Read Konyak Naga HINSHEN 4 Bible Online

HINSHEN 4 - Konyak Naga bible

HINSHEN 4

¹“Tüokhei sha-a, O Israel, taowe numante nyüopu ngaokhüm hüyange ngao phünpu jonlak jingne shingyah; hüke Youngwanpa numan pajeiyonglan Kahwange, numante phapu kahmükte onglak, hüyange yahlak, hüyange numan üyin ngohpu oklak.

²Youngwanpa numan Kahwange ngaophapu hanghepa taowe numante phanang hatüo numan-e jonlak jingne, taowe numante phapu ngao me ünyei yepüolak, yejema-a numan-e tüopa mepu hango yah yeteilak.

³Numan yoi mükke Youngwanpawe Baal-Peor me hanghe ling tüopa ngeteki; hangjingne Peorlan Baal pheite woipu kahta lili Youngwanpa numan Kahwange numan yo mepu mahne tamteki;

⁴hüpoi numan aoyinne Youngwanpa numan Kahwangte tükyange ngoh tenyih ngoiye numan kahta lili üyin ngohnang.

⁵“Leihuyah, Youngwanpa Ü-Kahwange üte ngaowe tampuke, numan-e yahlak jingne taiye ngohpu kahmük me jonlak jingne taowe ngaokhüm hüyange ngao phünpu numante hüoyangki.

⁶Tüokhei tüolan-a tük angtüoh hüyange lingtüoh; hangjingne jatlan tangme tüopa-a numan konngao hüyange shinge yahpu ngohnang; iman-e tüolan khongkümpu jaiwante ilak, ‘Ütingme tüopa jat üyonga konnangpu hüyange shinge okpu kahtalan ngohnang!’

⁷“Hangjingne Youngwanpa teman Kahwangte hanghe hipak me teman-e nyiklakei I yeonge owe ngohpu kih-e, ao jat üyong jing Kahwang hüke ngoh nang shi?

⁸Hüyange tenyih taowe numan sheshao me angetamyange ngohpu ngaokhüm khongkümpu üjaopa kih, hanghe jat üyong me tüopa khoih tampu ngaokhüm hüyange ngao phünpu ngohnang shi?

⁹“Numan yoi mük-e ngepu toishaolan-a yepilak, hüyange tüolan-a numan mongjang me numan üyin ngohpu hipak mongme yepilak jingne hei kenting yah, hüyange numan nying nyingke mengha ngohyah; hüpoi tüolan-a numan-e numan hayim hüyange huhalante shingne tamtüoh;

¹⁰hangke Horeb me Youngwanpa nang Kahwang sheshao me numan yongpu nyih me Youngwanpawe üte i, ‘Ü-ngao imante jaine tamlak, hüyange tüowe iman üyin jin küm-e üte nyammeleye ngohlak shinglak hüyange hüke iman hayimlante nyüolak jingne, kahtalan ü-shongte jemne tamtüoh. Numan hayimlante itüoh.’

¹¹“Hangke numan owe wen hüyange kahyashong me yong, hüyange wangnyak, wangphom, hüyange wangnyak jeipuwe büangyange wang üwo ngoiye kahtang me vün loong.

¹²Hüyange Youngwanpawe numante vün me ngao; numan-e ngaowüng hei jai, hüpoi püm ye-nge; ngao shaha ngoh yangki.

¹³Hüyange Iye yoi jiengjeppu numante shingne tam, hanghepa Iye numante jonlak jingne phawe tam, hatüowa ‘Ngaokhüm Pen’ hüyange hatüo Iye longsheng ni me nyan.

¹⁴Tüopa hipak me numan-e yahlak jingne taiye ngohpu kahmük me numante linglak ngaokhüm jonlak ngaolak Youngwanpawe üte ngaowe tam.”

