Read Konyak Naga HINSHEN 31 Bible Online

HINSHEN 31 - Konyak Naga bible

HINSHEN 31

¹Tüophei me, Mosa ngaitai hüyange Israellan khongkümpute tüolan ngao yelakpe ngao.

²Hüyange Iye imante i, “Tenyih tao wangpeng gho ja phei me da ngohnang; shaaji tao taitai yeye she kem-e yonglak ye-ok, hüyange Youngwanpawe üte i, ‘Nange tüopa Jordan kaiye yetailak yang.’

³Youngwanpa nang Kahwang nang sheshao me tailak; Iye tüolan jat nang sheshao mepu mah tamlak, hüyange nange tüolan-a yahlak; hüyange Youngwanpawe ipuke, Joshua numan woipa ne mengyange numan shao me kemlak.

⁴Youngwanpawe Sihonte hüyange Amorlan ahngpa Og te, hüyange iman kahmükte lingpuke, iman te linglak; Iye iman mahne tam.

⁵Youngwanpawe iman numan te phünne phalak, hüyange ngaowe tampu khongkümpu kih-e taowe numante ngaopuke numan-e imante linglak.

⁶Wongnang yah, hüyange mongyonge teihyah, nyam-e tahteih, hüyange imante mokh-e tah ngoh; hangjingne Youngwanpa nang Kahwang, nang phei taipupa-a I ngohnang, Iye nang yetüohlak, yejema-a winne ye-anglak.”

⁷Hüwante Mosawe Joshua nyik, hüyange Israellan khongkümpu sheshao me i, “Wongnangyah, hüyange mongyonge teihyah, hangjingne tüopa kahtalan phei, Youngwanpawe iman pajeiyonglan te phalak jingne janpu kahtokte nang onglak hüyange nange imante hatüo mothlei ne tamlak.

⁸Nang shaote taipupa-a I Youngwanpa ngohnang, I nang phei ngohlak; Iye nang winne yetüohlak yejema-a ye-angtüohlak; tahnyam, yejema-a mokh tahteih.”

⁹Tüokhei Mosawe tüopa Kahwangpa ngaokhümlan nyan, hüyange Iye hatüo Youngwanpa jiengjeppu ghonu paipalan Levi hayim ngengpalan, hüyange Israel lwngmei khongkümpu te phünne pha.

¹⁰Hüyange Mosawe imante ngaophawe i: “Wangpeng nyit lep i-e üküm yeme pheeisea lanne shüm-e tampu wangpeng hipak ityange, peamsheam mo me,

¹¹aope Israellan khongküm Youngwanpa nang Kahwang sheshao me, Iye lepu nyoi me jemlakei, nange Israellan khongküm sheshao me, iman-e jaiye tüopa ngaokhüm ilak yang.

¹²Kahtalan jemne tamtüoh, netanlan, shekolan, hashih nahalan, hüyange numan yo me ngohpu yinpalan, hüke iman-e jailak, hüyange shinge yahlak, hüyange numan Kahwangte nyamlak, hüyange tüopa ngaokhüm ngao khongkümpu jonne linglak;

¹³hüyange hatüo jeng yeshingpu iman hayimlan-e hatüo jailak, hüyange Jordan kaiyange ümpeyete numan ongnang, tüopa me ngohpute ngoi she, Youngwanpa numan Kahwangte nyampu ngohlak jingne jemtüoh.”

¹⁴Youngwanpawe Mosate i, “Nang lilak hipak owe peinang. Joshuate nyiktüoh, hüyange Taowe I phünpha-e jaotamlak.” Hüyange Mosa hei Joshua ni khümjing nyenok te ong; hüyange imni moini khümjing nyenok me yong.

¹⁵Hüwante khümjing nyenok me wangphom shongnyu me Youngwanpa ngai, hüyange wangphom shongnyuwa nyenok nokshaome yong.

