Read Konyak Naga HINSHEN 32 Bible Online

HINSHEN 32 - Konyak Naga bible

HINSHEN 32

¹“O Wangdanglan, na shongyah, hüyange taowe ngaopha ning; hüyange kahtoknyuwe üju mepu ngaolan jaine tamtüoh.

²Taowe nyüopu ü-ngaolan-a waiyeng kih-e sheh ne tamtüoh hüyange ü-ngao-a nyim kih-e yüt-e tamtüoh. Hüng üyoi yo me wai yütpuke hüyange waiya yütpu, phümha üyoi yo me hütpuke.

³“Hangjingne taowe Youngwanpa min ponge tamning, hüyange Ijing kahtalan-e I kheyongpu jeng ilak.

⁴“Youngwanpa-a longnyu, I toishao-a wang ngoinang, hangjingne I lamnyu khongkümpu khakshuwe; Monghümlak hüyange ümeng yenangpu Kahwang I ngaoting hüyange ütingpa ngohnang.

⁵Hüpoi I jing angsa hayimlan-e Ite lüplowe jon, ühak yekohpu hei nyongküleihpu jin.

⁶O nang üngapa hüyange juteih yenangpu kahtalan, Numan-e Youngwanpate hüke jonnang kü a? I-a numan üpa numan lingengaipa yejepu a? Aowe numan ling hüyange jat ja ne jongne tam ei?

⁷Üshongpu nyih hipak teih tüoyah; jin maawe linpu teihtüo yah, nangpate tongtüoh Iye nangte ikülak, numan jing lwngmeilante, hüyange iman-e nangte iphalak

⁸Aope Ütahpawe jatlante mothleilak pha, aope Iye kahta ühalan yo me teitampu ling, Iye Israel hayim shangtoi phei phinne kahwang japong yikeng tüoh.

⁹Hüpoi Youngwanpa jing meitam-a yoi kahtalan ngohnang, I mothleilak tampu-a Jacob huhayimlan ngohnang.

¹⁰“Iye I-a wanwüng jengme hüyange taihuwe waowe ngohpu phaome tüo; Iye I-a neikon-e yah, I jingne paowetük, Iye yoi mükshao me yoi mükjange yomme ang.

¹¹Awlan-e ülüp mepu yoi ühalante powe saa-ngailak nyüopuke, Iye yoi yangteng saayange iman yah, hüyange yoi wangshüm phangme tükke ang.

¹²Youngwanpa shahawe I woi, yinhulan kahwang I phei yenangpe ngoh.

¹³Iye Ite kahtok mepu ütahpa nyoijinglan me shotne tam, hüyange Ite kahtok mepu hanghe ngai hahne tam; Iye Ite longnyu mepu zahtai jelo, hüyange longphan kahtok mepu olive minnga hüpne tam;

¹⁴Mahu hei younlan mepu, yaoyüp hei düamyeng phei, hüyange shenütpupa youn hei nyee phei; Bashan mahu hei younlan, shemeipupa wheat üdi phei, wuwünglick iy mepu shemeipupa wuwüngti nange ying!

¹⁵“Jacob seamoh-e hah; Jeshurun mongyim, mei-e nüt-e jong. Nang nüt-e jong, seatük, hüyange moh! Iye I lingpupa Kahwang angetüoh, hüyange I yinyepa longnyu te ye-i-yeshe.

¹⁶Iman-e kahheng kahwange Youngwanpa müktak ne tam; nunushepuwe iman-e I mongmeng ne tam;

¹⁷Iman-e kahwang ne yejepu ünu yahalante toidopu pha, iman-e yeshingpu kahwang ü-o-we peipu üla kahwang, numan pajeiyong lan-e yenyampu kahwang.

¹⁸Numan-e numan puhpaipu longnyu numan-e win-e tüoh, numan puhtampu Kahwang numan-e pemei.

¹⁹“Youngwanpawe tüopa nge, hüyange iman yeyahpe wintüoh; hangjingne I jing hala yhalalan-e I mongshih ngaine tam.

²⁰Iye i, ‘Iman mepu Ü-sheta lolak, iman üküm hanghene menglakei Taowe leilak; hangjingne iman yeonge ngao yejaipu hüyange üngei jin, monghümlak yenangpu kahtalan ngohnang.

²¹Hanghepa kahwangne yeje tüopawe iman-e Üte müktaklak ne ngaine tam. iman jajang japu toishao lan-e Tao mongshih ngaine tam. Tüokhei aoyin jat ja ne yeje, iman phei Taowe müktak ne tamlak; Taowe üpong tüowe ye-okpu jat ja phei iman mongshih ngaine tamlak.

²²Hangjingne ü-mongshih ngaipuwe vün loonge shelupupa kahsa ngoiye hah-e, hüyange kahtoknyu hüyange tüopa me ngaipu lünge, hüyange kahtang nokjing me vün ngaiye ngohnang.

²³“ ‘Taowe iman tangme shaoshipu ümeng pei-e tamlak, ü-lahhan iman tangme shoktamlak.

²⁴Seanyao-yenglepu me nankeng winlak, vünloongme jakke shukümlak, yemeipu daktin me khah-e pongtamlak. Kahko me leh kempu soihüng pheipu pulan hei yinmok ümenglan fa Taowe iman tangte shonlak.

²⁵Chingyang kome yang phei lipu, hüyange noksa me mokhlakpa ngohlak; naoshe hüyange wangngoipu naoyha moini, düam hüppu naotak hüyange shangshao tephei mahtamlak.