¹⁵“Tüokhei numan yoi nying nyingke kenting yah; hangjingne vün mepu Youngwanpawe Horeb me numante ngaopu nyih me numan-e püm hango ye-nge;

¹⁶hüke yejema-a numan-e moung linge, üpong yejema-a üpi lepu me shu shupuke peshao linge mahlak,

¹⁷hüke kahtok me ngohpu yinmok ütam lepu me ütam, yejema-a wangme pupu awha lepu ütam,

¹⁸yejema-a kahtok me lehkempu lepu ütam, yejema-a kahtok ümong me yengme ngohpu nyah lepu ütam linge numan-e nuwetamlak.

¹⁹Aope numan-e wangyete lei: wanghe, linnyu, hüyange shanhalan ngenang, tüolante yoppe khümlak jingne hüyange tüolan shaoshanlak jingne numante tok ne tahtam; tüolan khongkümpuwa ülao kahtalante iman-e yoppe khümlak jingne numan Kahwang Youngwanpawe phayangki.

²⁰Hüpoi numan-a, Youngwanpawe tenyih ngohpu kih-e, yoi kahta ne menglak jingne, Egypt mepu, yan vünjüo mepu numan yahngaiye woipei.

²¹“Tüo shahane yeje, numan jeng me Youngwanpawe üte mongshih ngai, hüyange Jordan kaiyange taowa yetailak, yejema-a kahmük ümei hanghe Youngwanpa nang Kahwange numante mothleilak jingne phanang tüopate taowa yeyu oklak she jiengjep.

²²Tüojingne taowa hatüome tüopa kahmük me lilak, tao Jordan kaiye yetailak; tüoyangpoi numanpa-a tailak hüyange tüopa kahtok ümei-a yahlak;

²³Tüokhei Youngwanpa numan Kahwange jiengjeppu hanghepa Iye numan phei ling hüyange numan-e yoi jingne moung noksa yelinglak jeng Youngwanpa nang Kahwange büangpu jeng numan-e yepelak jingne kentingyah.

²⁴Hangjingne Youngwanpa numan Kahwang-a hahshupu vün, müktakpu Kahwang ngohnang.

²⁵“Numan aope hayim hüyange huheiha ngohlakei, hüyange kahmük me laolünge ngohlakei, hüyange moung ütam lingyange numan nying nyingke nulakei, hüyange Youngwanpa nang Kahwang sheshao me hanghe ümeng hatüo linge, I mongshih ngaine tamlakei,

²⁶sha-a numan-e Jordan kaiye ongyange yahlak ne ngohpu kahmük mepu numan mamshe jaoshe-e mahtam phalak, tenyih taowe numan phei tüi-e wang hei kahtokte saki ne menglak nyiknang; numan tüopa tangme jin yelaolak, hüpoi jaosheye mahlak.

²⁷Hüyange Youngwanpawe kahtalan yo me numan yanne tamlak, hüyange Youngwanpawe numan ümekente woilakei tüome jatlan yo me numan kahta ükhong üjoiha ne ngohlak.

²⁸Tüoken me numan-e kahwanglan shaoshanlak, kahtawe lingpu, long hei pee; kahwang aowe nge-o ye-ngelak, yejema-a jai-o yejailak, yejema-a üpe-o yepe ok.

²⁹Tüoyangpoi tüome numan-e Youngwanpa nang Kahwang yamma-a, hüyange nang mongjang khongküm, hüyange nang yaha khongkümpuwe I yamma-a, numan-e I tüolak.

³⁰Aope numan shanghah shaoshi me ngohlakei, hüyange tüolan khongkümpu üküm nyih me nangte ngailakei, Youngwanpa nang Kahwang tangte leih yelak, hüyange I ngaowüng jailak;

³¹hangjingne Youngwanpa nang Kahwang-a shüpshe Kahwang ngohnang; Iye numan yetüohlak, yejema-a mahne yetamlak, yejema-a numan pajeiyong lante jiengjeppe janpu yepelak.

