Read Konyak Naga JOHN 11 Bible Online

JOHN 11 - Konyak Naga bible

JOHN 11

¹Sha-a Mary hei Inya Martha ni nyoipu Bethani ching me Lazar she minpu kahta ja dak-e ngoh.

²Hatüo Mary aowe Youngwanpa te üpi meipu minnga pho hüyange yoi shangmin ne I ya phutte tam, hatüo ü-nao Lazar dakyangki.

³Inya Inao niye Jesute ngaolan shon. “Youngwanpa, ao te nange kennang I daknangki.”

⁴Aope Jesuwe tüopa jai Iye i, “Hatüo dakpuwe liye shonlak yeje, hüyangpoi hatüowa Kahwang müktishiwalak jingne; hatüo kaiye Kahwang müktishiwa Kahwang Üha me ngaitamlak.”

⁵Sha-a Jesuwe Martha hüyange Inao, hüyange Lazar lante ken.

⁶Tüoyangpoi aope Iye Lazar daknangki she jai, I ngohpu nyoi me yelakpe nyih ni nyoi.

⁷Tüophei me Iye pinlante i, “Teman Judea te leih yehah.”

⁸Pinlanne Ite i, “Rabbi” (konnyüopa), “Hipak üten ja hei taiteki Jehudilanne nangte longe shüpne lükyangki; hüyange nang tüoyete leih yelak a?”

⁹Jesuwe i: “Nyih ja me ghonda penme ni yeje a? Kahta ja nyihning kemma-a, I yashah yehüoja, hangjingne Iye tüopa kahtoknyu wangngai ngenang.

¹⁰Hüyangpoi kahta ja wangnyak me kemma-a I yashah hüonang, hangjingne I me wangngai yenang.”

¹¹Tüopa ngaoyang phei me Iye hüke paowe i, “Teman shümpa Lazar shiteki; hüyangpoi I shipu mepu loilak jingne Tao tainang.”

¹²Pinlanne Ite i, “Youngwanpa, I shipune mengma-a, meiye lüokülak üja.”

¹³I litepu jeng Jesuwe ngao, hüyangpoi Iye shipu wanglam inang she iman-e teih.

¹⁴Hüwante Jesuwe imante ngaiye i, “Lazar liteki.

¹⁵Hüyangpoi numan jingne Tao I phei yengoh yangpute mongmei nang, tüome nakshih numan-e ütinglak lak. Hüpoi I tangte teman taihah.”

¹⁶Thomas, nipet she nyikpupawe, I shümpa pinlante i, “Iphei jamme lilak ne teman-o tai hah.”

¹⁷Aope Jesu ngoi, mangkoksa me Lazar mu phei me nyih peli ngoiteiye ngoh.

¹⁸Bethani, Jerusalem mepu mile ni nanjing ngoh;

¹⁹hüyange Jehudilan maawe imni ünao lipu mongyoong meitamlak jingne Mary hei Martha ni tangte peiye ngoh.

²⁰Aope Marthawe Jesu peiküki she jai, I phei hüolak jingne I phette yu; hüyangpoi Mary noksa me ngoh.

²¹Marthawe Jesute i. “Nang tüome ngohshima-a, Youngwanpa, ü-nao yelihah shepu!

²²Hüyangpoi taowe shingnang shaa-o nange hanghe Kahwang mepu yulakei, Iye nangte yahphalak.”

²³Jesuwe yha te i, “Nang nao üne-o yange yelak.”

²⁴Martha jan, “Taowe shingnang, üküm nyih me yange yewante I nishe yange yekülak.”

²⁵Jesuwe yha te i, “Yange yepu hüyange üyinna Tao. Aowe üte üting laklakei I liyapoi üyin ngohlak;

²⁶hüyange aoyin üyin ngoh hüyange üte ütinglak aope-o yelilak. Nange tüopate ütinglak ya?”

²⁷Yha Ite i, “Eihya, Youngwanpa, kahtoknyu te peilak she ngohpu Kahwang Üha Messiah nang she Taowe ütinglak nang.”

²⁸Tüopa ngao iphei me Martha leihye hüyange Inao Mary jünge nyik-e hüke i; “Konnyüopa tüome ngoh nangki, hüyange Iye nangte nyik nangki.”

²⁹Aope Mary tüopa ngao jai I mamshe tümme yong hüyange I phei hüone lai.

³⁰Sha-a Jesu chingte manngai, hüyangpoi Martha phei hüoyangpu nyoi me muh I ngoh.

³¹I mongmei tamlak jingne Mary phei nok me, ngohpu Jehudilanne Mary-e mamshe tümme taipu aope nge, yha mangjongte shapne lainang she teihyange iman-o woi.

