Read Konyak Naga JOHN 19 Bible Online

JOHN 19 - Konyak Naga bible

JOHN 19

¹Tüophei me Pilate-e Jesu woipei hüyange shüt;

²hüyange kengphetlanne ühuh pheipu shaoshaoh ling hüyange I shangme shaoh ne tam, hüyange iman-e Ite takmonnye inne tam.

³I sheshao me iman peiye hüke i, “Jehudilan Ahngpa meiye ngohyah!” Hüyange I shongte wenyange iman-e Ite yakpha khüw leitam.

⁴Pilate üne-o nokshaote yu hüyange Jehudilante i, “Leitüoh, Ime taowe kanglakne ümeng hango ye-nge she numan-e shinglak jingne taowe numante I yüonang.”

⁵Tüokhei, huh shaoshaoh shaoh hüyange takmonnye inyange Jesu nokshaote yao. Pilate imante i, “Leitüoh, hatüome numan kahta.”

⁶Aope ngengpa üjenglan hüyange yompalanne I nge, “I tangpem me taktüoh! I tangpem me taktüoh!” she iman-e üngwün. Pilate imante i, “Numan nying nyingke I yayah, hüyange I tangpem me takyah. Hangjingne taowe Ite ümeng pholakne hango ye-nge.”

⁷Jehudilanne Ite janne i, “Toman-e ngaokeng ja ngohnang, hüyange ngaokeng kih-e I lilak wongpong; hangjingne Iye yoi nying nyingke Kahwang Üha ne meng.”

⁸Aope Pilate tüopa ngao jai I yeonge nyam,

⁹hüyange I gho te leihye, hüyange Jesute i, “Nang ü-mepu peipu shi?” Jesuwe Ite yejan.

¹⁰Pilate Ite i, “Nange ü-phei yengao hupu a? Üme nang yintamlak wong hüyange üme nang tangpem me taklak wong ngohnang she nange yeshing a?”

¹¹Jesuwe jan, “Ütang mepu wong nangte yepha shihma-a, nange üte ngaolak wong hango yenang hah shepu. Tüokhei aowe nangte Tao phünne phayapeih I ünu sheyongpupa.”

¹²Tüopa jaiyange Pilate I yinhuwe teih. Hüyangpoi Jehudilanne üngwün, “Nange tüopa kahta yintam küma-a, nanga Kaisar shümpa ne yeje! Aowe yoi ahngne menge ngaolakei Kaisar phei tüi-e wepa ne mengnang.”

¹³Aope Pilate tüolan ngao jai Iye nokshaote Jesu yüo, hüyange “Longkon, Hebrew ngao me Gabbatha she nyikpu ngaophün shotjing me shotne tam.”

¹⁴Hatüowa Yinyepu mo nyihshao, hüyange heeitam hahju hipak ne ngoh. Iye Jehudilante i, “Leitüoh, numan Ahngpa tüome!”

¹⁵Iman-e üngwünne i, “I toitüoh, I toitüoh, I tangpem me taktüoh!” Pilate imante i, “Taowe numan Ahngpa tangpem me taklak a?” Ngengpa üjenglanne janne i, “Toman-e ahng yenang hüpoi Kaisar.”

¹⁶Tüophei me tangpem me taklak jingne Iye imante yüowe pha. Tüokhei iman-e Jesu phünne yah,

¹⁷hüyange Iye yoi tangpem paiyange, “Shangwaan kahmük,” Hebrew ngaome Golgotha she nyikpu kahmük ja te ong.

¹⁸Tüome iman-e I tangpem me tak, hüyange I phei kahta ni, moini yekaote japong hüyange Jesu üwo me she tak.

¹⁹Pilate-e ngaoja nyan hüyange tangpem me khüm. Nyanpuwa hüke ngoh, “Nazarethlan Jesu, Jehudilan Ahngpa.”

²⁰Jehudilan maapuwe nyanne ngohpu iye lei, hangjingne Jesu tangpem me takpu nyoi chingnyu phei owe ngoh, hüyange hatüowa Jewish, Latin hei Greeklan ngaome nyan.

²¹Tüokhei Jehudi ngengpa üjenglanne Pilate te i, “Jehudilan Ahngpa,” she tah nyan: hüyangpoi Iye i, “Tao Jehudilan Ahngpa.”

