Read Konyak Naga JOHN 17 Bible Online

JOHN 17 - Konyak Naga bible

JOHN 17

¹Aope Jesuwe tüolan ngaoyapeih, tüophei me Iye wangdang yete nganne lei hüyange i, “Opa, hipak ngoiteki, nang Hawe nang müktishiwa tamlak ne nang Ha müktishiwa tamtüoh;

²shaaji nange Ite phayangpu üshei te jintepu üyin phalak jingne, kahta üshei tangme nange Ite wongpha.

³Hüyange hatüowa jintepu üyin, iman-e nang shaha ütingpa Kahwang she shinglak, hüyange nange ao shon tüopa Jesu Khrista.

⁴Nange üte lingne tampu toi shopu kaiye kahtoknyu me Taowe nang müktishiwa tamyangki.

⁵Tüokhei sha-a O Opa! Kahtoknyu manling wante nangphei ngohwante Tao hanghe müktishiwa ngoh hatüo müktishiwa nange yoi phei Tao müktishiwa tampha.

⁶“Kahtoknyu kahtalan aoyin nange üte pha, imante Taowe nang min ütahte ngaitam. Iman-a nang jing, nange iman üte pha, hüyange iman-e nang ngao angnang.

⁷Sha-a nange üte pha yangpu üshei nang mepu pei she iman-e shing;

⁸hangjingne nange üte phapu ngaolan Taowe imante pha, hüyange tüolan iman-e yah, hüyange Tao nangmepu pei she iman-e ütingme shing, hüyange nange Tao shon she iman-e ütinglak.”

⁹Taowe iman jingne hei yopnang. Taowe kahtoknyu jingne yeyop, hüyangpoi aoyin nange üte pha, hangjingne iman-a nang jing.

¹⁰Üjing üshei nang jing hüyange nang jingne ngohpu üshei üjing, hüyange iman me Taowe müktishiwa yangki.

¹¹Tao shaaji kahtoknyu me yenanglak, hüyangpoi iman kahtoknyu me, hüyange Tao nang tangte peinang. Üjaopa Opa, nange hangyin üte pha, nang min me iman angtüoh, hümme imane-o teman kih ja ne menglak.

¹²Tao aope iman phei ngoh, nange hanghepa üte pha, Taowe nang min me iman angyangki, hüyange Taowe iman yomyangki, hüyange ngaolai ütahte ngailak jingne mahlak jingne nyingyangpu ha tokte kaiye ao-o yemah.

¹³Sha-a Tao nang tangte peinang, hüyange Taowe tüolan kahtoknyu me ngaonang tüome nakshih iman me wang ngoine tampu ü-mongmei ngohlak.

¹⁴Taowe imante nang ngao phayangki, hüyange kahtoknyuwe imante nuwe tam, hangjingne Tao kahtoknyu jing yejepu kih iman-o kahtoknyu jing yeje.

¹⁵Kahtoknyu mepu iman yahteilak jingne Taowe nangte yoppu yeje, hüyangpoi nange iman ümengpa mepu tükyah.

¹⁶Tao kahtoknyu jing yejepukih, iman-o kahtoknyu jing yeje.

¹⁷Ütingpa te iman phünne phatamshi. Nang ngaowa üting.

¹⁸Nange Tao kahtoknyu te shonpukih, Taowe-o iman kahtoknyute shonyangki.

¹⁹Hüyange imane-o ütingpa te phünne phatamlak jingne, iman jingne Taowe ü-nying nyingke phünne phayangki.

²⁰“Taowe hatüolan jingne shaha yeje, hüyangpoi iman ngao kaiye aoyinne üte ütinglak iman jingne yopnang.

²¹Nang kih-e, iman üshei ja ne mengtamshi; Opa, nang üme hüyange Tao nang me, hangjingne nange Tao shon she kahtoknyuwe ütinglak lak jingne, iman-o teman phei ngohne tamshih.

²²Teman hangke ja ne ngoh hüke iman-o ngohlak jingne, nange üte phapu müktishiwa Taowe imante phayangki!

²³Tao iman me hüyange nang üme, nange Tao shon she kahtoknyuwe shinglak jingne, hüyange nange üte hangke ken hüke nange imante-o ken she shinglak jingne iman ja ne manmeng manmeng wang ngoiye tamshih.

²⁴“Opa, Tao ümeken me ngohlakei tüoken me ngohlak jingne, nange üte hünghao ne phapu tüolan kahta ü-phei ngohne tamhunangki, hümme nakshih kahtoknyu lingshao me nange üte kenpu jingne phapu ü-müktishiwa iman-e ngelak.

²⁵Üjaopa Opa, kahtoknyuwe nang manshing, hüyangpoi Taowe nang shingteki, hüyange tüolan kahtawe nange Tao shon she shingteki.

²⁶Taowe imante nangmin shingne tamyangki hüyange shingne tamlak, hümme nakshih nange üte kenpu iman me ngohpu oklak, hüyange Tao iman me ngohlak.”