Read Konyak Naga HINSHEN 9 Bible Online

HINSHEN 9 - Konyak Naga bible

HINSHEN 9

¹“Jaiyah O Israel, tenyih nang Jordan kaiye tailak ne ngohnang; numan phei sheyongpu, hüyange wong shenang pupa jatlan ching hahlak jingne onglak ngohnang; wang ngoiye daowe chingtuk penyu peyange;

²kahta kheyongpu hüyange jin daopu, Anakim hayim, aoyin jeng numan nying nyingke shinge ngao ‘Anakim hayim sheshao me aowe yonge oklak?’

³Tüokhei Youngwanpa nang Kahwang nang sheshao me hah shulakpa vün kih-e I tainang she nange tenyih shingyah; Iye iman mahtamlak, hüyange nang sheshao me Iye iman yeine tamlak; tüokhei Youngwanpawe nang phei ngaopu kih-e nange iman jange teilak hüyange iman nyaishüm-e mahne tamlak.

⁴“Youngwanpa nang Kahwange iman nang sheshao mepu jange teiphei me nang nying nyingke hüke, ‘Tao jaowe okpu kaiye Youngwanpawe taowe tüopa kahmük mothleilak woiye pei’ she aope-o tah ngao; hüpoi tüolan jat nuweshakpu jingne, Youngwanpawe numan sheshao mepu iman jange teipu ngohnang.

⁵Hatüowa nang jaowe okpuwe yejema-a nang mongjang khakshuwe ngohpu jingne iman kahmük yahlak nang tainang she yeje, hüpoi tüolan jat nuweshakpu jingne Youngwanpa nang Kahwange iman nang sheshao mepu iman jange teipu ngohnang; hüke numan pajeiyonglan Abraham, Isaac, hüyange Jacobte janpu ütahte ngailak jingne ngohnang.”

⁶“Tüokhei shingyah, numan jaowe ngohpuwe Youngwanpa nang Kahwange tüopa kahmük ümei yahlak nangte phapu ne yeje; hangjingne numan-a kahta üngeilan ngohnang.

⁷Nange hangke Youngwanpa nang Kahwang phaonyu jongme mongshih ngaine tam tüopa teih tüoyah, hüyange nange tahpe; Egypt kahtok tüohyange taipu hipak mepu tüopa nyoijing manngoi manngoi she numan-e Youngwanpa phei tüi-e yonge peiyangki.

⁸Horeb me nehoi numan-e Youngwanpa mongshih ngaine tamyangki-mongshih ngaipuwa numan mah tamlakne mongshih ngai.

⁹Aope tao longsheng me nyanpu yahlak kahtangte ong, hatüo numan phei Youngwanpawe jiengjeppu longsheng ne ngoh, tao nyih deli hüyange pha deli kahtang me ngohyangki; taowe hah-o yehah, yeng-o yeying.

¹⁰Hüwante Youngwanpawe longsheng ni me, Kahwang yaklan-e nyanyange, üte pha; hüyange ükhong jempu nyih me vün mepu Youngwanpa kahtang me numante ngaopu ngao khongkümpu tüopa tangme nyanyange ngohyangki.

¹¹Hüyange nyih deli hüyange pha deli üküm me, hüke jiengjep-e nyanpu longsheng ni Youngwanpawe üte pha.

¹²Hüyange Youngwanpa üte i, ‘Yayong tüoh, tüomepu nang mamshe yutüoh; hangjingne nange Egypt mepu woiye peipu nang kahtalan-e iman manmanke nuweshak teki; Taowe imante ngaophayangpu lamnyu mepu iman-e mamshe leih yeteki; iman-e iman manmanke hopu moung lingteki.’

¹³“Üne-o Youngwanpawe üte i, ‘Tüolan kahta Taowe ngeteki, hüyange leihu, hatüowa kahta üngeilan ngohnang:

¹⁴Taowe iman mahtamlak, hüyange wangphang mepu iman min winlak, üte tienne tah ngang; tüophei me Taowe nanga iman phei wong shenangpu hüyange kheyongpu jat ne linge tamlak.’

