Read Konyak Naga JOHN 16 Bible Online

JOHN 16 - Konyak Naga bible

JOHN 16

¹“Numan leamme taipu mepu yinlak jingne Taowe numante tüoyin ngaoyangki;

²Iman-e numan synagogue mepu teiphalak: Eiyang, aowe numan toilakei, Iye Kahwang toi lingnang she teihlak hipak peiküki.

³Iman-e Üpa jeyah yejema-a Tao jeyah yeshingpuwe tüoyin iman-e linglak.

⁴Hüyangpoi aope tüoyin ngailak jingne hipak peilakeih, tüolan jingne Taowe ngaopha yangki she numan-e teihtüolak jingne Taowe tüolan ngao numante inang. “Üwangne muh taowe numante tüoyin ye i, hangjingne Tao numan phei ngoh.”

⁵Hüyangpoi Tao sha-a aowe Tao shon I tangte tailak. Hüyange numan aowe-o “Nang hang taiki?” she yetong;

⁶hüyangpoi Taowe numante tüoyin ngaoyangpu jingne, numan mongjang mongmenge maateki.

⁷Hüyangpoi Taowe numante üting inang: numante meilak jingne Tao taipu shemei, hangjingne Tao yetaiküma-a, numan tangte jampupa yepeikülak; hüyangpoi Tao taima-a, Taowe numan tangte I shonlak.

⁸Aope I peilakeih, Iye kahtoknyu ünu jeng hüyange khakshupu hüyange ngaophünpu saki phalak;

⁹Hüyange ünu jeng hangjingne iman-e khakshupu jingne üte üting yelak;

¹⁰hangjingne Tao Üpa tangte tainang hüyange numan-e shaaji Tao ye-ngelak;

¹¹hangjingne tüopa kahtoknyu wanglam lampalan ngao phünyangki.

¹²“Taowe numante yeonge ilak ngohnang, hüyangpoi numan-e tüopa sha-a yenün oklak.

¹³Hüpoi aope I, ütingpa Yaha, peilakeih Iye ütingpa lam üshei me woiphalak: hangjingne Iye yoi wong phei yengaolak, hüyangpoi Iye hanghe jai Iye ngaolak, hüyange ngoikülak toi Iye numante iphalak.

¹⁴Iye Tao müktishiwa tamlak hangjingne Iye numante hanghe ngaolakei Iye üjing hanghe ngoh tüomepu yah lak.

¹⁵Üpa me hanghe ngoh üshei üjing; tüokhei Taowe iyangki Iye üjing mepu yahlak hüyange numante iphalak.”

¹⁶“Hipak ütenja ngohyange shaaji numan-e Tao ye-ngelak; hüyange tüophei me hipak üten ja ngohyang phei me numan-e Tao ngelak.”

¹⁷I pinlan ütamme hüke teitonge i, “ ‘Hipak üten ja ngohyange, numan-e Tao ye-ngelak; üne-o hipak ütenja phei me numan-e Tao ngelak? Hangjingne Tao Üpa tangte tainang;’ hatüo Iye hangte leppune ipu shi?”

¹⁸Tüokhei iman-e i, “ ‘Hipak ütenja ngohyange’, Iye hatüo hanghete leppu? Iye hanghe ngaopuweih teman-e yeshing!”

¹⁹Iman-e Ite tonghupu Jesuwe shing, hüyange imante i, “Numan pa me hanghe jeng teitongpu shi? Taowe numante ‘Hipak ütenja ngohyange numan-e Tao ye-ngelak; üne-o hipak ütenja ngohyange numan-e Tao ngelak,’ she iyangpu jingne hei?

²⁰Üting tingha me Taowe numante ipha ning, numan-e shaplak hüyange yoonglak, hüyangpoi kahtoknyuwe mongmeilak; numan-e mongmenglak, hüyangpoi numan mongmeng mongmei ne lüplak.

²¹Aope sheko jawe moipai ne hipak ngoi, yha mongmeng nang; hangjingne yha shaoshilak hipak ngoipei; hüyangpoi aope naha wangngai nge, yhawe yoi shaoshipu pemah nang, hangjingne nahaja kahtoknyu wangngai ngepu jingne yha mongmeinang.

²²Numan-o sha-a mongmenge ngoh nang; hüyangpoi Taowe numan nishe leilak, hüyange numan mongjang mongmeilak, hüyange aowe-o numan mepu mongmei yah yeteilak.

²³“Tüonyih numan-e üte hango yetonglak. Üting tingha me Taowe numante ipha ning, numan-e Üpate ü-min me ülam ja nehoi tongma-a hatüo Iye numante yahphalak.

²⁴Sha-a ngoipu mongme numan-e ümin me hango mantong (manyu) yutüoh hüyange numan-e tüolak, tüome numan mongmei wangpu oklak.”

²⁵“Taowe numante ngaoleppu me tüolan ngaoyangki. Hipak ja peiküki aope Taowe numante hüke yengaolak, hüyangpoi Taowe numante Üpa jeng ngaiphaih-e ilak.

²⁶Tüonyih numan-e ü min me yulak, hüyange numan min me Taowe Üpate yupha ning she Taowe ye i.

²⁷Hangjingne Üpa Iye numante kennang, hangjingne numan-e üte ken hüyange Tao Kahwang mepu pei she ütinglak.

²⁸Tao Üpa mepu ngai, hüyange Tao kahtoknyu te peiyangki. Üne-o Taowe kahtoknyu tüoh nang hüyange Tao Üpa tangte tainang.”

²⁹I pinlanne i, “Leiyah! Sha-a nange leppume yengaope, ngaiphaih-e ngaonang.

³⁰Sha-a nange khongküm shingnang she toman-e shingnang, hüyange aowe-o nang te tonglak wongpong ne yeje; tüo kaiye nang Kahwang mepu pei she toman-e jan.”

³¹Jesuwe imante jan, “Sha-a numan ütinglak nangkü a?

³²Leitüoh, hipak ja peiküki, hüyange peiteki, aope numan, yoi yoi ching te jaja yanlakei, hüyange ü-shaha tüohlak: hüyangpoi ü-shaha ne yejelak, hangjingne Üpa ü-phei ngoh nang.

³³“Ü-phei numan chingmei ngohlak jingne, Taowe numante tüoyin, ngaonang. Kahtoknyu me numan shaoshilak. Hüyangpoi wongnang yah, Taowe kahtoknyu okyangki.”