Read Konyak Naga JOHN 20 Bible Online

JOHN 20 - Konyak Naga bible

JOHN 20

¹Hat me üwangpa nyih napning shomme, pipom ne ngohwante, Mary Magdalene mang jongte pei hüyange mangkoksa mepu long yahtei teiye nge.

²Tüokhei yha phette tai hüyange Simon Peter hei ülao pin ao te Jesuwe ken iman tangte pei, hüyange imante i, “Iman-e mangjong mepu Youngwanpa yahtei teki, hüyange iman-e ümeken me ang toman-e yeshing.”

³Tüokhei Peter hei ülao pin tümme ngai hüyange mangjong yete wen.

⁴Moini jamshe phet hüyangpoi ülao pin Peter shaoleiye phet hüyange mangkoksa te shonge ngoi.

⁵Iye ngomme lei hüyange nye-ükhai phongyange nge, hüyangpoi I ümongte ye-ong.

⁶Simon Peter I pheite woi pei, hüyange mangkoksa te ong; hüyange Iye nye ünyai phongyange nge,

⁷hüyange hanghepa inkhek I shang me lümyange ang nyekhai phei yeje, hüyangpoi ülao ken me nüpyange nge.

⁸Tüophei me ülao pin, ao mangkoksa te üwangne pei, I-o ong, Iye nge hüyange ütinglak;

⁹hangjingne ngaolai me I lipu mepu yange yelak she ipu ngao iman-e yeshing.

¹⁰Tüophei me pinlan nokte nishe leihye.

¹¹Hüpoi Mary mangjong me yongyange shappe ngoh. Yha shapjang shappe mangkoksa te lei,

¹²hüyange Jesu angjing üshang yeme ja, hüyange üya yeme ja she wangdang shongmokpalan ni inkhek üheng inyange shotte nge.

¹³Iman-e yhate i, “Sheko, nang hangne shappu?” Yhawe imante i, “Hangjingne iman-e ü-Youngwanpa yahteiteki, hüyange iman-e ümeken me ang taowe yeshing.”

¹⁴Aope yhawe tüo ngao iye sho, yha leppe ye hüyange Jesu yongyange nge, hüyangpoi hatüowa Jesu she yhawe yeshing.

¹⁵Jesuwe yhate i, “Sheko, nang hangne shappu? Nange ao yampu shi?” Iya pesha hampa she yhawe teihyange Ite i, “Üyongpa, nange I yahteiyangpu ne mengma-a, nange I ümeken me ang üte ipha, hüyange taowe I yahteilakei.”

¹⁶Jesuwe yhate i, “Mary!” Yha lüppe ye hüyange Hebrew ngaome Ite i, “Rabboni!” (leppu konnyüopa).

¹⁷Jesuwe yha te i, “Üte tahjon, hangjingne Tao Üpa tangte man ong; hüyangpoi ü-jeihei naolan tangte taiye imante itüoh, Tao Üpa hüyange numan Üpa, ü-Kahwang hüyange numan Kahwang tangte ongnang.”

¹⁸Mary Magdalene tai hüyange pinlante i, “Taowe Youngwanpa ngeyangki,” hüyange Iye tüolan ngao iyangki she yhawe imante i.

¹⁹Hat tepu üwangpa nyih, tüonyih ünpongme, Jehudilante nyamteiye, pinlan ngohpu nok taküpyange ngoh; Jesu pei hüyange iman yo me yong, hüyange Iye imante i, “Numan phei chingmei ngohtüoh.”

²⁰Aope Iye tüopa ngao i, Iye imante I yak hüyange I hempa hüo. Aope iman-e Youngwanpa nge pinlan mongmei.

²¹Jesuwe imante nishe i, “Numan phei chingmei ngohtüoh. Üpawe Tao hangke shon, hüke Taowe-o numan shonnang,”

²²Aope Iye hatüo ngao Iye imante lüoyu hüyange imante i, “Yaha Üjao yahtüoh.

²³Numan-e ütamte ünu winma-a, iman ünu wenyangki; ütam ünu numan-e tükke angma-a, iman ünu tükke angnang.”

²⁴Sha-a Thomas, nipet she nyikpu, penme ni yo me ja, Jesu peiwante iman phei yengoh.

²⁵Ülao pinlanne Ite i, “Toman-e Youngwanpa ngeteki.” Iye imante i, “I yakme yanlag mee hüyange yanlag meeme üyaklan mantüp, hüyange I hempa meete mantüp mantüp, taowe aope-o üting minlak.”

²⁶Nyihtet ngohyange I pinlan üne-o noksa me ngoh, hüyange Thomas iman phei ngoh. Taküp yange ngoh, hüyangpoi Jesu pei hüyange iman yo me yong hüyange i, “Numan phei chingmei ngohtüoh.”

²⁷Üneye Thomaste Iye i, “Nang yaklan tüome wenkei hüyange ü-yakte leiyah; nang yaklan tüome peiye ü-hempa te tüppe leihu; üting yelakpe tahngoh, hüyangpoi üting lakyah.”

²⁸Thomas Ite janne i, “Üyongpa hüyange ü-Kahwang.”

²⁹Jesuwe, Ite i, “Nange Tao ngeyange ütinglak nangkü-a? Aoyinne ye-nge hüyangpoi ütinglak iman mongmeilak.”

³⁰Hatüo laitep me yenyanpu, kahnyingwüngha füo maawe Jesuwe I pinlan phei ling;

³¹hüyangpoi numan-e Jesuwa Messiah, Kahwang Üha, she üting laklak jingne, hangjingne numan-e ütinglakma-a, I min me numan-e üyin tüolak jingne, hatüo yin nyanyangki.