²⁶“Taowe iman üjai me yantam yange, kahta yo me Taowe iman yeteih tüotamlak,” she Taowe i;

²⁷hüpoi iman wepalan-e otalak, imante ye-i-yeshe palan-e püohpinne üngwünlak; “teman yak-e okpu üyong ngeteki, tüopa toishao hango Youngwanpawe lingpu yeje, she otapu phei ngaone taowe yetamlak.” ’

²⁸“Iman-a juteih yenangpu jat ja ngohnang, hüyange imante shinge yah okpu yenang.

²⁹Iman konnange, iman-e tüopa shing ok hah shepu; üküm hangke nangkülak iman-e nge-ok-hah shepu!

³⁰Iman longnyuwe iman yüo-e yetam shih ma-a, Youngwanpawe iman yepha shih ma-a, Hangke i-e kahta jawe haja ja te jang, yejema-a kahta ni-e haja pen yan ne tam!

³¹Hangjingne imanjing longnyu-a teman jing longnyu kih-e yeje she, hüke teman wepalan-e-o iman nying nyingke shing ngohnang.

³²Hangjingne iman wuwüngwu Sodom mepu, hüyange Gomorrah pesha mepu pei; iman wuwüngwu ükha wu ngohnang, iman ülick-a ükhah ngohnang.

³³Iman wuwüngti-a pu üli ükai, hüyange awjangpu soihüng wongnangpuke ngohnang.

³⁴“Hatüowa ü-phei ü-bungme mongjüonge yo-e yenangpu a?

³⁵Phuh-hahlak hei shaoshi phalak-a üjing; hanghe hipak me iman ya leaklakeih, hangjingne iman mah shümlak nyih-a ü-o me ngohnang, iman mahlak nyih yeong mam-e peinang.

³⁶Aope Youngwanpa iman üngan taiteki she ngelakei, hüyange iman ja nehoi rha ne yejema-a bumei yafün me-o yengohlakei, yoi shaoshanpalan jingne shüpsheye teih-e Iye iman ngao phünlak.

³⁷Hüwante Youngwanpawe yoi kahtalante tonglak, ‘Iman loching longnyu iman kahwang iman ümeken me ngoh nangki?

³⁸Numan-e toidopu shemeipupa üyaowe iman uhyinge ang, hüyange imante yinglak jingne wuwüngti pha, sha-a iman peiye numante jamne tamtüoh, numan yintamne iman phette peine tamtüoh!

³⁹“ ‘Ü-tokte ülao kahwang ao-o yenang, Taowa I ngohnang, hüke Tao üja, she sha-a shingyah; Taowe toinang, hüyange Taowe üyin ne mengtam nang; Taowe mako shatam nang, hüyange Taowe meitam nang; hüyange ü-yak mepu nyie-e yahlak ao-o yenang.

⁴⁰Tao üting tingha me üyin Kahwang ne mengtepuwe, Taowe ü-yak wangyete hongnang hüyange Taowe jiengnang,

⁴¹hüke Taowe phihlangpu ü-yanglow yelak hüyange ngaotingpa-a lingya leilak. Taowe ü-wepalan tangme phuh hahlak, hüyange aoyinne üte nu imante shaoshi phalak.

⁴²Taowe ü-lah-han-a iy phei jok ne tamlak, hüyange ü-yanglowe mei lüngkümlak; Wepalan üshang hei üjupalan, phowe küopu hei lange tampalan iy.’

⁴³“Jat hei lilan, numan-e Youngwanpa jing kahtalan phei minyong tüoh; aoyinne iman toi Iye khongkümpute shaoshi ne tamnang. Itepu wepalante Iye phuh hahnang hüyange I jing kahtalan-e lingpu ünu Iye wintam nang.”

⁴⁴Israel kahtalan-e tüopa jai yahlak jingne Mosa hei Nun üha Joshua niye tüopa hem lok-e ngao yangki.

⁴⁵Aope Mosawe tüolan ngao khongkümpu Israel üshei tangte ngaopu sho,

⁴⁶Iye imante i, “Tenyih numante kentinglak ngaopu, tüopa Kahwangpa ngaokhüm ngao khongkümpu linge jonlak numan hayimlante ngaokhüm phalak jingne hatüo khongkümpu numan mongme angtüoh.

⁴⁷Hangjingne hatüo numan jingne jajang japu ükeng ngao ne yeje; hüpoi hatüowa numan üyin ngohnang, hüyange tüo kaiye, numan-e Jordan kaiye taiye yahne ngohpu kahmük me numan jin hipak laowe ngohlak.”

⁴⁸Tüo nyih muh Youngwanpawe Mosate i,

⁴⁹“Moab kahtok me, Jerikho yekaote lüppe ngohpu, tüopa Abarim kahmüoh, Nebo kahtüote nang ongtüoh; hüyange Kanan kahtok hanghepa Taowe Israel hayimlan-e yahlak jingne phanang, tüopate leiyah.

⁵⁰Hüyange nangjei Aaron hangke Hor kahmüoh me li, hüyange I yoi pheipulan phei om, hüke nang ongpu kahtüo me nango lilak hüyange nang phei pulan phei omtüoh.

⁵¹Hangjingne Zin phaonyu jongme, Kadesh me Meribah yeng me, Israel hayimlan yo me nangniye ünu om; hangjingne Israel hayim yo me nangniye tao jaowe shawe ye-ang.

⁵²Hüke nang sheshao me kahmük-a nange ngepu oklak, hüpoi Taowe Israel hayimlante phapu kahtokte nanga yengoi oklak.”