Read Konyak Naga JOHN 12 Bible Online

JOHN 12 - Konyak Naga bible

JOHN 12

¹Yinyepu mo ngoi eipe nyih wok ngohwante, Lazar, Jesuwe lipu mepu yange yetampu ngohjing Bethani te Jesu pei.

²I jingne iman-e tüome yaning nük hahlak tüm, hüyange Marthawe namnowe phawante, Lazar Jesu phei khao me shotte ngoh.

³Hüwante Mary-e yeonge üpe meipu hüyange pheei wanpu minnga ümei toktang nanjing peiye Jesu yate pho hüyange yha shangmin phei Jesu ya shütte tam. Minnga üpe meipuwe noksa maa.

⁴Hüyangpoi Jesu pin yo mepu ja, Judas Iskariot, aowe I lotamlak; Iye i,

⁵“Hatüo minnga ngin gho lüm te yaoyange hangne toihalante yepha pushi?”

⁶Iye tüopa ngao toihalan teihyange ngaopune yeje, hüyangpoi I kuhpa, hüyange Iye yahhümpu ngin shao Ime ngoh.

⁷Hüyangpoi Jesuwe i: “Yha shaha angne tamtüoh. Yhawe hanghe ngoh tüophei ü-mu nyihpu jingne yha-e min angyah.

⁸Hangjingne toihalan numan phei jinte ngohnang, hüyangpoi Tao numan phei jinte yengoh külak.”

⁹Jehudilan ükhong üyong Bethani me Jesu ngohnang she jaiye iman tüoyete wen; Jesu shaha jingne yeje, hüyangpoi Jesuwe lipu mepu yange yetampu Lazar te-o leilak jingne pei.

¹⁰Tüokhei ngengpa üjenglanne Lazar-o toilak jingne taisheng.

¹¹Hangjingne I jeng me Jehudilan yeonge iman woipa tüohyange Jesute ütinglakpu ngai.

¹²Üne nyih Yinyepu mo te peipu ükhong üyonge Jerusalemte Jesu peiküki she jai.

¹³Tüokhei iman-e lokyak jonyange Iphei hüone hüke üngwünne pei, “Hosanna! Youngwanpa min me ao pei Kahwange Ite moimantüoh! Kahwange Israel Ahngpate moiman tüoh!”

¹⁴Jesuwe gado üha ja tüo hüyange tüome shot, laingaowe ipukih:

¹⁵“Tahnyam, Zion hayim! Leihuyah, gado üha me shotyange numan ahngpa sha-a peiküki.”

¹⁶I pinlanne hüwante hatüo jeng yeshing; hüyangpoi aope okpu ngeye Jesu yange ye, laingaowe hatüo iyangki, hüyange iman-e hatüo jingne lingyangki she shing.

¹⁷Iye mangjong mepu Lazar yange yetamwante ngohpu ükhonge tüopa jeng saki pha.

¹⁸Iye tüopa kahnyingwüngha füo lingyangki she jaiye ükhong I phei hüone pei.

¹⁹Tüophei me Phariseelanne hüke teingaowe i, “Leihu, teman-e hango okpu ye-ngepu yang! Leitüoh, kahtoknyu üshei I phei te woiteki!”

²⁰Sha-a mo hipak me yoplak jingne Jerusalem te taipu yo me Greeklan ütam ngoh yangki.

²¹Tüokhei Galilee mepu Bethsaida kahta Philip tangte iman pei, hüyange hüke i, “Üyongpa, toman-e Jesu phei hüohu nangki.”

²²Philip taiye Andrew te i, hüyange imni peiye Jesute i.

²³Jesuwe imante janne i, “Kahta Üha müktishiwalak hipak ngoiteki.

²⁴Üting tingha me Taowe numante ipha ning, tahlick ükek ja kahtokte yeiye yelima-a, I tahkek ja nehei ngoh-e shonlak; hüyangpoi I lima-a, Iye ülick maawe licklak.

²⁵Aowe yoi üyinte kenlakei mahlak, hüyangpoi aowe tüopa kahtoknyu me yoi üyinte nulakei Iye jintepu üyin jingne tüonang.

²⁶Aoyinne üshaoshanhu nang, ü-phei te woilak wongpong, hüyange Tao ümeken me ngoh iman ü-phei ngohlak. Aowe ü-shaoshan, Üpawe I yihnoonlak.

