Read Konyak Naga JOHN 1 Bible Online

JOHN 1 - Konyak Naga bible

JOHN 1

¹Ükong wangwante Ngao ngoh, hüyange Ngaowa Kahwang phei ngoh, hüyange Ngaowa Kahwangne ngoh.

²I Ükong wangwante muh Kahwang phei ngoh.

³Sheminlamphe I kaiye lingngai, hüyange I ye-ompe ülam ja nehoi linge yengai. Hangyin linge ngaiyangki,

⁴I mepu üyin ngoh, hüyange I üyin-a kahtalan wangngai ne ngoh.

⁵Wangngaiye wangnyak me tee-nang, hüyange wangnyakke tüopa yemei ok.

⁶Kahwang mepu shonpu kahta ja ngoh; I min John.

⁷I-a saki phalak jingne, wangngai jeng saki phalak, I kaiye kahta üshei ütinglak-e tamlak jingne pei.

⁸Wangngai I ne yeje, hüpoi tüopa wangngai jeng saki phalak jingne I pei.

⁹Hatüowa ütingpa wangngai ne ngoh, hanghepa wangngai kahtoknyu te pei hüyange kahta üsheite teeye tam.

¹⁰I kahtoknyu me ngoh; Kahwange I kaiye kahtoknyu ling, hüyangpoi kahtoknyuwe I yeshing.

¹¹I yoi kahtalan tangte pei, hüyangpoi I kahtalanne I yeyah.

¹²Hüyangpoi hangshinne I yah hüyange I min me meng tüolan te Kahwang üha ne menglak wong Iye pha.

¹³Iman iy me puhpu yeje, mei me puhpu yeje, yejema-a kahta mongpu me puhpu yeje, hüpoi Kahwang mepu.

¹⁴Ngao kahta ne meng hüyange teman phei ngoh. I müktishiwapu, shüpshe hei ütinge maawe teman-e ngeyangki. Ipa mepu I shaha Halom ne menge hatüo müktishiwapu Iye tüoyangki.

¹⁵Johnne I jingne saki pha, hüyange üngwün, “Hatüowa taowe ao jeng iyapeih I ngohnang, Ao ü-phei te pei, hüpoi I ü-phei sheyongpupa, hangjingne tao puh shao me I ngoh.”

¹⁶Hangjingne I wangngoipu shüpshe mepu moiman ja phei me ja she Iye teman üshei moiman.

¹⁷Hangjingne Kahwange Mosa kaiye ngaokeng pha; hüyangpoi shüpshe hei ütingpa Jesu Khrista kaiye pei.

¹⁸Aowe-o Kahwang jeje mannge. Hüyangpoi Üpa mongjang me ngohpu, halom hawe I ütahte ngaipuwe shingne tam.

¹⁹Aope Jerusalem me ngohpu Jehudilanne ngengpa hei Levilan “Nang ao shi?” she Ite tonglak jingne shonne tei Johnne hatüo ngao iyangki.

²⁰Johnne yejanpe yengoh, hüpoi ngaiphaih-e hüyange meimei-e hüke iyangki, “Taowa Khrista ne yeje.”

²¹Hüyange iman-e Ite tong, “Hümma-a nang ao shi?” “Nanga Elijah a?” “Iye jan, tao yeje.” Iman-e tong, “Nanga Hipa a?” Iye jan “Yeje.”

²²Iman-e i, hümma-a “Nanga ao shi tomante ipha.” “Aoyinne toman shon tüolan tangte toman-e nang mepu ngao yepu yahyelak yang. Nang jeng hangke ilak shi?”

²³Johnne janne Isaia hipa ngaokih-e hüke i: “Youngwanpa jingne tailam tingkhakke tümtüoh, she wanwüng jengme shejawe üngwünpu ngaowünga tao ngohnang.”

²⁴Phariseelanne-o kahta ütam shon.

²⁵Iman-e John te tong, “Nang Messiah ne-o yeje, yejema-a Elijah ne-o yeje, yejema-a Hipa ne-o yejepute hangne nange baptipu shi?”

²⁶Johnne jan: “Taowe yengme baptinang; hüpoi numan yo me ja yonge ngohnang numan-e yeshing.

²⁷I ü-pheite peiküki, hüyangpoi I yashom wu lanlak nehoi tao yewang.”

