Read Konyak Naga HINSHEN 5 Bible Online

HINSHEN 5 - Konyak Naga bible

HINSHEN 5

¹Mosawe Israel khongkümpute nyik hüyange imante i, “O Israel, tenyih taowe numan nasa me ngaowe tampu linglak ngaokhüm hüyange phünne phawe tampu numan-e shinge yahtüoh; tüolan jonlak jingne shinge yahtüoh.

²Youngwanpa teman Kahwange Sinai Kahtang me teman phei jiengjeppu ja ling.

³Youngwanpawe tüopa jiengjeppu teman payimlan phei yeje, hüpoi teman aoyin tenyih üyin me ngohnang, hüke teman khongkümpu phei ling.

⁴Youngwanpawe kahtang me vün yo mepu numan phei sheta teihüowe ngao,

⁵tüopa hipak me Youngwanpa ngao numante ngaowe tamlak jingne Youngwanpa hüyange numan nipa me tao yong, hangjingne numan-e vünte nyam-e ngoh hüyange kahtangte ye-ong. Hüyange Iye i:

⁶“ ‘Nang Egypt kahtok shapu nokme ngohpu woitampu, nang Kahwang Youngwanpa-a Tao ngohnang.

⁷“ ‘Nange ü-sheshao me ülao kahwanglan hango tah ang.

⁸“ ‘Nange nang jingne wang ütang me, yejema-a kahtok ümong yeme, yejema-a yeng ümong yeme ngohpu ülam ja leye moung hango tahling;

⁹peshao hanghe te-o khuhtawe tahyop tahkhüm, hangjingne Taowa nang Kahwang Youngwanpa hüyange ü-phei hokke wepalante Taowe nün-e yengoh oklak. Aoyinne üte nunang tüolan tangme hüyange imanjing huhayimlan jin lüm hei jin peli ngoiye Taowe shaoshi tampu yah peilak.

¹⁰Hüpoi aoyinne Üte ken hüyange Ü-ngaokhümlan jai, jin haja maawe Taowe kenpu tüolante hüolak.

¹¹“ ‘Nange Youngwanpa nang Kahwang min jajang jawe tah jon; hangjingne aohipawe I min jajang jawe yeshupe jonlakei, Youngwanpawe shaoshi phalak.

¹²“ ‘Nang Kahwang Youngwanpa Sabbath nyih nyüotüoh hüyange tüopa-a jaowe angtüoh, hüke nangte ngaokeng phawe tampuke.

¹³Nange nyih wok mongme nanwin tüoh, hüyange nang toishao üshei lingtüoh.

¹⁴Hüpoi nyit shepupa nyih-a Youngwanpa nang Kahwang jing Sabbath nyih ngohnang; tüopa nyih me nange yejema-a nangha lan-e, yejema-a rhalan-e, yejema-a nange tampu yinmok lan-e yejema-a nenok me ngohpu yinpalan-e toi hango tah ling. Hüke nang rhapa hei rhanyu lan-o nangkih-e toloimei lak.

¹⁵Teihtüo yah, hüke nanga Egypt me rhapa ne ngoh yangki, hüyange Youngwanpa nang Kahwange, wongnangpu yak-e hüyange yakhong yange nang tüo mepu woiye peiyangki. Tüojingne Youngwanpa nang Kahwange nangte Sabbath nyüolak jingne ngaokeng pha.

¹⁶“ ‘Youngwanpa nang Kahwange nangte ngaowe tampu kih-e, nangpa hüyange nangnyu te iyeshe tüoh; tüome nakshih Youngwanpa nang Kahwange hanghe kahmük nangte phanang tüo me nang jinlaowe hüyange meiye ngohlak.

¹⁷“ ‘Nange tahtoi.

¹⁸“ ‘Nange phwngngampu tahjon.

¹⁹“ ‘Nange tahkuh.

²⁰“ ‘Nange nang yupipa kaiye tahleih saki tah i.

²¹“ ‘Nange nang yupipa shekonyu tahwau; Nange inok noksa, I jing kahtok, I jing rhalan, I jing mahulan, I jing gadolan, yejema-a Ime nangpu hanghe-o waowe tahteih.’ ”

²²“Tüolan ngaokhüm lan-a aope numan khongkümpu kahtang me jem-e ngohyapeih hüwante Youngwanpawe phayangki. Aope Iye vün hüyange jeilehpu wangphom mepu wongnangpu ngaowüng phei ngaoya peih, Iye tüolan ngaokhümlan pha hüyange ülao ye-om. Tüophei me Iye tüolan-a longsheng ni me nyan hüyange tüolan-a üte phayangki.

²³“Aope numan-e wangnyak yo mepu ngaowüng jaiyapeih, aope kahtanga vün pah-e ngaiye ngoh; numan jat woipalan hei lwngmeilan khongkümpu, ü-shongte owe jemyangki.

²⁴Hüyange numan-e i, ‘Leihuyah, Youngwanpa teman Kahwange temante I müktishiwa hüyange vün yo mepu I ngaowüng teman-e jaiyangki. Tenyih teman-e ngeteki hüke kahta ja phei Kahwange ngao ne ok, hüyange I üyin me ngohpu oklak.

²⁵Hüpoi sha-a hangne üne-o teman lilak? Hangjingne tüopa vün üyonge teman mahlak; üne-o Youngwanpa teman Kahwang ngaowüng teman-e jaima-a, hüwante teman lilak.

²⁶Hangjingne üyin Kahwange vün mepu ngaopu teman-e jaipu kih-e, kahta aowe jaiyange üyin me ngohnang shi?

²⁷Nang leih yetüoh, hüyange Youngwanpa teman Kahwange ngaolak ne ngohpu khongkümpu jaikei; hüyange Youngwanpa teman Kahwange nang phei ngaopu khongkümpu nange tomante i tüoh; toman-e hatüo jailak hüyange linglak.’

²⁸“Aope numan-e ü-phei ngao Youngwanpawe numan ngao jai; tüophei me Youngwanpawe üte i, ‘Tüopa kahtalan-e nang te ngaopu iman ngao Taowe jaiteki; iman-e ngaopu khongkümpuwa ütingme ngaoteki.

²⁹Oh, hüke iman hüyange iman ha-nao jinte meiye ngohlak jingne, iman-e üte nyam-e leye hüyange jinte ü-ngaokhümlan jailak ne iman mongjang hüke shaha ngohshih phang!

³⁰Yetüoh, hüyange imante “Numan nyenokte leih yetüoh” she itüoh.

³¹Hüpoi nanga, Ü shong me yongyange ngohkei, hüyange Taowe nangte linglak ngaokhüm hüyange ngaophünpu khongküm, Taowe iman ngohlak jingne phapu kahmük me iman-e linglak Taowe nangte iphalak.’

³²“Tüojingne, Youngwanpa numan Kahwange numante ngaowe tampu kih-e numan-e linglak jingne kentingyah; numan-e yakjah yejema-a yaknya ye me tahlüp.

³³Numan üyin ngohlak, hüyange numan meiye ngohlak, hüyange numan-e yahpu kahmük me numan jin hipak laolak jingne, Youngwanpa numan Kahwange numante ngaowe tampu lamnyu khongkümpu me numan-e ngaojai-e kemtüoh.”