Read Konyak Naga JOHN 14 Bible Online

JOHN 14 - Konyak Naga bible

JOHN 14

¹“Numan mong tahpai. Kahwang te ütinglak tüoh; üte-o üting lakyah.

²Üpa nok me nyoi mawe ngohnang, hüke yenang shihma-a Taowe numante ihah shepu, Tao numan jingne nyoijing tümne tainang!

³Hüyange Tao taiye numan jingne nyoijing tümküma-a, Tao leih yelak, hüyange Taowe numan ü-phei teilak, Tao ümeken me ngoh tüoken me numan-o ngohlak.

⁴Hüyange Tao ümekente tailak ülam numan-e shingnang.”

⁵Thomas Ite i, “Youngwanpa, nang ümekente tai toman-e yeshing; toman-e tailam hangke shinglak?”

⁶Jesuwe Ite i, “Lamnyu hüyange ütingpa hüyange üyinna Tao. Tao yekai ma-a Üpa tangte aowe-o peine ye-ok.

⁷Numan-e Tao shingma-a, numan-e Üpa-o shinglak. Sha-a muh numan-e I shingteki hüyange ngeteki.”

⁸Philip-e Ite i, “Youngwanpa, toman te Üpa hüopha, hüyange toman jingne wanglak.”

⁹Jesuwe Ite i, “Philip, Tao numan phei hüshinne ngohyahpoi, nange Tao yeshing a? Aowe Tao ngeyangki Iye Üpa ngeyangki. ‘Tomante Üpa hüopha she’ nange hangke ipu?

¹⁰Tao Üpa me ngohnang, hüyange Üpa üme ngohnang she nange üting yelak a? Taowe hanghe ngao numante inang, ‘Ü-nying nyingke ngaopu ne yemeng.’ Hüyangpoi Üpa ü-phei ngohyange Iye toi lingnang.

¹¹Tao Üpa phei ngohnang hüyange Üpa ü-phei ngohnangshe ü-ngaote üting lakyah. Yejema-a, toishaolan jingne nehoi üting lakyah.

¹²“Üting tingha me Taowe numante inang: Aowe üte ütinglak nang, hanghe toi Taowe ling, Iye hatüo linglak, hüyange tüolan toiphei sheyongpu Iye linglak: hangjingne Tao Üpa tangte tailak.

¹³Hüyange numan-e ü min me hangyin yulakei, hatüo Taowe linglak, tüokhei Üpa müktishiwapu Üha kaiye hüolak.

¹⁴Numan-e üte ümin me hanghe yulakei, hatüo Taowe linglak.”

¹⁵“Numan-e üte kenma-a ü-ngaokenglan numan-e jonlak.

¹⁶Taowe Üpate yulak, hüyange numan phei jinte ngohlak jingne Iye numante ülao nyüolei jampa ja phalak.

¹⁷Hatüowa ütingpa Yaha, kahtoknyuwe I yeyah, hangjingne kahtoknyuwe I ye-nge, hüyange shingo yeshing. Hüyangpoi numan-e I shing, hangjingne I numan phei ngohnang, hüyange numan me ngohlak.

¹⁸“Taowe numan khahlei-e ye-anglak; Tao numan tangte leih yekülak.

¹⁹Kenja ngohyang phei me, shaaji kahtoknyuwe Tao ye-ngelak; hüyangpoi numan-e Tao ngelak: hüyange Tao üyin me ngohpu jingne, numan-o üyin ngohlak.

²⁰Hatüo nyih me Tao Üpa me, numan üme hüyange Tao numan me ngohnang she numan-e shinglak.

²¹“Aowe ü ngaokenglan shingnang hüyange angnang, I üte kenpupa. Hüyange aowe üte kennang, Üpawe Ite kenlak, hüyange Taowe Ite kenlak, hüyange Taowe ü-nying nyingke Ite ütahte ngaiye hüolak.”

²²Judas (Judas Iskariot ne yeje) Ite i, “Youngwanpa, hangne tomante nang nying nyingke ütahte ngaiye hüoyange, hüyange kahtoknyu te yehüolak?”

²³Jesuwe Ite janne i: “Ütam-e üte kenma-a, Iye ü-ngao jailak. Üpawe Ite kenlak, hüyange toman I tangte peilak, hüyange I phei ngohlak.

²⁴Aowe üte yeken Iye ü-ngao yejai. Numan-e hanghe ngao jainang, hatüo ü-ngao ne yeje, hüyangpoi aowe Tao shon tüopa Üpa mepu.

²⁵“Tao numan phei ngohwante muh tüolan ngao Taowe numante ngaoyangki.

²⁶Hüyangpoi jampupa, Yaha Üjao ao Üpawe ü-min me shonlak, Iye numante üshei nyüoleiphalak, hüyange Taowe numante iyangpu üshei teihtam phalak.

²⁷“Chingmei, Taowe numan phei angnang; ü-chingmei Taowe numante phanang. Kahtoknyuwe phapuke Taowe numan te yepha. Numan mong tahshang hüyange tahnyam.

²⁸‘Tao, tailak hüyange numan tangte üne-o yelak,’ she Taowe numante ipu jaiyangki. Numan-e üte kenshima-a, numan mongmei hahshepu, hangjingne tao Üpa tangte tainang, hangjingne Üpa ü-phei sheyongpupa.

²⁹Hüyange aope hipak ngoilakei numan-e ütinglaklak jingne, tüolan khongküm ngaishao me, sha-a Taowe numante iyangki.

³⁰Taowe shaaji numan phei maawe min ngao, hangjingne tüopa kahtok wanglam lampa peiküki. I ü tangme wong yenang.

³¹Hüyangpoi Taowe Üpate kennang she kahtoknyuwe shinglak wongpong; tüokhei Üpawe hanghe lingne tam Taowe ling. “Yongtüoh, teman sha-a taihah.”