Read Konyak Naga JOHN 15 Bible Online

JOHN 15 - Konyak Naga bible

JOHN 15

¹Tao ütingpa wu, hüyange hampa-a Üpa.

²Üme ngohyange ülick yelickpu üqui lili Iye yahtei nang, hüyange ülick lickpulan üqui ülick sheyong she licklak jingne Iye jaowe lingnang.

³Taowe ngaoyangpu ngao kaiye numan shaaji jaoteki.

⁴Üme ngohyah hüyange Tao-o numan phei ngohning. Üwu me yengohküma-a, hangke üquiye ülick yelick ok, hatüokih, ü-phei yengohküma-a, numane-o ülick yelick lak.

⁵“Tao üwu, numan üquilan. Ao üme ngohnang, hüyange Tao I me ngoh, hatüowe ülick maawe licknang, hangjingne ü-mepu yanne numan-e hango yeling ok.

⁶Ütam ü me yengohküma-a, peequi lange winpu kih winnang; hüyange wannang, moi yonang, hüyange vünte jakke shunang.

⁷Numan üme ngohküma-a hüyange ü-ngao numan me ngohküma-a, numan-e hangyin lengyapeih yuyah, hüyange hatüo numante linglak.

⁸Numan-e ülick maawe lickke, hüyange ütingpa ü pinlan she hüowante Üpa müktishiwa nang.

⁹Üpawe üte hangke ken Taowe-o numante hüke kennang. Ü yayeng me yelakpe ngohyah.

¹⁰Hangke Taowe Üpa ngaokeng jon, hüyange I yayeng me ngoh, hatüoke numan-e ü-ngaokeng jonma-a, numan ü-yayeng me ngohlak.

¹¹“Ü-mongmeipu numan me ngohlak, hüyange tüopa mongmei wangngoilak jingne, Taowe numante tüolan ngao yangki.

¹²Hatüo ü-ngaokeng Taowe numante hangke ken, hüke numan teikenyah.

¹³Kahta jawe yoi shümpa jingne üyin phünne phapu tokte üyongpa kenpu hango yenang.

¹⁴Taowe numante phapu ngaokeng numan-e lingma-a, numan ü-shümpalan.

¹⁵Taowe shaaji numante shaoshanpa she yenyik; hangjingne yoi nokpupawe hanghe ling hatüo shaoshanpawe yeshing. Hüyangpoi Taowe numante shümpa she nyiknang, hangjingne Üpa mepu Taowe hanghe jai üshei Taowe numante iyangki.

¹⁶Numan-e Tao leye ngaipu ne yeje, hüyangpoi Taowe numan leye ngai, hüyange numan taiye ülick licklak jingne hüyange ülick ngohlak jingne Taowe numan le. Tüokhei numan-e ü-min me Üpate hangyin yulakei, Iye numante yahphalak.

¹⁷Hatüo Taowe numante ngaokeng phanang: Jawe ja te teikenpu ngohyah.”

¹⁸“Numante kahtoknyuwe nupu ne mengma-a, üte üwangne nuyangpu she numan-e shingyah.

¹⁹Numan kahtoknyu jingne mengma-a, kahtoknyuwe I jingte kenhah shepu. Hüyangpoi kahtoknyu mepu Taowe numan lenang, hüyange numan kahtoknyu jing yeje; tüokhei kahtoknyuwe numante nunang.

²⁰‘Shaoshanpa ja I nokpu phei sheyongpu yeje;’ she Taowe ipu teihtüoyah. Iman-e üte shaoshi ne tamma-a, iman-e numante-o shaoshi tamphalak; iman-e ü-ngao jai ma-a, iman-e numante-o jai phalak.

²¹Hüyangpoi ümin jingne iman-e numante tüo lili lingphalak, hangjingne Tao shonpupa iman-e yeshing.

²²Tao peiye imante yengao shihma, iman ünu yengoh hahshepu. Hüyangpoi sha-a iman ünu jingne tailak lam yenang.

²³Aowe üte nunang, Üpate-o nunang.

²⁴Aowe-o yelingpu toi iman yo me Taowe yeling shihma-a, iman ünu yenanghah shepu; hüyangpoi iman-e ütoishao ngeyangki hüyange Üpa hüyange Tao moini te nu.

²⁵Hüyangpoi iman-e jajangjawe üte nu, she ngaokeng me nyanne ngohpu ngao ngailak jingne tüo ngainang.

²⁶“Hüpoi aope jampupa peilakeih, ütingpa yaha ao Üpa mepu pei; ao Taowe numante Üpa mepu shon, Iye üjingne saki phakülak.

²⁷Hüyange numane-o ü saki ne menglak hangjingne numan-e ü-phei üwangne muh ngohyangki.”