³²Aope Jesu ngohjing te Mary ngoipei hüyange I nge, I yashong me yha lamme ta hüyange i, “Youngwanpa, nang tüome ngohshihma-a ü-nao yelihahshepu.”

³³Aope yha shappu Jesuwe nge, hüyange Jehudilan aoyin yha phei jamme pei iman-o shap, I yaha me yeonge po hüyange shangepei.

³⁴Hüyange Iye iman te i, “Numan-e I ümeken me mu ei?” Iman-e jan, “Üyongpa, wenne leihu.”

³⁵Jesu shap.

³⁶Tüokhei Jehudilanne i, “Leihu Iye hangshin Ite kenpu shi!”

³⁷Hüyangpoi ütamme i, “I ümuhma, aowe mükmüopa mük eppe tam; Iye hatüo kahta li ne yetamhah shepu no?”

³⁸Tüophei me, nishe Jesute powe pei, I mangjong te yu, hüyange mangkoksa-a longe küpyangpu longsa ne ngoh.

³⁹Jesuwe ngaophawe i: “Longkhao nowe wintüoh!” Lipupa ünya Marthawe Ite i, “Youngwanpa, I liphei me nyih peli, shaaji namteiye ngohkülak!”

⁴⁰Jesuwe yhate i, “Nange ütinglakma-a Kahwang müktishiwapu ngelak üja she Taowe nangte ye i a?”

⁴¹Tüokhei iman-e longkhao nowe win. Jesuwe nganne lei hüyange i: “Opa, nange üte jaipu jingne, Taowe nangte minyongpu pha nangki.

⁴²Taowe shingnang nange jinte üte jainang, hüyangpoi tüome yonge ngohpalan jingne Taowe nang te tüopa ngao inang, hümme nakshih nange Tao shon she iman-e ütinglak lak.”

⁴³Iye tüopa ngao iyangphei me Iye üngwünne nyik, “Lazar, ngaikei!”

⁴⁴Litepu kahta lüowe, ya hei yak me pengkhai nye nyeihyange, hüyange I sheta me nyelümyange ngai. Jesuwe imante i, “Ite lantamtüoh.” “Hüyange taine tam tüoh.”

⁴⁵Jehudilan maawe Mary phei hüone peipu lanne Jesuwe hanghe ling nge, hüyange Ite ütinglak.

⁴⁶Hüyangpoi iman yo me ütam Phariseelan tangte leihye hüyange Jesuwe hanghe ling imante i.

⁴⁷Tüokhei Phariseelan hüyange ngengpa üjenglan, ngao ipalan phei jamshe jem hüyange i: “Teman-e hang linglak shi? Hatüo kahtawe kahnyingwüngha füo üshei lingnangki!

⁴⁸Teman-e I hüke angne tamma-a, kahta liliye Ite ütinglak lakyang, hüyange Rome lan peiye teman nyoi hüyange teman kahtok meng phalak.”

⁴⁹Hüpoi Kaifas she minpu, iman yo me ja, tüopa wang Ütahpa Ngengpa ne mengpu pawe hüke i: “Numan-e hango yeshingpu yang!

⁵⁰Hüyange numan jat üshei mahpu phei-a, kahtalan jingne kahta ja lipu numan jingne shemeipu she numan-e yeteih.”

⁵¹Hatüo ngao Iye mongpu shaha me ipu ne yeje; hüyangpoi tüopa wang I ütahpa ngengpa ne menge, jat hei li jingne Jesu lilak yang,

⁵²hüyange jat hei li shaha yeje, hüpoi yanne ngohpu Kahwang halan Iye shaijemlak jingne Iye tüopa hi-ngao ngaoyangki.

⁵³Tüokhei tüonyih memuh Jehudilanne I toilak kon yam.

⁵⁴Tüokhei Judea me Jesu Jehudilan yome ütahte ngaiye yekem ok, hüyangpoi tüohyange Ephraim she minpu wanwüng nyoijing ja te I tai, hatüo me pinlan phei I ngoh.

⁵⁵Jehudilan Yinyepu mo owe pei, hüyange yoi kahtok mepu kahtalan maawe, mo sheshao me jaopu mo linglak jingne Jerusalem te tai.

⁵⁶Iman-e Jesu lei, hüyange iman khümjing me jemwante hüke teingaowe i, “Nange hangke teihnangki? Ütingme I tüopa mo te yepei külak heiya peiya lak?”

⁵⁷Ngengpa üjenglan hüyange Phariseelan ütamme Jesu ngohjing shingma-a Iye mamshe ngao phatüoh, hüyange I pholak she ngao phawe i.