a Youngwanpa min me nyik-e ngohnang she ngelak, hüyange iman-e nangte nyamlak.

¹¹“Youngwanpawe numan pajeiyonglante nangte phalak she janpu kahmük me, nang üyin üli me, nange tampu yinmok üli me, nang kahtok pelick me Youngwanpawe nangte üngang moiman phalak.

¹²Youngwanpawe nang yaktoi khongkümpute moiman tamlak jingne hüyange nang kahtok me hipak khakshuwe wai shonlak jingne, Iye yowe angpu jongnyoi ümei wang eplak; hüyange nange jatlan maapute ü-sea phalak, hüpoi nangepa-a üsea yeyahlak.

¹³Nangehi Youngwanpa nang Kahwange ngaowe tampu hanghe tenyih taowe nangte phanang, hatüo kentinge jonma-a, Youngwanpawe nanga jatlan yo me ünyei yene yeje, üshang ne mengtamlak; hüyange nanga üphang yeme yeje, ütokye shaha me ngohlak.

¹⁴Tenyih Taowe phapu ngaokenglan hanghepa mepu-o yakjah yete yejema-a yaknya yete, ülao Kahwanglan pheite woiye iman shaoshan-e lüp tahtai.”

¹⁵“Hüpoi tenyih taowe nangte ngaowe tampu Youngwanpawe phapu hüyange I nyanpu ngaokhüm khongkümpu jonlak jingne Youngwanpa nang Kahwang ngaowüng minjai she ima-a, tüopa phoiwümpu khongkümpu nang tangte peikülak, hüyange nangte ngoilak:

¹⁶“Chingnyu me nangte phoiwümlak, hüyange kah me nangte phoiwümlak.

¹⁷“Nangjing tah hei cee küm hüyange tüolan shu-ngümpu shümte phoiwümlak.

¹⁸“Nang naonyoi ülite, nang kahtok ülick te, nang mahu hüyange nyee ükhong ühalante phoiwümlak.

¹⁹“Nang ong peipute phoiwümlak hüyange nang tai-ongpute phoiwümlak.

²⁰“Nange tao winne tüohyange nange ümengpa lingpu jingne nang mahmantam mantam hüyange nang mamshe manhüm manhüm, Youngwanpawe nang tangme nange lingpu khongkümpu me phoiwümlak, shangha shaoshi, hüyange teetampu, shonlak.

²¹Nange hanghepa kahmük yahlak ongnang, tüopa kahmük mepu nang mah mantam mantam Youngwanpawe nangte shaoshilak leam neak-e tüohlak.

²²Youngwanpawe nangte sheampu, dak peipu, püm peakpu, tangta sheampu, hüyange heleipu, peak-e phüppuwe, seanyu peakpuwe ngoine tamlak; hüyange tüolan-e nang mahmantam mantam nangte janglak.

²³“Hüyange nang shangtang me ngohpu wanga shakphan yan ne, hüyange nang phang me ngohpu kahtoknyu-a yan ne menglak.

²⁴“Youngwanpawe nang kahmük me wai-a kahmak hüyange tapla ne meng tamlak; nang manmahtam manmahtam she, wangmepu hatüowa nang tangme yütne tamlak.

²⁵“Youngwanpawe nang wepa lante nang tang me okne tamlak; nange iman phei tüi-e lamnyu ja me peilak, hüpoi nang lamnyu nyit lin-e iman sheshao me nang phetlak; hüyange kahtoknyu ahngchinglan üshei sheshao me nang shao mengpa ne menglak.

²⁶“Nang lipu manga wang awha khongkümpu, hüyange kahtoknyu yinmoklan jingne hahyingne menglak, hüyange iman jange teine ao-o yengohlak.

²⁷Youngwanpawe nang aope-o yemei okpu Egypt tanti phei, maa ngaiye, pümtangta peakpuwe, hüyange mutük ngaine tamlak.

²⁸Youngwanpawe nangte powoopu, mükmüopu, hüyange mokhpuwe ngoitamlak;

²⁹hüyange mükmüopalan-e wangnyak me pom-e kempuke nang wangngai me pom-e kemlak, hüyange nang üyin me moiman yenanglak; hüpoi jinte nangpahi shaoshilak, hüyange nyieye yahne tamphalak, hüyange nang yinlak ao-o yenanglak.

³⁰“Nange naoyha ja khümlak, hüpoi ülao kahta ja-e yahyange yha phei shilak; nange nok welak, hüpoi tüopa me nang yengohlak; nange wuwüngkah hamlak, hüyangpoi tüopa ülick nange aope-o yehahlak.