³²“Hangjingne sha-a, hüke Kahwange kahtoknyu me kahta ngaine tamyange, numan shao me ngohpu, lintepu nyih hei hipak jeng tongelei huyah, hüyange wangjeng jaye üküm mepu jaye üküm ngoiye tonge leihu, tüokihpu toi üyong ngaiya ei yejema-a jai nehoi jaiyangkü a?

³³Kahwange vün mepu ngaopu numan-e jaipu kih-e kahta ütam-e jaiyange üyin ngoh nangkü a?

³⁴Yejema-a kahwang ütam-e, Youngwanpa numan Kahwange numan jingne Egypt me lingpu numan-e ngepu kih-e, tokpu kaiye, yepinlakpa kaiye, yashan yali toiye, wehok-e, wongnangpu yakke, hüyange yak hongpu kaiye, hüyange nyamlakpa üyonge eiha jat yo mepu yoi jingne yahlak wongnange taiyang a?

³⁵Numan-e Youngwanpa Kahwang she shinglak jingne hatüo numante hüo; I kaiye ao-o yenang.

³⁶Numan tüklak jingne Iye wang mepu numante yoi ngaowüng jaine tam; hüyange kahtoknyu me Iye yoi vün üyong numante ngene tam; hüyange vün yo mepu numan-e I ngaowüng jai.

³⁷Hüyange Iye numan pajeiyonglante kenpu jingne, iman pheite numan üli leye ngai, hüyange Egypt mepu, wong üyong phei, I ompu ngohwe numan woipei;

³⁸hüyange numan ngoipu phei jam jamshe numan phei sheyongpu hüyange wong shenangpu jatlan numan sheshao mepu Iye jange teiye, hüke tenyih ngoiye ngohpu kih-e, Iye numante I kahmük mothleilak jingne pha.

³⁹Tüokhei tenyih shinge yahtüoh, ütangye wangdang me, hüyange üphang ye kahtoknyu me, ülao ao-o yenang, Youngwanpa I Kahwang she mongjang me aope-o yepepe angtüoh.

⁴⁰Youngwanpa nang Kahwange jintepu jingne numante phapu kahtok me numan phei me numan hayim moiman ngohlak, hüyange kahmük me numan hipak laowe jinlaowe ngohlak jingne tenyih taowe numante phapu I ngaokhüm hüyange ngaowe tampulan numan-e jonlak yang.”

⁴¹Tüophei me Mosawe Jordan heong yeme chingnyu lüm yoi yoi ne ang;

⁴²tüokaiye kahta toipa aowe üshongpe teinupu-o yenang shihpu te püohpin-e yoi yupi toilakei, tüolan chingnyu ja jahe me taiye lolak hüyange I-a li ne yetamlak;

⁴³hüke Reuben nokphong jingne kahnyüo phaonyu me Bezer; Gad nokphong jingne Gilead me Ramoth; Manasseh nokphong jingne Bashan me Golan.

⁴⁴Hatüowa Israel Hayimlante Mosawe tüohpu ngaokhüm ngoh nang;

⁴⁵Egypt mepu iman ngaiwante Mosawe Israel hayimte ngaopu saki, linglak ngaokhüm hüyange ngaophün tampu tüolan ngoh nang;

⁴⁶Jordan kaiye taiye, Bethpeor shaome kahjee me, Heshbon me ngohpu Amorlan ahngpa Sihon kahmük me, aoyin Mosa hüyange Israellan-e iman Egypt mepu ngaiwante okke tam.

⁴⁷Iman-e iman kahtok, hüyange Bashan ahngpa Og kahtok, Jordan kaiyange taiye heongye Amorlan ahngpa ni, iman-e yah;

⁴⁸Arnon kahjee ünah yeme ngohpu Aroer mepu hüke Sirion (hatüowa Hermon), kahtang ngoiye,

⁴⁹hüyange Jordan kaiye heongye Arabah khongkümpu, hüke Pisgah kahnyüo phangme Arabah yengching ngoiye ngoh.