Read Konyak Naga HINSHEN 3 Bible Online

HINSHEN 3 - Konyak Naga bible

HINSHEN 3

¹“Tüophei me teman-e tüm tayange Bashan lam yete ong, hüyange Bashan ahngpa Og, I hüyange I kahta khongkümpu teman phei tüi-e Edrei me wehok shapju te ngai.

²Hüpoi Youngwanpawe üte i, ‘Ite tahnyam, hangjingne I hüyange I kahtalan khongkümpu, hüyange I kahmük nang yak me Taowe phünne phayangki. Heshbon me ngohpu Amor ahngpa Sihonte nange lingpu kih-e nange Ite lingtam tüoh.’

³“Tüokhei Youngwanpa teman Kahwange Bashan ahngpa Og, hüyange I kahta khongkümpu teman yak me phünne pha; hüyange ja nehoi towe ye ang tüohpe teman-e I mahtam.

⁴Hüyange tüopa hipak me I jing chingnyu khongkümpu teman-e yah; teman-e iman mepu yeyahpu chingnyu ja nehoi yenangpe ngoh; chingnyu dewok, Bashan me Og ahngching Argob kahhoi khongkümpu yah.

⁵Chingnyu khongkümpuwa shedaopu jantpenyu, petenlan, hüyange pejong wenao-e neikon-e meipe latyange ngohpu chingnyu shaha ne ngohyangki. Chingtuk penyu yenangpu chingshao lan-o maawe ngoh.

⁶Hüyange Heshbon ahngpa Sihonte teman-e lingpu kih-e, kahta ngohpu chingnyu lili me, netan, sheko, hüyange nahalan omme teman-e iman jaoshe-e mahtam.

⁷Hüpoi mahulan khongkümpu hüyange chingnyu me chinghah wante yahpu toinan, teman jingne yah ang.

⁸“Tüokhei tüopa hipak me Jordan kaiyange ngohpu Amorlan ahngpa ni yak mepu, Arnon kahjee mepu Hermon kahtang ngoiye, teman-e kahmük-a yah;

⁹(tüopa Hermonte Sidonlan-e Sirion she nyik, hüyange Amorlan-e Senir she nyik.)

¹⁰Kahnyüo chingnyu khongkümpu Gilead khongkümpu, hüyange Bashan khongkümpu, Salecah hüyange Edrei ngoiye, Bashan me Og ahngching me chingnyulan teman-e yah.”

¹¹Rephaim me ükümpa üjeam ne ahngpa Og jengyangki. I shinleng-a yan phei lingpu hüyange lüopute feet pen me lüm phei nyei-e hüyange khaopute feet wok. Tüopa-a tenyih ngoiye Ammorlan chingnyu Rabbah me ngohpu ngenang.

¹²“Aope tüopa kahmük teman-e yah, Arnon kahjee ü-o me ngohpu Aroer mepu, hüyange Gilead kahtang nyoi tangkhüw, hüyange tüopa chingnyulan taowe Reubenlan hüyange Gadlante pha;

¹³hüyange Gilead ülaolan hüyange Og ahngching, Bashan khongkümpu taowe Manasseh nokphong tangkhüwpute pha; hatüo Argob kahhoi khongkümpu, hüke Bashan khongkümpu. (Tüopa Bashan khongkümpute Rephaim kahmük she nyik;

¹⁴Manasseh üha Jair Argob kahhoi khongkümpu, Geshur hei Maacath yikeng ngoiye yah; hüyange Bashante I yoi minlei tenyih ngoiye Havvoth Jair she nyiknang.)

¹⁵Hüyange Machir puhulante taowe Gilead pha.

¹⁶Hüyange Reubenlan hüyange Gadlante Gilead mepu Arnon yengyin ngoiye, kahjee hotan hüyange tüopa yikeng, Amonlan yikeng, Jabbok yengyin ngoiye taowe pha;

¹⁷Üne-o Arbah hüyange Jordan hüyange tüopa yikeng hüyange Kinnereth mepu heongye Pisgah kah yashong me Arabah yengching, hatüowa hüm yengching ngoiye pha.

¹⁸“Hüyange tüopa hipak me taowe numante ngaophawe i, ‘Youngwanpa numan Kahwange tüopa kahmük numan-e mothleilak pha; numan wongnangpalan khongküm, Israel hayim numan jeihei naolan sheshao me ngou hei yang jonyange linne tailak.

¹⁹Hüpoi numante taowe phapu chingnyu me numan jing shekonyulan, hashih nahalan, hüyange numan-e tampu yinmok ngohlak (hangjingne numan tampu yinmok üngang ngohnang she taowe shing.)

²⁰Hüke Youngwanpawe numan jeihei naolante toloimeipu manpha manpha, hüyange üne-o Youngwanpa numan Kahwange Jordan kaiyange jaye me, numante phapuke, iman te phapu kahmük me iman manngoh manngoh; hüwante taowe numante phapu, numan yoi yoi me nangpu tang te numan kahta lili leih yelak.’

²¹“Tüophei me taowe Joshua te ngaowe i, ‘Tüolan ahngpa nite Youngwanpa numan Kahwange lingpu khongkümpu nang mük-e ngeteki; hüke nange kaiye tailak ahngchinglan khongkümpute Youngwanpawe linglak.

²²Imante nyam-e tahteih, hangjingne numan jingne hoklakpa-a Youngwanpa numan Kahwang ngohnang.’”

²³“Tüo hipak me-o taowe Youngwanpate yop dowe i,

²⁴‘O Okkeshangpupa Youngwanpa, nange nang shaoshanpa te nang yonge lüopu hüyange nang wong üyong hüone wangteki; hangjingne wangme hüyange kahtok me Kahwang hanghepawe nang kih-e hatüoke toi hüyange toi üyong lingpu oklak?

²⁵Taowe nangte yoppe tongnang, Jordan kaiye janyekao me kahmük ümei, shemei yaomapu tüopa kahtang ümei, hüyange Lebanon, leilak jingne tao taine tam pha.’

²⁶“Hüpoi numan jengme Youngwanpawe üte mongshih ngai, hüyange ü-ngao yeyah; hüyange Youngwanpawe üte i, ‘Halan ngaotüoh, tüopa jeng shaaji üte tah i!

²⁷Pisgah kahmüoh ütangte ongtüoh, hüyange nang mükwemme henyip yete, hüyange apyete hüyange heyete, hüyange heong yete hüyange nang mük-e leitüoh; hangjingne nang tüopa Jordan kaiye yetailak.

²⁸Hüyange Joshua te toishao phünne phatüoh, Ite henge tamtüoh, hüyange I wongnangne tamtüoh; hangjingne Iye tüolan kahta kaiye woiye teilak, hüyange nange ngepu kahmük-a Iye imante yahne tamtüoh.’

²⁹“Tüokhei teman Bethpeor phei janhüowe kahjee me ngoh.”