Read Konyak Naga JOHN 10 Bible Online

JOHN 10 - Konyak Naga bible

JOHN 10

¹“Üting tingha me Taowe numante ipha ning: aowe nyeekhok taten kaiye ye-ong, hüyangpoi ülao yete jhotte pei, I kuhpa hüyange leihpa.

²Hüyangpoi aowe taten kaiye ongnang I nyeelan tepu nyeeyompa.

³Taten yompawe Ite ta ep tamnang, hüyange nyeelanne I ngao jainang; Iye yoi nyeelan te min me nyiknang hüyange iman woi teinang.

⁴Aope Iye yoijing nyeelan ükhok eplakei iman shaote I kemnang, hüyange nyeelan I pheite woinang hangjingne iman-e I ngao shing.

⁵Yeshingpu kahta ja phei iman yewoilak, hüyangpoi I mepu phette tailak hangjingne iman-e ngaowüng yeshing.”

⁶Jesuwe imante tüopa ngaolep i, hüyangpoi Iye hanghe i, iman-e yeshing ok.

⁷Tüokhei Jesuwe imante üne-o i, “Üting tingha me Taowe numante ipha ning: Nyeelan jingne taten-a Tao.

⁸Ülaolan üshei aoyin Ü-sheshao me pei iman kuhpa hüyange leihpalan; hüyangpoi nyeelanne imante yejaikülak.

⁹Tao taten. Ütam Tao kaiye ongma-a yinlak, hüyange yulak onglak hüyange heeijong tüolak.

¹⁰Kuhpalan kuhlak jingne, toilak jingne hüyange mengtamlak jingne hei peinang. Iman-e üyin tüolak, hüyange hatüowa wangngoiye tüolak jingne Tao pei.

¹¹“Tao nyeeyompa ümei. Nyeeyompa ümeiye nyeelan jingne yoi üyin angtamnang.

¹²Nanpa kahta, ao nyeeyompa yejema-a nyee nokpu ne yemeng, Iye aope sho peipu ngelakei, nyee tüohyange phette tainang; hüyange showe shüknang hüyange nyeelan yantam nang.

¹³I phette tainang hangne ima-a, I nanpa ja hüyange nyeelan jingne yeteihtüo.

¹⁴Tao nyeeyompa ümei: Taowe ü-nyeelan shingnang hüyange iman-e Tao shingnang;

¹⁵Hüke Üpawe Tao hangke shing hüyange Taowe Üpa shing; Hüyange nyeelan jingne ü-üyin angtam nang.

¹⁶Tüopa nyeelan phei ye-ompu üjing ülao nyeelan-o ngohnang; Taowe iman-o woipeilak hüyange iman-e ü-ngao jailak. Hüyange iman ükhong ja, hüyange nyee yompa ja ngohlak.

¹⁷“Tüojing üne Üpawe üte kennang hangjingne Taowe nishe leih-e tüolak jingne ü-üyin phanang.

¹⁸Aowe-o ü-mepu üyin yahteipu ye-ok. Hatüo ü-nying nyingke Taowe angnang. Hatüo anglak üme wong ngohnang, hüyange hatüo yahyepu oklak wong üme ngohnang. Tüopa nyinge tampu Taowe Üpa mepu tüo.”

¹⁹Üne-o hatüo ngao kaiye Jehudilan yo me teitampu ngai;

²⁰Iman maapuwe hüke i, “I me laa ngohnangki! I nganang! Hangne Ite jainangki?”

²¹Hüyangpoi ülaolanne i, “Laa ngohpu kahta jawe hüke yengao oklak! Laawe hangke mükmüopa mük eppe tamlak shi?”

²²Jerusalem me khümjing ghuwaipu mo molak hipak ngoi; hatüo eanyu ne ngoh.

²³Hüwante Solomon, nokshüm khümjing phang me Jesu kemme ngoh.

²⁴Hüwante Jehudilan I neikonne jemme ta hüyange i, “Nange hangshin ne toman nüngnei ne tamlak shi? Messiah ne jeküma-a tomante üting me ngaiye ipha?”

²⁵Jesuwe jan, “Taowe numante iyangki, hüyangpoi numan-e üte üting yelak. Taowe Üpa minme lingpu toiye üjing saki phanang;

²⁶hüyangpoi numan-e üting minlak ja hangjingne numan ü-nyeelan ne yeje.

²⁷Ünyeelanne ü-ngao jainang; Taowe iman shingnang, hüyange iman ü-pheite woinang.

²⁸Taowe imante jintepu üyin phanang, hüyange iman aope-o yelilak: hüyange aowe-o ü-yak mepu iman yenyie-oklak.

²⁹Üpawe hanghe üte pha hatüowa üshei phei sheyongpupa, hüyange Üpa yak mepu aowe-o nyiene ye-ok.

³⁰Üpa hüyange Tao ja.”

³¹Tüophei me Jehudilanne üne-o Ite shüplak jingne long toon.

³²Jesuwe imante i, “Üpawe phapu toimei maawe numan sheshao me Taowe linge hüoyangki, tüolan yo mepu ja jingne numan-e üte longe shüp hupu a?”

³³Jehudilanne Ite jan ye; “Toimei jingne toman-e nangte longe yeshüp hu, hüyangpoi nange Kahwang ye-i-yeshepu jingne! Nanga kahta ja, hüyangpoi nange Kahwang ne menghu nang!”

³⁴Jesuwe imante jan: “Taowe inang, ‘numan kahwanglan’ she numan ngaokeng me nyanyange yenang a?

³⁵Ngaolaiye hanghe i, jinte üting she toman-e shingnang: hüyange kahta aoyinte Kahwang ngaolan pha imante Iye kahwanglan she nyiknang.

³⁶Üjingnepa-a, Üpawe Tao le hüyange kahtoknyu te Tao shon. Hüma-a, Taowe Kahwang Üha she ipu jingne Taowe Kahwang ye-i-yeshe ja she numan-e iye ok?

³⁷Taowe Üpa toishao yelingpu ne mengma-a, üte üting tahlak.

³⁸Hüyangpoi Taowe tüolan lingküma-a, numan-e üte üting yelakyapoi, numan-e ü-toishaote ütinglak yah, hümme nakshih numan-e Üpa-a üme hüyange Tao Üpa me she teihlak hüyange shinglak.”

³⁹Tüokhei iman-e üne-o I pho ne ngang, hüyangpoi iman yak mepu I yin.

⁴⁰Tüophei me üne-o Jordan yengyin kaiye üwangne Johnne baptipu kente Jesu tai, hüyange tüome I ngoh.

⁴¹Kahta maawe I tangte pei. Iman-e i, “Johnne kahnyingwüngha füo hango yeling.” “Hüyangpoi Iye hatüo kahta jeng hanghe yin i üting,”

⁴²hüyange tüome ngohpu kahta maawe Ite ütinglak.