Read Konyak Naga JOHN 2 Bible Online

JOHN 2 - Konyak Naga bible

JOHN 2

¹Nyih lüm shepu nyih me Galilee mepu Kana chingme naoyhapoi mopu ngoh; hüyange Jesu ünyu tüome ngoh.

²Jesu hüyange I pinlan-o tüopa naoyha poipute nanpheng.

³Aope wuwüngti khongküm yinge küm, Jesu ünyuwe Ite i, “Iman wuwüngti yenang.”

⁴Hüwante Jesuwe janne i, “Sheko, hanghe linglak nange üte ilak ne yeje.” “Ü-hipak üne-o manngoi.”

⁵Inyuwe namnopalante i, “Iye hanghe ilakei numan-e tüo lingyah.”

⁶Jehudilan jaopu wanglam kih-e hüyange tüopa jingne longtük wok ja ja me taksheng ni hei lüm nyippu tüome ang.

⁷Jesuwe namnopalante i, “Tüoyin longtük me yenge maatümtüoh.” Iman-e tüolan khongkümpu tükju ngoiye maatam;

⁸hüyange Iye imante i, “Sha-a ütam shaotehu hüyange mo nokpupa tangte yah wenhu.” Iman-e tüopa I tangte yahwen.

⁹Mo nokpupawe yeng jüppe nyao, hüyange wuwüngti ne mengteiye ngoh. Tüopa wuwüngti ümmepu pei Iye yeshing, hüyangpoi shaoshanpalan aoyinne yengshao iman-e shing. Iye nyemthe te nyik,

¹⁰hüyange Ite i, “Kahta liliye üwangne shemeipupa wuwüngti jonnang, hüyange yinpalan-a moh yang pheime Iye shewengpupa phenang. Hüyangpoi nange sha-a ngoiye shemeipupa wuwüngti angpu a!”

¹¹Jesuwe Galilee mepu Kana me tüopa kahnyingwüngha füo üwangpa linge wang; I müktishiwapu hatüome ütahte ngai, hüyange I pinlanne Ite ütinglak.

¹²Tüophei me Jesu hüyange Inyu, Inaolan hei pinlan Kapernaum te lai, hüyange tüome iman nyih üten ja ngoh.

¹³Jehudilan Yinyepu mo oteiye ngoh, hüyange Jesu Jerusalem te ong.

¹⁴Khümjing me Iye mahu, nyee, hei awyei yaopalan hei ngin leijeipalan khao me shotyange nge.

¹⁵Iye shetlak wu ling hüyange khümjing mepu yinmok üshei nyee hei mahu omme jange tei; Iye ngin leijeipalan khao shokke win hüyange iman ngin shaitam;

¹⁶hüyange awyei yaopalante Iye ngaowe i, “Tüomepu tüoyin khongküm teitüoh! Numan-e üpa nok pheeileih nyoine tahmeng!”

¹⁷I pinlanne laingao me hüke nyanne ngohpu teihpei, “Nang nok jingne tao lahnyikpuwe hahshulak.”

¹⁸Jehudilan I tangte ngoi hüyange tong, “Nange tüoyin linglak jingne toman shaome hanghe kahnyingwüngha füo linge hüolak shi?”

¹⁹Jesuwe jan, “Tüopa khümjing mengtam tüoh, hüyange nyihlüm mongme Taowe loilak.”

²⁰Hüwante Jehudilanne i, “Tüopa khümjing welak jingne wangpeng deli me wok yah, hüyange nange tüopa nyih lüm mongme loipu oklak a?”

²¹Hüyangpoi Jesuwe I püm khümjing jeng ngao.

²²Tüokhei, aope I lipu mepu yange ye, I pinlanne Iye ngaoyangpu tüopa teihtüo; hüyange iman-e lai ngaote, hüyange Jesuwe ngaoyangpu ngaote ütinglak.

²³Aope Yinyepu Mo hipak me I Jerusalem me ngoh, Iye lingpu kahnyingwüngha füo ngeye kahtalan maawe I min me meng.

²⁴Hüyangpoi Jesuwe imante yoi nying nyingke mong yehüm, hangjingne kahta lili Iye meiye shing.

²⁵Hüyange kahta aowe-o ülao ja jingne saki phawe ilak wongpong yeje, hangjingne kahtalan mongjang me hanghe pei hüyange ngai Iye shing.