Read Konyak Naga HINSHEN 33 Bible Online

HINSHEN 33 - Konyak Naga bible

HINSHEN 33

¹Hatüowa Kahwang kahta Mosawe, I manlipe Israel kahtalante moiman tampu moiman ngohnang.

²Iye i: Youngwanpa Sinai kahtang mepu yu; Edom tangme I wanghe kih-e ong, hüyange yoi kahtalante Paran kahtang mepu hüowe tam. I phei wangdang shongmokpalan haja pen ngoh, I yakjah yeme vünloong üyong jonyange ngoh yangki.

³Ütingme aohi-e kahtalante ken hatüo-a nang; Üjaolan khongkümpuwa nang yak me. Nang yashong me iman khongkümpuwe khuh ta nang hüyange nang mepu winshaipu tüo.

⁴Mosawe tomante phapu Ngaokhüm toman-e jonnang, Jacob mepu jat jingne toinyu mothlei üyong ngohnang.

⁵Aope iman nokphong lan hüyange woipalan khongkümpu jamshe shüppe jem, Jeshurun me yoi jing Israel kahtalan tangme Youngwanpa ahngne meng.

⁶Reuben nokphong: “Iman kahtalan lomyapoi, aope-o shümme tahmah tam.”

⁷Judah nokphong jeng me Iye i: “Youngwanpa, jamlak yamme Judah-e üngwünpute jaitam shih; Ülao nokphonglan phei iman nishe shüppe sha ne tamtüoh. Youngwanpa iman jingne hok-e tamshih, Hüyange imanjing wepalan jingne imante jamtüoh.”

⁸Levi nokphong jengme Iye i: “Nang, Youngwanpa, nange mongpu Urim hüyange Thummim kaiye ütahte ngai shih, monghümpu nang shaoshanpalan Levilan kaiye; Nange imante Massah me tokpu pha, hüyange Meribah yengme iman-a üting me ngoh she hüo,

⁹Iman-e nangte sheyongpupa iyeshepu hüo, nyupalan phei, jeiheinaolan phei, yejema-a hayimlan phei shenyei she. Iman-e nang ngaokenglan jai-e jon, hüyange nange jiengjeppute mongpha.

¹⁰Iman-e nangjing hayimlante nang ngaokhümlan jonlak jingne nyüolak; Iman-e nangjing wümjong tangme sünyet jakke toidopulan do.

¹¹Youngwanpa, iman nokphong wong shenang shenang she jonglak jingne jamshih; Iman-e hanghe linglakei tüopa me moiman shih. Iman jing wepalan khongkümpu mahtam tüoh, iman shaaji nishe üyong oklak ne iman shieng lüppe tamtüoh.”

¹²Benjamin nokphong jeng me Iye i: “Youngwanpawe kenpu hüyange yinne angpu nokphonga tüopa ngohnang; Nyihlao hipak Iye iman yomme ngohnang; Hüyange iman yo me Iye toi linge ngohnang.”

¹³Joseph nokphong jeng me Iye i: “Youngwanpawe imanjing kahtok-a wai yeng yütpuwe, hüyange kahtok ümong mepu ngaipu yenge moiman shih.

¹⁴Wanghe üte mepu toinyu pelick wenglick-e, hüyange juwan lep iye ngaipu ngüt-shappu ülicklan phei moiman shih.

¹⁵Üshongpe muh ngohpu kahtang me ngaipu shemeipupa ülick-e, hüyange jinte ngohpu kahkeng toinyu nanha phei maatam shih.

¹⁶Kahtoknyu mepu shemeipupa hünghao phei hüyange tüolan wangngoipuwe, hüyange vün shongnyu me aowe ngaowe tam, I moiman ü-oun jawe; Tüopa moiman-a Joseph nokphongte peitam shih. I jeihei naolan yo me I-a woipa ne ngoh yangki.

¹⁷I-a üwangne puhpu mahu üpong kih-e ngohnang, pongwan jing ü wonglan phei I ngohnang, tüolan phei Iye kahtoknyulan üshuk te ngoipu jatlante shunang. Hüke Ephraim haja penlante, hüke Manasseh haja maapute.”

¹⁸Zebulun jeng me Iye i: “Mongmeitüoh, Zebulun, nang ong peipu me; Hüyange Issakhar, nangjing nyenok phang me!

¹⁹Iman-e kahtalante imanjing phaotang kahmük me nyik, tüoken me iman-e üjaopa toidopu pha; Iman-e imanjing toinyu nanha yengching mepu hüyange yengnah paowe ngohpu pheih mepu tüo.”

²⁰Gad nokphong jeng me Iye i: “Aoheye Gad yikeng khaowe tamnang minyong tüoh. Gad-a yengkong mailang kih-e tanne, Iye yaksea hei shangso khok-e hitte tamlak!

²¹Iya yoi jingne shemeipupa kahmük yah; Woipane menglak meitam-a imante itte tamyange ngoh. Aope kahta woipalan jamshe shüppe jem, Iye Youngwanpa ngaokeng hüyange ngaokhümlan, hüyange Israel jingne ngaophün phapu jaiye yah.”

²²Dan nokphong jeng me Iye i: “Dan-a yengkong mailang üha ngohnang; I Bashan mepu lüowe ngaiyangki.”

²³Naphtali nokphong jeng me Iye i: “O Naphtali, Youngwanpa mong toloi meipu moiman ü-oun ja ngohnang; Imanjing kahmük-a heyekao me yengchingha ngoiye ngohlak.”

²⁴Asher nokphong jeng me Iye i: “Asher-a ülao nokphonglan phei shenyei she moimanpupa. I jeihei naolan yo me yah okpupa ne mengtüoh, hüyange I jing kahmük-a olive pee phei hakpa ne mengtam shih.

²⁵Nang ngohpu chingshao-a yanpenyu peten phei meipe latyange ngohtam shih, hüyange nang jinte yinne ngohne tamshih.”

²⁶“O Jeshurun, numan jing Kahwang kihpu ülao kahwang ao-o yenang, wang ütangye kaiye yashanlakpa ne kem-e okpu, numante jamlak jingne wangphom tangme kaiye pei.

²⁷Iye hipak phe me numan yintam; Üküm yenangpu I yaklao-a numan jingne phatnyu. Nang shaoyete taipu phe me Iye nangtepu wepalan jange teine tam. Hüyange iman khongküm mahtamtüoh she nangte i.

²⁸Tüokhei Jacob huhayimlan toloimei chingmei me nyoi, nyamlak yenangpu kahmük, tahlick hei wuwüngti üngang ngaipu nyoi, ümeken me wang mepu nyim kahtokte yeng yütte tamnang.

²⁹O Israel! Nang hangshin moimanpupa! Nang kih-e Youngwanpawe yintampu jat ao ngoh nang shi? I-a numanjing ree hüyange jampupa, hüyange okke shangpu nang yanglow. Numanjing wepalan-e numante nyamlak, hüyange numan-e imanjing nyoitah lante yamaiye lok-e tamlak.”