¹⁶Hüyange Youngwanpawe Mosate i, “Leihuyah, nanga shaaji nang pajeiyonglan phei shilak; hüyange tüopa Israel kahtalan ümeken me iman ngohlak jingne ongnang, tüopa kahmük mepu yinhulan phei iman Kahwang pheite nuweshak-e taiye yonglak, hüyange Taowa pewinlak, hüyange jiengjeppu hanghepa Taowe iman phei ling hatüo menglak.

¹⁷Hüwante tüopa nyih hipak me ümongshihpu iman phei tüi-e ngailak, hüyange Taowe iman winne tüohlak, hüyange Taowe iman mepu ü-sheta lolak, hüyange iman lüngemahlak, hüyange ümengpa hei shaoshi maapu iman tangte peilak; hüwante tüopa nyih me iman-e ilak, ‘Teman Kahwang teman phei yengohpu jingne tüolan shanghah shaoshi ümeng teman tangte peipu yejepu a?’

¹⁸Iman-e ümeng khongkümpu linge yinhulan kahwang tangte leihyepu jingne, Tao ütingme tüopa nyih me ü-sheta lowe mahlak.

¹⁹“Tüokhei sha-a tüopa hem nyantüoh hüyange Israel hayimlante nyüotüoh, hüke Israel hayim phei tüi-e tüopa hem üjingne saki ja ne menglak jingne iman ju me tüopa-a hintam tüoh.

²⁰Hangjingne aope düamyeng hüyange zahtai jelo yünne ngohpu, iman pajeiyonglante janpu kahmük te Taowe iman woiye peilakeih, hüyange iman sea mohlakei, hüyange nütlakei, hüwante iman-e ülao kahwang tangte leihyelak, hüyange iman shaoshanlak, hüyange üte phoilak, hüyange ü-phei jiengjeppulan menglak.

²¹Hüyange aope shaoshi hüyange ümeng ülam maawe iman tangte peilakeih tüopa hem-e iman sheshao me saki ja leye phalak, hangjingne iman hayimlan-e tüopa-a yepelak, hangjingne Taowe janpu kahtokte iman woiye manpei pemuh Taowe iman wongpong hanghe ne menglak Taowe shinge ngoh nang.”

²²Tüokhei Mosawe tüonyih muh tüopa hem nyan, hüyange Israel kahtalante tüopa nyüo.

²³Hüyange Nun üha Joshua te toishao phünne phawe Youngwanpawe i, “Wongnang yah hüyange mongongyah, hangjingne Taowe imante janpu kahtokte Israel kahtalan nange woipeilak, hüyange Tao nang phei ngohlak.”

²⁴Aope Mosawe üküm ngoiye tüopa ngaokhüm ngao laitep ja me nyan-e sho,

²⁵Mosawe Youngwanpa ngaokhüm ghonu paipalan Levilante ngao phawe i,

²⁶“Tüopa ngaokhüm laitep yahtüoh, hüyange hüke Youngwanpa numan Kahwang ngaokhüm ghonu shongme tüome numan phei tüi-e sakine menglak jingne angtüoh.

²⁷Hangjingne numan-e hokwe yongpu hüyange numan mükshukhulupu taowe shing; Leihuyah, tenyih tao numan phei üyin me ngohwante nehoi, numan-e Youngwanpa wanglam phei hokwe yong, hüyange tao liteiye hangke ünyei ngailak!

²⁸Numan nokphong lwngmeilan, hüyange wanglam lampalan khongkümpu, iman na me tüolan ngao ngaolak, hüyange iman phei tüi-e wang hei kahtok saki ne menglak, ü-shongte jemne tamtüoh.

²⁹Hangjingne tao ü-phei me taowe numante ngaowe tampu lamnyu mepu numan leih-e ye, numan nying nyingke yeonge yemei lak she taowe shingnang; hüyange pheima-a ümengpa numante peingoilak; hangjingne numan yaktoi kaiye I mongshih ngaine tam-e, Youngwanpa sheshao me hanghe ümengpa hatüo numan-e linglak.”

³⁰Hüyange Israellan khongkümpu jem-e ngohpu na sha khongkümpuwe jaiye, Mosawe tüopa hem ngao üküm manngoi manngoi lok-e ngao: