Read Konyak Naga JOHN 21 Bible Online

JOHN 21 - Konyak Naga bible

JOHN 21

¹Tüophei me Jesuwe üne-o Tiberia yengching me pinlan tangte hüo. Iye yoi nying nyingke hüke hüo.

²Simon Peter, Nipet she nyikpu Thomas, Galilee mepu Kanalan Nathanael, Zebedee ühalan hüyange ülao pin ni iman jamme ngoh.

³Simon Peterwe imante i, “Tao nyah omne tainang.” Iman-e Ite i, “Toman-o nang phei taiküki.” Iman yayong hüyange iman lisheng te ong, hüyange tüoya iman-e hango ye-om.

⁴Wanghe ngaipu phei jamshe Jesu yengnah me yong, hatüowa I she pinlanne yeshing.

⁵Jesuwe imante i, “Hayimlan (shümpalan), numan-e nyah omme ngohya?” Iman-e Ite janne i, “Yenang.”

⁶Iye imante i, “Lisheng yakjah yeme numan-e shaan shaitüoh, hüyange numan-e ütam tüolak.” Tüokhei iman-e shai, hüyange sha-a nyah jamloi ompu nanjingne iman-e shuwe yepu ye-ok.

⁷Pin yo me ja ao te Jesuwe ken Iye Peterte i, “Hatüowa Youngwanpa yang.” Aope hatüowa Youngwanpa she Simon Peterwe jai, Iye nyeyah, hangjingne Iye khokke angyange ngoh, hüyange yengching te phet;

⁸Hüyangpoi ülao pinlan iman shaan me nyah maawe küoyange, iman lisheng me ye hangjingne iman yengnah mepu meiyange yejai, hüyangpoi yakkong ghoni nanjing jaiye ngoh.

⁹Aope iman yengnah ngoi vün pheipu vünhan hüyange tüo tangme nyah hei an nge;

¹⁰Jesuwe imante i, “Numan-e sha-a ompu nyah ütam wenkei.”

¹¹Simon Peter lisheng me wen hüyange nyah üyong maawe küoyange yengnah te shaan shuiye ye. Gho ja denga me lüm ngoh; nyah teshinne ngohyapoi shaan yehit.

¹²Jesuwe imante i, “Wenyah hüyange phong hahyah.” Hatüowa Youngwanpa she shinge, “Nang ao shi?” she tonglak pinlan yome aowe-o mong yeyong.

¹³Jesu wenne an yah, hüyange imante pha, hüyange hüke muh nyah pha.

¹⁴Hatüowa I lipu mepu yange yephei me Jesuwe pinlante lüm shepupa hüo.

¹⁵Aope iman-e phong hah sho Jesuwe Simon Peterte i, “John üha, Simon, tüolan üshei phei shenyei she nange üte kennang kü a?” Iye Ite i, “Üm, Youngwanpa, taowe nangte kennang she nange shing.” Iye Ite i, “Ünyeehalan paoyah.”

¹⁶Nishe Iye Ite i, “John üha Simon, nange üte kenya?” Iye Ite i, “Üm, Youngwanpa, taowe nangte kennang she nange shingnang”. Iye Ite i, “Ü-nyeelan yomyah.”

¹⁷Lümshe Iye Ite i, “John üha, Simon, nange üte kenya?” “Nange üte kenya?” she Iye Ite lümme tongpu jingne Peter mongmeng, hüyange Iye Ite i, “Youngwanpa, nange khongküm shingnang; taowe nangte kennang she nange shingnang.” Jesuwe Ite i, “Ünyee paoyah.

¹⁸Üting tingha me Taowe nangte inang, aope nang naoshe ne ngoh, nange nang shenghit hit hüyange nang taihupu yete kem; hüyangpoi nang aope wupa ne meng, nange nang yak nolak hüyange ülao jawe shenghit hit phalak hüyange nange yemongpu yete teiphalak.”

¹⁹Hatüo ngaopu kaiye hangkihpu lipuwe Iye Kahwang müktishiwalak tüopa hüo. Aope Iye tüopa ngao iye sho Iye Ite i, “Ü-pheite woikei!”

²⁰Peter lüppe ye hüyange Jesuwe ao te ken tüopa pin woipu nge. Ao Youngwanpa mo hahwante I jakuh me nyengyange, “Youngwanpa, nang lowe tamlakpa ao shi?” she tongpupa ne ngoh:

²¹Aope Peterwe I nge Iye Jesute i, “Youngwanpa, tüopa kahta hangke?”

²²Jesuwe Ite jan, “Tao manyu manyu I ngohne tamhupu ne mengma-a, nangte hangke lingpu? Nang ü-phei te woikei.”

²³Tüokhei tüopa pin yelilak she jeiheinaolan mongme tüopa ngao yan. Hüyangpoi Jesuwe I yelilak she Ite ye i, hüyangpoi, “Taowe tao manyu manyu, I tanne tamhuma-a, nangte hangke nangpu?” she i.

²⁴Aowe hatüolan jeng saki pha hüyange nyanne ang hatüowa pinne ngohnang; hüyange I saki üting she toman-e shing.

²⁵Jesuwe lingpu ülao toishao maawe ngohnang; tüolan japhei me ja she nyanshihma-a, nyanpu laitep-e kahtoknyu nopu me nehoi yeshemlak she taowe teihnangki.