³¹Nang mahu üpong nang sheshao me toilak, hüpoi nang hatüo mei yehahlak; nang jing gado nang sheshao me yak me lük-e nyieye yahtailak, hüpoi nangte leih yeyelak; nangjing nyee nang wepate phawe teilak, hüpoi nang yinlak jingne ao-o yenanglak.

³²Nang halan hüyange yhalalan eiha kahtate phalak, hüyange nyihlao hipak nange iman yoonge tan-e leihuyapoi ye-ngelak, hüyange nang yak me hango wong yenanglak.

³³Nangjing kahtok me ngaipu pelick wenglick hüyange nange shange linge ngaipu khongkümpu, nange yeshingpu jat japahi hahwinlak, hüyange nangpahi shaoshilak hüyange shu-ngüm phalak;

³⁴tüokaiye nange hanghe ngelakei tüopa ngepuwe nang woowa ne tamphalak.

³⁵Nang yalan mepu shangtang ngoiye, Youngwanpawe nangte yatuh me, hüyange ya me, tanti maa ümeng nang ya me ngaitamlak, hanghepa mepu nang meine ye-ok lak.

³⁶“Youngwanpawe nang hüyange nang tangme nange tüohyangpu ahngpa, nange yejema-a numan pajeiyonglan-e yeshingpu jat tangte shonlak, hüyange tüo me nange ülao kahwang, long hei pee shaoshanlak.

³⁷Hüyange Youngwanpawe nang woiye taipuye kahtalan üshei yo me nang mokhtamlak, deitapukon ja ne, hüyange leppu ja ne menglak.

³⁸“Nange üli üngang kah me deilak, hüpoi üjingha hei wetlak, hangjingne nyaodukh-e hatüo hahkümlak.

³⁹Nange wuwüngkah hamlak, hüyange linglak, hüpoi nange wuwüngti yeyinglak yejema-a ülick yekhailak, hangjingne yonge hatüo hahkümlak.

⁴⁰Nang kahtok khongkümpu me olive pee ngohlak, hüpoi nange nang nying nyingke olive minnga yepholak, hangjingne nangjing olive khongküm yeikümlak.

⁴¹Nang mepu hala yhala jalunlak, hüpoi iman nang jingne yemenglak, hangjingne iman küpnokte ong kümlak,

⁴²Hüyange nangjing pee khongkümpu hüyange nang kahmük mepu ülick khongkümpu me nyaodukh hütte menglak.

⁴³“Numan kahmük me ngohpu yinpalan pahi nang phei shetok shetok she wongnange onglak, hüwante nanga shephang shephang she talak.

⁴⁴Iye nangte üsea phalak, hüpoi nange Ite üsea yepha oklak. I-a üshang ne menglak, hüpoi nanga ünyei ne menglak.

⁴⁵“Tüolan phoiwümpu khongküm nang tangme nang mah-e mantam mantam peikülak, hüyange nangte janglak, hüyange nang kemyüolak, hangjingne Iye nangte ngaowe tampu hüyange I jing linglak ngaokhümlan jonlak jingne Youngwanpa nang Kahwang ngao nange yejai.

⁴⁶Tüolan-a jintepu jingne nang hüyange nang hayimlante füo hüyange yashanyali ja ne ngohlak.

⁴⁷“Hangjingne nang wangman-e tüoyange mongmei sheiye, hüyange mongjang me mongmei phei Youngwanpa nang Kahwang shao yeshan,

⁴⁸tüojingne seanyaowe, yengle-e, pümkeng me, hüyange toinanpu khongkümpuwe toinan-e, Youngwanpawe nang phei tüi-e shonpu wepalan nange shaoshanlak; hüyange nang manmahtam manmahtam, Iye nang üng me yan sheam paitam phalak.

⁴⁹Awlan shok-e tapuke Youngwanpawe nang phei tüi-e üjai mepu, kahtoknyu üküm yekao mepu jat ja woi peilak; tüopa jat ngao nange yeshinglak;

⁵⁰mengshipu sheta nyimpu jat hanghepawe lwngmeite ye-i-yeshelak, yejema-a, jinlate yayeng yehüolak,

⁵¹hüyange nang manmahtam manmahtam Iye nangjing tampu yinmok ühalan, hüyange nang kahtok mepu ülick hahlak; üne-o Iye numan manmahtam manmahtam she nangte tah, wuwüngti, yejema-a olive minnga, nang mahu yejema-a nang nyee ükhong jalunpu yetüohlak.

