Read Konyak Naga HINSHEN 6 Bible Online

HINSHEN 6 - Konyak Naga bible

HINSHEN 6

¹Sha-a numan hanghepa kahmük yahlak jingne ongnang tüopa kahmük me tüolan-a numan-e linglak Youngwanpa numan Kahwange numante hüolak jingne üte ngaophapu linglak ngaokhüm hüyange ngaophünpu hatüo ngohnang;

²hüke I ngaokhüm hüyange Iye ngaowe tampu hanghepa taowe numante ngaowe tam, nang hüyange nangha, hüyange nanghu nangha lan-e, hüyange nang jin küm-e hüyange hükih nang jin lao lak jingne nange Youngwanpa nang Kahwang shaote nyamlak hüyange tüolan khongkümpu jonlak jingne ngohnang.

³Tüojingne O Israel, Youngwanpa numan pajeiyonglan Kahwange numante janpu kih-e, düamyeng hüyange zahtai jelo yünne ngohpu kahtok me, numan moimanlak hüyange jinlaolak jingne tüolan-a kentinge jonlak jingne jaitüoh.

⁴“Jaitüoh, O Israel, Youngwanpa teman Kahwang-a Youngwanpa ja shingha hei ngohnang.

⁵Nange Youngwanpa nang Kahwangte nang mongjang üsheiye, nang yaha üsheiye, hüyange nang wong khongkümpuwe kentüoh.

⁶Tenyih taowe numante phanangpu tüolan ngaokhümlan numan mongjang me angtüoh.

⁷Tüolan-a nange nang haheinao lante yelakpe nyüotüoh; aope nang nokme shotte ngohlakeih, hüyange nang lam me kem wante, hüyange aope nang shinlengte onglakeih, hüyange nange toi lingjang linge tüolan jeng yelakpe ngaotüoh.

⁸Nange tüolan-a yepinpe ngohlak jingne nang yak me shatüoh, hüyange tüolan-a nang shekeng me shayange angtüoh.

⁹Hüyange nange tüolan-a nenok jing tashüp hei shonglan me hüyange numanjing petenlan me tüolan-a nyanyange angtüoh.”

¹⁰“Aope numan Kahwang Youngwanpawe numan jing pajeiyonglan Abraham, Isaac hüyange Jacoblante janyangpu kih-e, Iye numante yeonge khaopu hüyange jalunpu chingnyulan hanghepa numan-e yeling yewe phalakei,

¹¹noklan-a numan-e yeyopute toinan-e maa-e, hüyange numan-e yeshaopu yengnung tümme shoyange, hüyange wuwünglick pesha hüyange olive pelick jong hanghe numan-e yedei, hüpoi numan-e sea moh-e hahne ok, tüokente aope Iye numan woipei lakei;

¹²hüwante Egypt kahtok me shapu rha nok mepu numan woiteipu Youngwanpa yepepe ngohlak kentingyah.

¹³Nange Youngwanpa nang Kahwang shaote nyam-e letüoh; Ite nange shaoshanlak yang hüyange I min shaha me nange jiengjeptüoh.

¹⁴Numan-e ülao kahwang lante tahyop tahkhüm. Hüyange numan neikon-e ngohpu kahtalan jing kahwanglan hanghe pheite-o tahwoi;

¹⁵hangjingne numan yo me ngohpu Youngwanpa nang Kahwang-a müktakpu Kahwang ngohnang; hüke yengoh yahma-a, Youngwanpa nang Kahwang mongshih ngaipu nang phei tüi-e ngailak, hüyange kahtok ütah mepu Iye nanga mahtam lak.

¹⁶“Numan-e Massah me Ite tokpu kih-e, numan-e Youngwanpa numan Kahwang yetoklak yang.

¹⁷Youngwanpa numan Kahwange ngaowe tampu lan, hüyange Iye numante ngaowe tampu ngaokhümlan numan-e yewinpe jonlak yang.

¹⁸Youngwanpa sheshao me hanghe ütingpa hüyange shemeipupa hatüo numan-e linglak yang; hümme numan moimanlak, hüyange moimanpu kahmük ümeite onge ngohlak, Youngwanpawe numan pajeiyonglante jiengjep-e, hanghepa jeng,

¹⁹Youngwanpawe jan, hüke numan lam mepu numan wepalan khongkümpu jange tei.

²⁰“Ngoikülak hipak me numan hayimlan-e aope numante hüke tonglakei, ‘Hangne Youngwanpa teman Kahwange temante tüolan ngaokhümlan jonlak jingne ngaokeng phapu?’

²¹Hüwante imante hüke itüoh, ‘Teman Egypt me Pharaoh rha ne menge ngohyangki, hüyange Youngwanpawe wongnangpu yak-e teman Egypt mepu woitei yangki.

²²Toman sheshao me Youngwanpawe Egypt tangme, Pharaoh tangme, hüyange inok me ngohpu khongkümpu tangme kahnyingwüngha hüyange shaonahpu üyong hüyange nyamlakpa hüowetam.

²³Iye teman pajeiyong lante jan-e jiengjeppu kahtok-a temante phalak woiye peilak jingne Iye tüomepu teman woipei.

²⁴Tüokhei tenyih ngoiye ngohpu kih-e, Iye teman üyin angtamlak hüyange jinte teman meilak jingne, Youngwanpa teman Kahwang shaote nyamlak tüolan ngaokhüm linglak Youngwanpawe temante ngaowe tam.

²⁵Tüojingne Youngwanpa teman Kahwang sheshao me, Iye temante ngaowe tampu kih-e, tüopa ngaowetampu khongkümpu mongpha-e lingma-a teman jingne hatüowa üjaopa ne ngohlak she itüoh.’