²⁸Tüolan üshei Bethani me ngai, Jordan yengyin jaye kaome, ümeken me Johnne bapti.

²⁹Ünenyih Johnne I tangte Jesu peipu nge hüyange i; “Kahwang nyee üha leitüoh; aowe kahtoknyu ünu yahtei nang!

³⁰Taowe ao jeng hüke i, hatüowa i: ‘Kahta ja ü-pheite peinang, hüpoi I ü-phei sheyongpupa’ hangjingne tao manpuhpe I ngoh.

³¹I ao ne menglak taowe yeshing, hüpoi Israel te I shingne tamlak jingne, taowe yengme baptiye peinang.”

³²Hatüo Johnne phapu saki: “Taowe wangdang mepu Yaha awshu kih yuwe nge hüyange I me pah.

³³Taowe I yeshing, hüpoi Kahwang, aowe yengme baptilak jingne tao shon, Iye üte i, ‘I ao me Yaha yuyange pah hüyange ngohpu nange nge, Yaha Üjao me baptitamlak pa-a I ngoh nang.’ ”

³⁴Hüyange Johnne i, “Taowe hatüo ngeteki. Hüyange taowe hatüo jingne saki phawe inang hatüowa Kahwang Üha.”

³⁵Üne nyih I pinlan ni phei John üne-o tüome yongyange ngoh;

³⁶aope Iye Jesu kemme nge, Iye i, “Leihuyah, Kahwang Nyee üha tüome ngohnang!”

³⁷I pin niye Iye ngaopu jai hüyange Jesu phei woi.

³⁸Jesuwe lüppe yeyange lei, iman Ipheite woipu nge, hüyange imante i, “Numan-e hanghe yampu?” Iman-e jan, “Nang ümeken me ngoh nangki, rabbi?” (leppu konnyüopa)

³⁹Iye imante i, “Kei hüyange numan-e ngelak.” Tüophei me iman I pheite woi hüyange I ngohjing nge, hüyange tüonyih I phei nyoi. Hatüo shaaji ünhipak peli paji ne ngoh.

⁴⁰John ngao jaiyange, Jesu phei te woipu ni yo me ja-a Simon Peter ünao Andrew ngoh yangki.

⁴¹Mokhshe Andrew-e Ijei Simon tüo hüyange Ite i, “Toman-e Messiah tüoteki.” (leppu “Khrista.”)

⁴²Tüophei me Iye Jesu tangte Simon woipei. Jesuwe Ite lei hüyange i, “Nang John üha Simon. Nang min Cephas she nyiklak.” (Peter min jamuh, hüyange leppu, “Longnyu.”)

⁴³Üne nyih Jesuwe Galilee te tailak jingne monge tüm. Iye Philip tüo hüyange Ite i, “Ü-phei woikei!”

⁴⁴Sha-a Philip-a Andrew hei Peter ni ngohpu ching Bethsaida mepu ne ngoh.

⁴⁵Tüokhei Philippe Nathanael tüo hüyange Ite i: “Ao jeng Mosawe ngaokeng lai me nyan, hüyange ao jeng hipalanne-o nyan, toman-e tüoteki. I-a Nazareth mepu Joseph üha, Jesu.”

⁴⁶Nathanael Ite tong, “Nazareth mepu ümei ütam ngailak a?” Philippe jan, “Kei hüyange leitüoh.”

⁴⁷Aope Jesuwe Nathanael I tangte peipu nge, I jeng Iye i, “Hatüo me ütingpa Israel. Ime hanghe ümengo yenang!”

⁴⁸Nathanael-e Ite tong, “Nange hangke tao shingpu?” Jesuwe jan, “Philippe nangte nyikshao me, aope nang phukpee phangme ngoh, Taowe nang ngeyangki.”

⁴⁹Nathanael-e jan, “Konnyüopa,” “Nanga Kahwang Üha! Nanga Israel Ahngpa!”

⁵⁰Jesuwe Ite janne i, “Taowe nang te nang aope phukpee phangme ngoh Taowe ngeki she ipu jingne nange üte ütinglak nangkü a? Nange tüophei sheyong shepu toilan ngelak!”

⁵¹Hüyange Iye Ite i, “Taowe üting me inang; Numan-e wangdang epyange; hüyange Kahta Üha tangte Kahwang shongmokpalan ongpu hüyange tapu ngelak.”