Read Konyak Naga HINSHEN 8 Bible Online

HINSHEN 8 - Konyak Naga bible

HINSHEN 8

¹“Numan üyin ngohlak, hüyange jalunlak hüyange Youngwanpawe numan pajeiyong lante jiengjeppu kahtokte onglak, hüyange yahlak jingne ngaophapu khongkümpu hanghepa taowe nangte nyinge tam hatüo numan-e jailak yang.

²Hüyange Iye nang innenyaine tamlak, nangte tok-e leilak, nang mongjang me hanghe ngoh hatüo shinglak, Iye ngaowe tampu nange jonlak heiya yejonlakei shinglak jingne Youngwanpa nang Kahwange tüolan wangpeng deli phaonyu jongme nang woipu khongkümpu nange teih tüolakyang.

³Hüyange kahtawe an shaha phei üyin yengoh ja she, hüpoi Youngwanpa ju mepu hangheyin ngailakei tüopawe kahta üyin ngohnang she Iye nangte shingne tamlak nanjingne, Iye nang innenyai ne tam, hüyange nang nyaoweleye tam, hüyange mannawe Iye nang uhying, hanghepa nange-o nangjing pajeiyong lane-o yeshingpe ngoh.

⁴Tüolan wangpeng deli mongme nang nyemo ülangne yemeng yejema-a nang ya yepeak.

⁵Tüokhei kahtawe yoiha yohkahpuke Youngwanpa nang Kahwange nang yohkah nang, she nang mongjang me teihtüo yah.

⁶Tüokhei I lamnyu me kempuwe hüyange Ite nyampuwe nange Youngwanpa nang Kahwange ngaowe tampu jontüoh.

⁷Hangjingne Youngwanpa nang Kahwange kahmük ümei jate woiye peiküki, shaohayin ngohpu kahmük, yeng ngaijing hüyange yengpeiwo, kahjee hüyange kahtang mepu yünne ngohpu nyoi,

⁸wheat tah hüyange barley tah ngohpu kahmük, wuwünglick hüyange phuklick ngohpu kahmük, hüyange chamuk ngohpu nyoi, minnga ngaipu olive hüyange zahtai jelo ngohpu kahmük;

⁹yewang yengoipu yenangpe nange an hahlakpa kahmük, tüopa me nang hangheme-o yewangpe yengohlak; tüomepu longnyu lan-a yan nyoine, hüyange tüopa kahtang mepu shakphan yan shaowe yah oklak kahmük ngohnang.

¹⁰Hüyange aope nange moh hahlakei, Youngwanpa nang Kahwange nangte kahmük ümei phapu jingne nange I min yonglak yang.”

¹¹“Tenyih taowe nangte phapu, Iye ngaowe tampu, ngao phünpu, hüyange I ngaokhümlan yejonpe yengohlak, Youngwanpa nang Kahwang yepelak kenting yah;

¹²Aope nang seamoh-e hahyange, hüyange ngohlak nok linge,

¹³hüyange aope nang mahulan hüyange nyee ükhong jalunlakei, hüyange nang me khüm hei hon jalun-e ngailakei, hüyange nang me ngohpu khongkümpu jalun-e ngailakei;

¹⁴hüwante nang mongjang otamaoheye, Egypt kahtok rha nok mepu numan woipeipu Youngwanpa nang Kahwang yepelak jingne kentingyah;

¹⁵aowe nang phaonyu jong hüyange nyamlakpa, hanghe me pu nyim mengpu hüyange toshitolao ngoh, hüyange yengleye ngohpu yeng yenangpu kahmük kaiye woiye pei, hüyange longnyu mepu yeng nangte ngaine tam,

¹⁶hüyange phaonyu jong me numan pajeiyong lan-e yeshingpu mannawe aowe uhying, hüke hatüowe nang innenyai tamlak jingne hüyange nangte tokleilak, hüke üküm ne nang meilak linglak ngohyangki.

¹⁷Nange nang mongjang me, ‘Taowe yoi üngan hüyange wong kaiye tüopa moth üjingne tüoyangki she yengaolak jingne kentingyah.’

¹⁸Hüpoi nange Youngwanpa nang Kahwang teihtüolak yang, hangjingne nangte nang moth tüolakne üngan phapa-a I ngohnang, tenyih ngoiye ngohpu kih-e, nang pajeiyong lante Iye janpu Iye ütahte ngaitamlak nanjingne hatüo hüke ngohyangki.

¹⁹Hüyange nange Youngwanpa nang Kahwang peyange, ülao kahwang pheite kemma-a, hüyange iman shaoshan ma-a, hüyange imante yoppe khümma-a, ütingme numan mahlak she tenyih numan kaiye taowe saki phanang.

²⁰Numan-e Youngwanpa ngao yejaima-a, hüma-a numan shaoyete taipu phei jam jamshe aoyin jatlan Iye mahtamlak ne ngohnang, tüo kih-e Iye numan mahtamlak.”