Read Konyak Naga HINSHEN 34 Bible Online

HINSHEN 34 - Konyak Naga bible

HINSHEN 34

¹Hüyange Mosawe Moab kahjee mepu Jerikho heyekao me ngohpu Nebo kahtüo Pisgah kahshang te ong. Hüyange Youngwanpawe Gilead kahtok khongkümpu, Dan apyekao ngoiye hüowe tam.

²Naphtali khongkümpu, hüyange Ephraim hüyange Manasseh kahmük, hüyange Judah kahtok khongkümpu, henyip yekao me Mediterranean yengchingnyu ngoiye;

³Judah heyekao kahmük, hüyange Zoar mepu Jerikho ngoipu kahjee, logpee chingnyu ngoiye hüo.

⁴Youngwanpawe Mosate i, “Hatüowa Abrahamte, Isaacte, hüyange Jacobte Taowe imanjing huhayimlante phalakei she janpu kahtok ngohnang. Taowe hatüo nang mük-e nangte ngene tamnang, hüpoi taowe nanga tüokente taine yetamlak.”

⁵Tüokhei Youngwanpa ngao kih-e tüoken me Moab kahtok me Youngwanpa shaoshanpa Mosa li.

⁶Hüyange Bethpeor phei janhüowe Moab kahjee ja me Youngwanpawe I mu, hüpoi tenyih te ngoiye aowe-o I mangjong ütingpa nyoi yeshing.

⁷Mosa I liwante wangpeng gho ja da ngoh yangki; I mük manpompe ngohyangki, hüyange I wong mannyaipe jinte ngohpu kih-e ngohyangki.

⁸Hüyange Israel kahtalan-e Mosa jingne Moab kahjee me nyih delüm mang shap; hüke Mosa jingne shappe yoonge shappu nyih hipak üküm ngoi.

⁹Sha-a Nun üha Joshua konheingao yahawe mawe ngoh, hangjingne Mosawe I nanleipa ne Ite I yak-e shüng. Tüokhei Israel kahtalan-e I nyingme yah, hüyange Youngwanpawe Mosa kaiye ngaowe tampuke ling.

¹⁰Tüome pei-e Youngwanpawe sheta hei sheta ni teihüowe shingpu Mosa kih-e sha-ate ngoi-e Israel me hipa ja nehoi manngai.

¹¹Hüyange I kih-e ao-o yenang, kahnyingwüngha khongkümpu hüyange yashanyali üshei me, hanghe Egypt kahtok me Pharaoh te, hüyange I shaoshanpalan khongkümpute, hüyange iman kahmük khongkümpu yeme linglak Youngwanpawe I shon,

¹²hüyange wong üyongpu üshei hüyange nyamlakpa üyong hanghepa Mosawe Israellan khongkümpu sheshao me ling, hüke hipa aowe-o lingpu ye-ok.