Read Konyak Naga HINSHEN 7 Bible Online

HINSHEN 7 - Konyak Naga bible

HINSHEN 7

¹“Aope Youngwanpa nang Kahwange nange yahne ngohpu kahtokte nang woiye peilakeih, hüyange nang sheshao me jat maapu Hitlan, Girgashlan, Amorlan, Kananlan, Perizzlan, Hivitlan, hüyange Jebuslan, nang phei sheyongpu hüyange wong shenangpu jat nyit;

²hüyange aope Youngwanpa nang Kahwange iman nang yak me phalakei, hüyange nange iman oklakei, hüwante nange iman jaosheye mahtam tüoh. Nange iman phei hango jiengjeppu tahling, yejema-a imante yayeng shüpshe tah hüo.

³Iman phei mata-tong nüng ne tahmeng. Numan yhalalan iman halante tahpha, yejema-a iman yhala numan hayim me yahne tahtam;

⁴hangjingne nangha ü-pheite yewoipe, iman-e ülao kahwanglan shaoshan lak Iye lüppe tamlak. Tüokaiye Youngwanpa mongshih nang phei tüi-e ngailak, hüyange Iye nang mamshe mahtamlak.

⁵Hüpoi imante numan-e hüke jontüoh; numan-e iman wümjong menge tam-e, iman üjaopa shongnyu khoihnyaiye mengtam tüoh, iman Asherim lange yeitüoh, hüyange iman moung vün phei jakke tamtüoh.

⁶“Hangjingne Youngwanpa nang Kahwang jing numan üjao kahtalan ngohnang; Youngwanpa nang Kahwange kahtoknyu me jat üshei tangme Iye yoi kahta ülaopake menglak numan leyangki.

⁷“Ülaolan phei numan kahta sheloi she ngohpu jingne Youngwanpawe numante kenne lepu ne yeje, tüoyangpoi jat üshei yo me numan sheshoipupa ngohnang.

⁸Hüpoi hatüo Youngwanpawe numante kenpu jingne, hüyange numan pajeiyonglante jiengjeppe ngohpu jingne, Youngwanpawe wongnangpu yakke numan woitei; hüyange Egypt ahngpa Pharaoh yak me rha nok mepu numan yintam.

⁹Tüokhei teih tüoyah, Youngwanpa nang Kahwang-a Kahwang she shingyah, monghümlak Kahwang, aowe Ite kennang hüyange Iye ngaowetampu jonpalante jin tokte haja jin ngoiye jiengjeppu hüyange yayeng shüpshe hüonang,

¹⁰hüpoi aoyinne Ite nunang imante shaoshi phatamlak jingne I mong nüngneipu hango yenang.

¹¹Tüokhei tenyih taowe numante phapu linglak ngaokhümlan, hüyange ngaophünpu khongküm numan-e kentinge jontüoh.

¹²“Numan-e tüolan linglak ngaokhümlan jaiye jon ma-a, hüke Youngwanpa nang Kahwange, numan pajeiyong lante jiengjeppu kih-e teijanpu hüyange yayeng shüpshe numan phei anglak;

¹³hüyange Iye nangte kenlak, moimanlak, hüyange jalun-e tamlak; üne-o Iye nangte jalunpu hüyange nang kahmük me ngaipu, nang tah, nang wuwüngti, nang minnga, nange tampu yinmok hüyange nyee jalunpu, Iye numante phalakei she numan pajeiyong lante jiengjeppe ngaopu kahmük me moiman tamlak.

¹⁴Jat üshei phei ünyei nang moimanlak; numan yo me netan jeyah sheko jeyah, yejema-a numan-e tampu yinmok yo me jeyah, ükengne menge ja nehoi yengohlak.

¹⁵Hüyange Youngwanpawe nang üne-o daktin üshei mepu yinne angtamlak; hüyange nange shingpu Egypt dak ümeng hanghe-o nang me yepahlak; hüpoi nangte nupu üsheite hatüo hütte tamlak.

¹⁶Hüyange Youngwanpa nang Kahwange nangte phünne phapu kahta khongkümpu nange mahtamlak yang; nang mük-e imante yetenlak yang; yejema-a nange iman kahwangte yekhümlak yang; hangjingne hatüowa nang jingne tün ja ne ngohkülak.

¹⁷“ ‘Tüolan jat ü-phei sheyongpupa, taowe hangke iman yantam oklak?’ she nang nying nyingke nange tah i.

¹⁸Imante nyam-e tahteih; Youngwanpa nang Kahwange Pharaoh hüyange Egypt khongkümpute lingpu nange teih tüoyah.

¹⁹Nange yoi mük-e ngepu tokpu üyong, kahnyingwüngha shaonahpu, wong nangpu yak, hüyange yak hongpu, hanghepawe Youngwanpa nang Kahwange nang woitei; hüke Youngwanpa nang Kahwange nange aoyinte sha-a nyamnang imante hüke linglak.

²⁰Üne-o iman towe ngohpu hüyange iman nying nyingke lowe ngohpalan nang mepu manmah tam she Youngwanpa nang Kahwange iman yo me shangtak nyahnyu shonlak.

²¹Nange iman ngeyah nante tahmokh; hangjingne Youngwanpa nang Kahwang, nyamlakpa Kahwang üyong numan yo me ngohnang.

²²Hüyange Youngwanpa nang Kahwange tüolan jat-a üjing jinghawe nang sheshao mepu jangteilak; phaonyu jongme phao yinmok nang jingne jamloi jalun-e yengailak jingne nange iman ünjame lanshe mahne yetamlak yang.

²³Hüpoi Youngwanpa nang Kahwange iman nang yak me phalak, hüyange iman mah manküm manküm she iman yeonge nüngneine tamlak.

²⁴Hüyange iman ahngpalan Iye numan yak me phünne phalak, hüyange iman min wangphang mepu nange mahtamlak; nange iman manmahtam she ja-e nehoi nang phei tüi-e yeyonglak.

²⁵Iman kahwang mounglan nange jakke winlak yang; iman me ngohpu khüm yejema-a hon nange yewaolak yang, yejema-a hatüo yoi jingne yeyahlak yang, hüke yejema-a nang tüopa tün me phophalak; hangjingne hatüowa Youngwanpa nang Kahwang sheshao me nulakpa ngohnang!

²⁶Hüyange nenokte nulakpa tüolan moung hango yah yepeilak yang, hüyange tüopa lepu phoiwümme yetamlak yang; nange hatüo lanshe yeyahlak hüyange hatüo nulak yang; hangjingne hatüowa phoiwümpu toinan ngohnang.”