Read Konyak Naga HINSHEN 29 Bible Online

HINSHEN 29 - Konyak Naga bible

HINSHEN 29

¹Israel kahtalan phei Youngwanpawe Horeb Kahtang me jiengjeppu yahpu tokte kaiye, Youngwanpawe Mosate Moab kahtok me iman phei jiengjeppu linglak jingne ngaowe tampu ngaowa hatüolan ngohnang.

²Hüwante Mosawe Israel khongkümpu nyik, hüyange imante i, “Egypt kahtok me Youngwanpawe Pharaohte, I shaoshanpalan khongkümpu te hüyange iman kahtok khongkümpute lingpu numan-e ngeteki.

³Tokpu üyong, füo hüyange yashanyali üyonglan-a numan-e ngeteki.

⁴Hüpoi tenyih ngoiye Youngwanpawe numante shinglak mongjang, ngelak mük, jailak na yepha.

⁵Wangpeng deli ngoiye Youngwanpawe numan wanwüng jengme woiyangki, numan nyemo ülangne yemeng, hüyange numan yashom-o yemeng.

⁶Numan-e hahlak jingne hahying, yejema-a yinglak jingne wuwüngti yejema-a ülao wongnangpu yinglak yenangpe ngoh, hüpoi numante I-a numan jing Kahwang üja she hüolak jingne Youngwanpawe numante phawe tam.

⁷Hüyange aope numan tüopa kahmükte pei, Heshbon ahngpa Sihon, hüyange Bashan ahngpa Og, teman phei tüi-e wehokte ngai, hüpoi teman-e iman nao tam.

⁸Teman-e iman kahmük yah, hüyange hatüo Reubenlante hüyange Gadlante hüyange Manasseh nokphong tangkhüwpute mothleilak jingne pha.

⁹Tüokhei numan-e lingpu khongkümpu me moiman ngohlak jingne tüopa jiengjeppu ngaolan mongme angtüoh, hüyange tüolan-a lingtüoh.

¹⁰“Tenyih numan khongküm Youngwanpa numan Kahwang sheshao me yongtüoh, numan woipalan, numan nokphonglan, numan lwngmeilan hüyange pangshanlan, hüke Israel kahta khongküm,

¹¹numan mepu nahalan, numan shekonyulan, hüyange numan lakjingme ngohpu yinpa, hanmoipa mepu yenglaipate ngoiye,

¹²hüke Youngwanpa nang Kahwange tenyih nang phei linge ngohpu, Youngwanpa nang Kahwang jiengjeppuwe hüyange Iye janpute nang yuwe oklak,

¹³hüke Iye nangte ngaopu kih-e, hüyange Iye nangjing pajeiyong lan Abrahamte, Isaacte, hüyange Jacobte janpu kih-e, hüke tenyih Iye nang yoi kahta ne mengtamlak, hüyange I nang Kahwang ne menge tamlak.

¹⁴Yejema-a tüopa jiengjeppu hüyange janpu tüowa taowe numan phei hei lingpu ne yeje;

¹⁵hüpoi tenyih teman phei aoyin om yenang, tüolan jingne-o lingnang.

¹⁶“Hangjingne Egypt me teman hangke ngoh hatüo numan-e shing, hüyange hangke numan-e lin-e peipu jat yo me teman-e hangke kai,

¹⁷hüyange iman yo me ngohpu, iman moung, long hei pee hon hei khüm, iman nulakpa numan-e ngeteki.

¹⁸Kentingyah hüke yejema-a numan netan, sheko, noksa kahtalan, yejema-a nokphong yo me monglüppe Youngwanpa teman Kahwang mepu tailak, hüyange tüolan jat kahwang shaoshanlak hüyange numan yo me soihüng ükha ngaipu üjingha ngohlak.

¹⁹“Aope Iye hükih-e jiengjeppu jailakei yoite ota-e ilak, ‘Tao mükshukhulupu mongjang phei kemyapeyoi tao yinpu oklak.’ Tüopake teihpu kaiye nangme ümeng ümei teihpu khongkümpu menge tamlak.

²⁰Youngwanpawe hükihpu kahta te ümeng yewinlak; hüpoi hüwante Youngwanpa mongshih ngaipu hüyange Ite müktakpu tüopa kahta phei tüi-e loonglak, hüyange tüopa laitep me nyan-e ngohpu phoiwümpu khongkümpu Ite shahlak, hüyange I min wangphang mepu Youngwanpawe phutte winlak.

²¹Hüyange tüopa ngaokhüm laitep me nyanpu jiengjeppu phoiwümpulan khongkümpuwe, Israel nokphong khongküm mepu I ümengpate phalak jingne Youngwanpawe I yah ngailak.

²²“Hüwante peikülak jin me numan phei me ngaipu numan hayim, hüyange kahtoknyu üjai mepu peipu yinpawe aope iman-e tüopa kahmük leam, hüyange dak-hei-tinpu hanghepawe Youngwanpawe hatüo dak-e tamnang,

²³hüyange hüke kahtoknyu nopu vünoun hüyange hüm, hüyange hahwinpu, hüke üli jemandeipu hüyange hango yengaipu, yejema-a hatüo me hüng yengaipu kahmük hüpoi Youngwanpawe I mongshih ngaiwante hüyange mengshi wante shok-e tampupa Sodom hüyange Gomorrah, Admah hei Zeboiim menge tampuke, iman-e ngewante,

²⁴hüke jat üshei-e ilak, ‘Hangne Youngwanpawe tüopa kahtok me hüke lingpu? Tüopa kihpu mongshih üyong ngaipute leppu-a hanghe?’

²⁵Hüwante kahtalan-e ilak, ‘Hangjingne Youngwanpawe Egypt kahtok mepu iman woiye ngaiwante Iye iman phei lingpu, Youngwanpa iman pajeiyonglan Kahwang phei jiengjeppu iman-e winne tüoh.

²⁶Iman-e yeshingpu, hüyange hanghepa Iye imante yepha, taiye ülao kahwanglan shaoshan, hüyange imante yopkhüm;

²⁷tüokhei tüopa laitep me nyanpu phoiwümpu khongküm tüopa tangme yah peilak, tüopa kahmük phei tüi-e Youngwanpa mongshih ngai.

²⁸Hüyange Youngwanpa yeonge yemeipe mongshihpu phei mongshih üyong ngaipuwe, Iye iman ngohpu kahmük mepu iman bheiwinyange hengching kahmükte iman shüppe tam, hüyange hüke iman tenyih ngoiye ngohnang.’

²⁹“Youngwanpa teman Kahwang jing lowe angpu ütam ngohnang, hüpoi teman-e tüopa ngaokhüm ngaolan khongkümpu linglak nanjingne ütahte ngaiye ngohpulan pa-a jintepu jingne teman hüyange teman hayimlan jing ngohnang.”