²⁷“Sha-a ü-üyin yaha shangnang, hüyange Taowe hang ilakshi? Opa, hatüo hipak mepu Tao yinpha! Tüoyangpoi tüopa hipak jingne hatüo me Tao peiyangki.

²⁸Opa, nang min müktishiwatüoh!” Tüophei me wangmepu ngao ja pei, “Taowe hatüo müktishiwa yangki, hüyange Taowe hatüo nishe müktishiwalak.”

²⁹Tüome yonge ngohpu ükhonge i, “Hatüowa wangkhong puyang!” Ülaolanne i, “Wangdang shongmokpa lanne Ite ngao nangki!”

³⁰Hüyangpoi Jesuwe imante i: “Hatüo ngaowe ipuwa üjingne yeje numan jingne inang.

³¹Kahtoknyu ngaophünlak sha-a hipak; kahtoknyu wanglam lampalan sha-a yeitamlak.

³²Hüyange aope Tao tüopa kahtok mepu no-inlakei, Taowe kahtalan üshei shui inlak.”

³³Tüopa ngao ipu kaiye hangkihpu shange pongpu phei I lilak tüopa jeng inang.

³⁴Ükhonge hüke janne ye: “Messiah jin jinte ngohlak she toman ngaokenge inang, hümma-a Kahta Üha no-inlak she nange hangke ipu? Hatüo Kahta Üha ao shi?”

³⁵Jesuwe janne i, “Hipak ütenhapu jingne wangngai numan phei ngohlak. Wangnyakke numan yemahlak jingne numan me wangngai ngohwante kemtüoh. Aowe wangnyak me kemnang, ümeken me kemnang Iye yeshing.

³⁶Numan me wangngai ngohwante, wangngai ühalan ne menglak jingne, wangngai te ütinglakyah.” Jesuwe tüolan ngao iyangphei me yanne tai hüyange I nying nyingke iman sheshao mepu lo.

³⁷Iman phinme teshinne kahnyingwüngha füo lingyapoi iman-e Ite üting yelak,

³⁸tüokaiye Isaia hipawe ngaoyangpu ütingne menge pei: “Youngwanpa, aowe toman ngaolan te ütinglak? Ao te Youngwanpawe I wong ütahte ngai hüo?”

³⁹Hangjingne tüojingne iman-e üting yelak, tüokhei Isaiawe üne-o hüke i:

⁴⁰“Iye iman mükmüone tamyangki! Iye iman mong küpne tam, tüojingne iman mükke ye-nge, iman monge hango yeshing, hüyange Taowe iman meitamlak jingne iman ü-tangte yelüplak.”

⁴¹Iye Jesu müktishiwapu nge, hüyange Isaiawe I jeng ngaoyangki.

⁴²Jehudi woipalan maawe Jesute üting lakyangki; hüyangpoi Phariseelan shaote nyampu nanjingne ütahte ngaiye iman-e yengao, hümme nakshih iman synagogue mepu jange yeteilak;

⁴³hangjingne iman-e Kahwang mepu yihlupu pheiya kahta mepu yihlupu leng.

⁴⁴Jesuwe hüke üngwünne i: “Aowe üte ütinglakyapeih, ü-shaha te yeje hüpoi aowe tao shon Ite ütinglak tüoh.

⁴⁵Aowe Tao nge, Tao shonpupa-o ngenang.

⁴⁶Tao wangngai, hüyange üte ütinglakpu üshei wangnyak me yengohlak jingne Tao kahtoknyu te peiyangki.

⁴⁷Ütamme ü-ngao jai hüyange yejonpe ngohma-a, Taowe Ite ngao yephünlak; hangjingne Tao kahtoknyu ngao phünlak jingne yeje, hüyangpoi kahtoknyu yinlak jingne pei;

⁴⁸Aowe Tao yeyahlakei hüyange ü-ngao yeyahlakei Iye ngaophünpu tüolak. Taowe Ite ngaoyangpu ngaowe üküm nyih I ngao phünlak.

⁴⁹Hangjingne Taowe üwonge ngaopu hango yenang, hüyangpoi aowe Tao shon, Üpa Iye, Taowe hanghe ngaolak hüyange ilak üte phayangki.

⁵⁰Hüyange Taowe shingnang I ngaokeng kaiye jintepu üyin peitam nang. Taowe hanghe ngao, Üpawe üte hangke ngao tüo hei hüke ngaonang.”