Read Konyak Naga HINSHEN 30 Bible Online

HINSHEN 30 - Konyak Naga bible

HINSHEN 30

¹“Aope tüolan khongküm numante ngailakei, moiman jeyah phoiwümpu jeyah lelak jingne taowe numan sheshao me angyangki; hüyange ümpeyekaote Youngwanpa nang Kahwange numan jange tei, tüolan jat khongküm yo me numan ngohyange ngaikülak;

²hüyange numan hüyange numan hayimlan, Youngwanpa nang Kahwang tangte monglüp-e yema-a, hüyange numan mongjang üsheiye hüyange yaha üsheiye tenyih taowe numante ngaowe tampu I ngaowüng jailakei she ima-a,

³hüwante Youngwanpa nang Kahwange numan ümekenye me yan-e tam-e ngoh, jat khongkümpu mepu nishe numan nyik-e jem-e, numante shüpshe teih-e, Youngwanpa nang Kahwange numan yatuhshao linge tamlak.

⁴Numan winne ngohpu ütam wangjeng üküm yekao me taiye ngohyapoi, tüomepu Youngwanpa nang Kahwange numan woijemlak, hüyange tüomepu Iye numan woipeilak.

⁵Youngwanpa nang Kahwange numan pajeiyonglan-e yahpu kahmükte numan woipeilak hüyange hatüo numan-e yahlak; hüyange Iye numan moiman tamlak hüyange iman jalunpu phei shenyei she numan jalunlak.

⁶“Hüyange numan üyin angtamlak jingne, Youngwanpa nang Kahwange nang mongjang üsheiye hüyange nang yaha üsheiye kenne tamlak jingne, Youngwanpa nang Kahwange nang hüyange nang hayimlante mongjang üsho khüplak.

⁷Hüyange Youngwanpa nang Kahwange, tüopa phoiwümpu khongkümpu, nang wepalan, hüyange aoyinne nangte nu hüyange shaoshine tam, imante kitamlak.

⁸Hüwante numan-e lüppe yelak hüyange Youngwanpa ngaowüng jailak hüyange tenyih taowe numante phapu Iye ngaowetampu khongkümpu jonlak.

⁹Hüyange Youngwanpa nang Kahwange numan-e lingpu khongkümpu me moiman tamlak, numan hayimlan me, numan-e tampu yinmok jalunpu me, hüyange numan kahtok mepu ngaipu me; hangjingne numan jing pajeiyonglante phapuke, nishe Youngwanpawe numante lahnyikpu me mongmeilak,

¹⁰numan-e hi ngaokhüm laitep me nyan-e ngohpuke, I ngaokhüm hüyange linglak ngaokhümlan jon-e numan-e Youngwanpa nang Kahwang ngaowüng jaiye ngohma-a, hüyange Youngwanpa nang Kahwang tangte nang mongjang üsheiye hüyange yaha üsheiye lüppe yema-a moimanlak.”

¹¹“Hangjingne tüopa ngaowe tampu hanghepa taowe tenyih numante phanang, hatüo numan jingne meiyange wanpu ne yeje, ye-i-ma-a numan-e yeyüolak ne-o yeje.

¹²‘Hatüo toman-e linglak jingne, hüyange hatüo toman tangte yahpeiye, tomante hatüo jaitamlak jingne aowe toman jingne wangte onglak?’ she numan-e ilak ne, hatüo wang me yenang.

¹³Yejema-a, toman-e hatüo linglak jingne, aowe yengching kaiye toman jingne taiye hatüo toman tangte yah peiye, tomante jaine tamlak shi? she nange ilak ne, hatüo yengching kaiye taiye yenang.

¹⁴Hüpoi, nange linglak jingne, hatüo nang phei yeonge owe, nang ju me, hüyange nang mongjang me ngoh nang.

¹⁵“Leihuyah, tenyih taowe nang sheshao me üyin hüyange meipu, lipu hüyange ümeng angtam nang.

¹⁶Tenyih taowe numante Youngwanpa nang Kahwange ngaowe tampu hatüo, Youngwanpa nang Kahwangte kenpuwe, I lamnyu me kempuwe, Iye ngaowetampu hüyange linglak ngaokhüm hüyange wanglam ngaokhüm jaiye jonlak she ima-a, hüwante nang üyin ngohlak hüyange jalunlak, hüyange numan-e yahne onge ngohpu kahmük me Youngwanpa nang Kahwange numan moimanlak.

¹⁷Hüpoi numan mongjang lüppe taiye, hüyange mong yepha, yinhulan kahwang te khümlak, hüyange iman shaoshan-e leihyema-a,

¹⁸taowe tenyih numante inang, numan-e yahlak jingne Jordan kaiye ongpu kahmük me hipak laowe yengohpe, ütingme numan mahlak.

¹⁹Numan tangme üyin hüyange lipu moiman hüyange phoiwümpu nipa lelak jingne angtam teki she numan phei tüi-e tenyih saki ne mengne taowe wang hei kahtokte nyiknang; tüokhei hüke nang hüyange nang hayim üyin ngoh oklak jingne üyin leyah.

²⁰Youngwanpa nang Kahwangte kenlak, I ngaowüng jailak, hüyange Ite kenyange ngohlak jingne; hangjingne I-a nang üyin hüyange nang üyinjin nyih hipak ngoh nang; hüke Youngwanpa, nangjing pajeiyonglan te, Abrahamte, Isaacte hüyange Jacobte, imante phalak jingne janpu kahmük me nang ngohlak.”