¹⁵Tüokhei tao leihye hüyange kahtang mepu yu, hüyange jiengjeppu longsheng ni-a ü-yak ni me ngohyangki.

¹⁶Hüyange taowe lei, hüyange leihu, Youngwanpa numan Kahwang phei tüi-e numan-e ünu omme ngoh yangki; numan-e yoi jingne hopu mahu üpongha lingyange ngoh, Youngwanpawe numante ngaowe tampu lamnyu mepu numan-e mam mamshe leih yeteiye ngoh yangki.

¹⁷Tüokhei taowe longsheng ni-a jon, hüyange ü-yak ni mepu numan sheshao me shüppe tam; hüyange numan mük sheshao me tüolan-a pai.

¹⁸Tüophei me Youngwanpa sheshao me, üwangpa kih-e, nyih deli pha deli tao khuhtawe yop; taowe hah-o yehah, yeng-o yeying; hatüowa numan-e ompu ünu khongkümpu, hüke Youngwanpa sheshao me hanghe ümengpa ne ngoh, hüyange I mongmeng ne tam-e mongshih ngaine tam, hatüo lingpu jingne ngoh yangki.

¹⁹Hangjingne mongshih ngaipu hüyange yeonge mongyemeipu, hangheye Youngwanpawe numan phei tüi-e numan mahtamlak mongshih ngaipu ngoh hatüo te tao nyam-e ngoh. Hüpoi tüopa hipak me-o Youngwanpawe üte jai.

²⁰Hüyange Youngwanpawe Aaron mahtamne Ite yeonge mongshih ngaiye ngoh; hüyange üne-o tüopa hipak me-o taowe Aaron jingne yop.

²¹Hüyange numan-e lingpu mahu üpongha numan ünu taowe yah, hüyange vünne hatüo jakke win, hüyange hatüo khoihnyai-e tam, hüyange hatüo vünla ne manmeng manmeng yeonge kahmak ne menge shuwetam; hüyange kahtang mepu yünne tapu yengyin me vünla-a shüppe tam.

²²“Hüyange Taberah me, hüyange Massah me, hüyange Kibroth Hattaavah me, numan-e Youngwanpa mongshih ngaine tam.

²³Hüyange aope Youngwanpawe numan Kadesh Barnea mepu shonne, ‘Ongtüoh, Taowe numante phapu kahmük-a yahtüoh’ she i, hüwante numan-e Youngwanpa numan Kahwange ngaowe tampu phei tüi-e numan-e yong, hüyange numan-e Ite üting yelak, yejema-a I ngaolan yejai.

²⁴Taowe numan shinge peipu nyih mepu wange numan-e Youngwanpa phei tüi-e yonge peiyangki.

²⁵“Tüokhei Youngwanpa sheshao me taowe nyih deli hüyange pha deli khuhtawe yoppe ngoh yangki; hangjingne Youngwanpawe numan mahtamlak she Iye mongpu taowe shinge pei.

²⁶Hüyange taowe Youngwanpate yop, hüyange i, ‘O Okkeshangpupa Youngwanpa, nang kahta, nang mothleipalan, aoyin nang yonge lüopu kaiye nange yinne tam, wongnangpu yakke nange hangke Egypt mepu woitei, iman mahne tahtam.

²⁷Nang shaoshanpa Abraham, Isaac, hüyange Jacob teihtüo pha; tüolan kahta mükshukhulupu yejema-a iman yemeipu, yejema-a iman ünute tahlei kei.

²⁸Hüke ye-i ma-a nange toman woiye peipu kahtok mepu Egypt lan-e ilak, “Youngwanpawe imante janpu kahtokte iman woiye peine ye-ok yah-e, hüyange Iye imante nupuwe, Iye iman phaonyu jongme toine iman woiye pei.”

²⁹Tüoyangpoi ine ima-a iman-a nang kahta, nang mothleipalan, hanghepa nange nang üngan wong üyong kaiye hüyange nang yak hongpu kaiye woiye pei.’ ”