²²Pilate jan, “Taowe hanghe nyan, taowe nyanyangki.”

²³Aope kengphetlanne Jesu tangpemme tak-e sho, iman-e I inkhek yah hüyange üphong peli ne iman-e tam, kengphetlan lep iye meitam japong yah. Iman-e phakshao-o yah; hüyangpoi hatüowa shüngpu üpong yenangpe, shangmepu ya ngoiye üpong yenangpe ja ne takpu ne ngoh.

²⁴Tüokhei iman-e hüke teingao, “Hatüowa tah tanghah, hüyangpoi ao jingne menglakei shinglak jingne phongyenge leihah.” Ngaolai ütingme ngaitamlak jingne hatüo ling: “Iman-e ü-nyemo iman yo me tam hüyange ü-phakshao jingne phongyeng.” Hatüowa kengphetlanne ling.

²⁵Sha-a Jesu ünyu, Inyu ü-nao, Klopas sheko Mary hüyange Mary Magdalene iman I tangpem shongme yong ngoh.

²⁶Jesuwe Inyu nge hüyange Iye kenpu pinlan yha phin me yonge nge, hüyange Iye Inyute i, “Sheko leitüoh, nangha tüome.”

²⁷Tüophei me Iye pinte i, “Leitüoh, nangnyu hatüome.” Tüohipak mepu muh pinne yoinok te yha woitai.

²⁸Jesuwe shing, shaaji toi üshei tümteki. Ngaolai ütahte ngailak jingne Iye hüke i, “Tao yengle nangki.”

²⁹Tüome yushi maapu tük ja ngoh. Iman-e sheakwan ja maawe yushi shokyange hyssop lenglao me sha hüyange I ju te huhtam.

³⁰Aope Iye yushite jüp nyüo hüyange i, “Üshei tümteki.” Tüophei me I ngüm khuhta hüyange I yaha teine tam.

³¹Hatüowa mo jingne tümpu hipakne ngoh. Tüokhei Jehudilanne Pilate te tangpem me toipalan ya phaklak, hüyange mang yahteilak jingne tong. Hatüowa iman wanglam Sabbath me tangpem me ye-anglak, hangjingne Sabbath nyih üyong ne ngoh.

³²Tüokhei kengphetlan pei hüyange üwangpa kahta yaphak hüyange Jesu phei takpu japa jingo phak.

³³Tüophei me iman Jesu shongte pei, hüyange aope iman-e I shaaji liteiye nge, iman-e Iya yephak.

³⁴Hüyangpoi kengphet yo me jawe I hempate ngouwe tüp, hüyange hüwante muh iy hei yeng ngai.

³⁵Hatüowa aowe nge Iye phapu saki, numane-o ütinglak lakshe teih-e phanang, hüyange I saki üting ngohnang. Iye üting inang she shingpu ja ngohnang.

³⁶“I waan ja nehoi yephaklak,” she ngaolai me iyangpu ütahte ngailak jingne, tüolan ngaiyangki.

³⁷Üne-o ngaolai ülao me inang, “Iman-e aote tüp iman-e Ite leilak.”

³⁸Tüophei me Arimathea mepu Joseph, ao Jesu pin ne ngoh hüyangpoi Jehudilan te nyampu kaiye lowe ngoh, peiye Jesu mang yahlak jingne Pilate te tong; hüyange Pilate o-ngao pha. Tüokhei I pei hüyange I mang yahtai.

³⁹Nicodemus, ao wangnyak me üwangne I tangte pei, I-o üpe meipu yingwangti hei üpe pheipu sü nyütpu tok gho ja nanjing phei peingoi.

⁴⁰Tüokhei imniye Jesu mang yah hüyange Jehudilan wanglam kih-e üpe ümei pho hüyange nyekhaiye yout.

⁴¹I takke toipu ken me pesha ja ngoh, hüyange tüopa pesha me ao-o man mupu mangkoksa üla ja ngoh.

⁴²Tüokhei hatüo Jehudilan mo jingne tümpu nyih ne menge, hüyange mangjong ü-o me ngoh ipute, iman-e Jesu tüome mu.