Read Konyak Naga JOHN 18 Bible Online

JOHN 18 - Konyak Naga bible

JOHN 18

¹Aope Jesuwe tüolan ngaowe sho, yoi pinlan phei Kidron yengtuh kaiye tai. Tüoye me pesha ja ngoh, hüyange I hei yoi pinlan tüopa te ong.

²Sha-a Judas, aowe I lowetam, Iye-o tüopa nyoi shinge ngoh hangjingne Jesuwe yoi pinlan phei yelakpe tüopa me hüowe ngoh.

³Judaswe kengphet hei ngengpa üjenglan mepu ütam hüyange Phariseelan, woiyange vüntük, ayeng hei yonglah jonyange woipei.

⁴Hüwante Jesuwe Ite peingoilak khongkümpu shing, shaoyete ngai hüyange imante i, “Hanghe jingne numan-e ao yampu shi?”

⁵Iman-e Ite jan, “Nazareth mepu Jesu.” Iye imante i, “Tao I.” Judas, aowe I lowe tam, I-o iman phei yonge ngoh.

⁶Aope Jesuwe imante i, “Tao I,” iman tokphei yete shin ye hüyange kahtok me haowe ta.

⁷Tüokhei Iye imante nishe tong, “Hanghe jingne numan-e ao yampu shi?” Iman-e i, “Nazareth mepu Jesu.”

⁸Jesuwe janne i, “Tao I she Taowe numan te iyangki. Tüoyangpoi numan-e Tao yampune mengma-a, tüolan kahta taine tamtüoh.”

⁹“Opa, nange üte phayangpu ja nehoi Taowe yemahtam,” she ngaolai me Iye iyangpu ütahte ngailak jingne Iye i.

¹⁰Hüwante Simon Peter ao me yanglow ngoh, teakke yah, ütahpa ngengpa rhapa te müt hüyange I yakjah ye na lange win. Tüopa rhapa min Malkhas ngoh.

¹¹Jesuwe Peterte i, “Yanglow shankhong (yangleaplak) me leaptüoh. Üpawe üte phayangpu wan Taowe yeyinglak a?”

¹²Tüokhei iman woipa phei kengphetlan hüyange Jehudi yompalanne Jesu pho. Ite sha,

¹³hüyange üwangne iman-e I Annas ao Kaifas üküo, tüowangpe ütahpa Ngengpa ne ngoh Itangte yahtei.

¹⁴Kahtalan jingne kahta ja lipu meilak she Jehudilante Caiaphaswe konphawe ngoh yangki.

¹⁵Simon Peter hüyange ülao pin ja Jesu pheite woi. Tüopa pin ütahpa ngengpawe shinge ngoh, hüyange I ütahpa ngengpa nokshüm te Jesu phei ong.

¹⁶Hüyangpoi Peter nokshao me tafün shongme yonge ngoh. Tüokhei ülaopa pin, ao ütahpa ngengpa phei teishingpu ngoh, nokshaote yu hüyange taten me ngohpu sheko phei ngao, hüyange Peter woi in.

¹⁷Taten me ngohpu yhawe Peterte i, “Nango tüopa kahta pin yo me ja a?” Iye i, “Tao yeje.”

¹⁸Sha-a rhapalan hüyange yompalanne vünhan phei vün jak hangjingne wangshümpu ngoh hüyange iman vünlüm meiye yonge ngoh. Peter-o iman phei vünlüm meiye yonge ngoh.

¹⁹Ütahpa ngengpawe Jesute I pinlan hüyange I nyüopu jeng tong.

²⁰Jesuwe Ite jan, “Taowe kahtoknyu te ngai phai-e ngaoyangki. Taowe jinte synagogue me hüyange khümjing me, ümeken me Jehudilan jem tüoken me nyüoyangki; hüyange Taowe lowe hango yengao.

²¹Hangne nange üte tongki? Taowe imante hanghe iyangki, üte jaipalante tongtüoh. Taowe hanghe i iman-e shingnang.”

²²Aope Iye hatüo i, yonge ngohpu yompa jawe Jesu sheta te yakpha leiyange i, “Ütahpa ngengpa te nange ngao hüke janlak a?”

²³Jesuwe Ite jan, “Taowe püohwe ngaoyangküma-a, püohpu saki yahkei; hüyangpoi shuwe ngaopu ne mengma-a, hangne üte shet ki?”

²⁴Tüophei me Annaswe shayange muh ütahpa ngengpa Kaifas tangte I shontei.

²⁵Sha-a Simon Peter vünlüm meiye muh yonge ngoh. Iman-e Ite i, “Nango I pinlan yo me ja a?” Iye yejanpe lanne i, “Tao yeje.”

²⁶Ütahpa ngengpa rhapa yo me ao pheipu na Peterwe lange win Inok kahta rha yo me jawe i, “Taowe nang I phei pesha me ye-nge a?”

²⁷Peterwe üne-o yejan, hüyange tüophei jamshe awpong ko.

²⁸Napning shomme, iman-e Kaifas mepu Jesu ahng gho te woipei. Lünt me ye-ompe Yinyepu mo hahpu oklak nanjingne iman ahngnok sa te ye-ong.

²⁹Tüokhei Pilate iman tangte yu hüyange i, “Hatüo kahta phei tüi-e hangheyin püohpushe numan-e yah pei ei?”

³⁰Iman-e Ite jan, “Hatüo kahta ümeng lingpupa ne yejeshihma-a, toman-e nang tangte I yah yepei hahshepu.”

³¹Pilate imante i, “Numan nying nyingke I teiyah, hüyange numan ngaokeng me hangke ngoh hüke phünyah.” Jehudilanne Ite i, “Kahta li ne tamlak wong toman te yepha.”

³²Hatüowa hanghe lipu me I lilak Jesuwe ngaoyangpu ütahte ngai.

³³Pilate ghote leihye, Jesu te nyik hüyange Ite i, “Nang Jehudilan ahngpa a?”

³⁴Jesuwe jan, “Hatüowa nange shingpu ipu heiya yejema-a ülao lanne nangte ü-jeng i ei?”

³⁵Pilate jan, “Tao Jehudi a? Numan jat hüyange ngengpa üjenglanne üte nang phünne phanang. Nange hangling ei?”

³⁶Jesuwe jan; “Ü-ahngnyoi tüopa kahtoknyu mepu peipu yeje. Ü ahngnyoi tüopa kahtoknyu mepu ne mengshihma-a, Jehudilante Tao phünne yephalak jingne ü-shaoshanpalan-e hok hah shepu; hüyangpoi, hüke ü ahngnyoi tüomepu peipu ne yeje.”

³⁷Pilate Ite i, “Tüokhei nanga Ahng a?” Jesuwe janne i, “Taowa Ahngja she nange inang. Ütingpa jingne saki phane Tao kahtoknyu te pei hüyange puh she Taowe inang. Moilan aoyin me ütingpa ngoh ü-ngao jainang.”

³⁸Pilate Ite i, “Üting hanghe shi?” Aope Iye tüo ngao i, nishe Jehudilan tangte I yu hüyange imante i, “Taowe Ite kanglak ne ümeng hango ye-nge;

³⁹hüyangpoi numan wanglam kih-e Yinyepu mo hipak me numan jingne taowe kahta ja yinlak ngohnang. Jehudilan Ahngpa numan jingne lanne tamlak numan ü-phei mongya?”

⁴⁰Iman-e üngwünne hüke i, “I yeje hüyangpoi Barabbas!” Barabbas kuhlang ja ne ngoh.