⁵²Hüyange nange monghümpu daoleh-e meipe latyangpu kahmük khongkümpu toi manta manta she, Iye nang peten khongkümpu neikonlak, hüyange Youngwanpa nang Kahwange phapu nang kahmük khongkümpu me nang pejong khongkümpu me Iye nang neikonlak.

⁵³“Nang wepalan-e neikonyange teishunge pei-e nang shaoshi ne tampu jingne, Youngwanpa nang Kahwange nangte phapu nang naonyoi mepu ngaipu ülick, nang hala yhala mei nange hahlak.

⁵⁴Numan yo me netan aohipa nyaishüm-e hüyange nyoingoh meiye ngoh, Iye yoi jeiheinao hüyange Iye kenpu shekonyute, hüyange towe ngohpu I hayimte hahyingne waowe teihlak;

⁵⁵tüojingne numching neikonpu me wepalan, neikon-e ngohpu hüyange shaoshi ne tam-e shunge tampu jingne, Iye hahne ngohpu Iha mei imante hango yephalak, hangjingne I jingne hango towe yenang.

⁵⁶Numan yo me sheko ao nyaishüm-e hüyange nyoingoh meiye, hüke nyaishümpu hüyange nyimme ta meipuwe yha ya kahtokte lokne yetamhupe ngohnang yhawe yoikenpu netanpate hüyange yha yoi shela hei yhalate hah huwe teihlak;

⁵⁷hüyange yha naonyoi mepu yupu yam, hüyange yhawe puhpu naha hahhulak; hangjingne numching me nang wepalan-e shaoshine tam-e hüyange teishunge neikonpu jingne, sheminlamphe me toinanpu jingne yhawe lowe tüolan-a hahlak.

⁵⁸“Tüopa müktishiwa hüyange nyamlakpa min, Youngwanpa nang Kahwangte nyam-e tüopa laitep me nyan-e ngohpu tüopa ngaokhüm ngao khongkümpu nange linglak minjon she ima-a,

⁵⁹hüwante Youngwanpawe nang shaoshi, nangte hüyange nang mepu jalunpute, shaoshi üyong, hipak laowe yelakpe ngohpu, leam üyong, hüyange laowe yelakpe ngohpu, yashanyali ne mengtamlak.

⁶⁰Hüyange Egypt dak, hanghepa nange nyam-e ngohyangki khongkümpu Iye nang tangte nishe yah peitamlak, hüyange tüolan-e nangte künyange ngohlak.

⁶¹Üne-o nang mah mantam mantam, tüopa ngaokhüm laitep me nyan-e yengohpu, hongha kaitin khongkümpu hüyange leam khongkümpu Youngwanpawe nang tang me yah peitamlak.

⁶²Numan hipak ja me wang me shanhalanke ngohyahpoi, numan shangtoi üjingha hei ngohlak, hangjingne nange Youngwanpa nang Kahwang ngaowüng yejai.

⁶³Youngwanpawe hipak ja me numante meilak hüyange jalun-e ngai tamlak jingne mongmeipu kih-e, hüke Youngwanpawe numan mahtamlak hüyange litamlak jingne mongmeilak; hüyange numan hanghepa kahmük yahlak jingne ongnang, tüopa kahmük mepu numan bheiwinlak.

⁶⁴“Hüyange kahtoknyu jaye üshok mepu jaye üshok ngoiye jat üshei yo me Youngwanpawe numan yantamlak; hüyange nang hüyange numan pajeiyonglan-e yeshingpu ülao kahwang, pee hei long shaoshanlak.

⁶⁵Tüolan jat yo me nang ngaiphaih-e yengohlak, hüyange nang ya toloimeipu yenanglak, hüpoi Youngwanpawe nangte mong paipu, yelei okpu mük, nüoyange nyaitapu yaha yahphalak.

⁶⁶Nang üyin nang sheshao me nüngneiye hei ngohlak, hüyange nange yaning hüyange nyihning nyamlak, hüyange nang üyin jeng hango ütingpa shingpu yenanglak.

⁶⁷Nang mongjang me nyamlakpawe mokhne tamyangpu jingne, hüyange nang mük-e hanghe ngenang tüojingne, napning nange ilak, ‘Ünpong üja she nehoi Kahwange lingetam shih phang!’ Hüyange ünpongme nange ilak, ‘Napning she nehoi Kahwange linge tamshih phang!’

⁶⁸Youngwanpawe nang nishe Egypt te yenglin me woi yene tamphalak, hanghepa lam jeng taowe nangte, nange shaaji tüopa-a nishe ye-ngelak, she i, hüyange tüome numan nying nyingke rhapa hüyange rhanyu ne menge yüolak, hüyange aowe-o numan yeshaklak.”