Read Konyak Naga JOHN 3 Bible Online

JOHN 3 - Konyak Naga bible

JOHN 3

¹Phariseelan ükhong mepu Jehudilan woipa ja Nicodemus she minpu ngoh.

²Yaja Jesu tangte tüopa kahta pei hüyange Ite i: “Rabbi, (konnyüopa) toman-e shingnang nang Kahwange shonpu konnyüopa ja, hangjingne I phei jamme Kahwang yenangma-a nange lingpu kahnyingwüngha füo aowe-o lingpu ye-oklak.”

³Jesuwe Ite jan, “Üting tingha me Taowe nangte iphaning: I nishe yepuh ma-a, aowe-o Kahwang Ahngching ye-ngelak.”

⁴Nicodemus Ite jan; “Lwngmei kahta ja hangke nishe puhlak? Inyu seate I nishe ongyange puhlak ikü a?”

⁵Jesuwe janne i; “Üting tingha me taowe nangte ipha ning,” “Kahta ja yeng hüyange Yaha me yepuh pute Kahwang Ahngching te ongpu ye-oklak:

⁶Hanghepa mei mepu puh hatüowa mei, hüyange hanghe yaha mepu puh hatüowa yaha.

⁷Taowe nangte ipukhei she ya tahshan: ‘numan üshei nishe puhlak yang.’

⁸Iye ümeken me mong tüoken me wangyang leinang; nange tüopa mepu wüng jainang, hüyangpoi hatüo ümeken mepu pei yejema-a ümeken te tai nange yeshing. Tüokih-e aoyin Yaha me puh iman jingne hatüo kih ngohnang.”

⁹Nicodemus Ite tong. “Hatüoyin hangke ngailak?”

¹⁰Jesuwe Ite jan: “Nang Israel konnyüopa üyong ja, hüyangpoi nange tüoyin yeshing?

¹¹Üting tingha me Taowe nangte ipha ning: toman-e hanghepa jeng shing toman-e inang, hüyange toman-e hanghepa nge tüopa jeng saki phanang; hüyangpoi numan-e toman saki yeyah.

¹²Taowe kahtoknyu jeng iwante nange üte üting yelak, hüma-a Taowe nangte wangdang jeng ima-a hangke ütinglak lak?

¹³Hüyange Kahta Üha, ao wangdang mepu yu tüotokte kaiye ao-o wangdang te man ong.”

¹⁴Phaonyu jongme hangke Mosawe shakphan yan pu yonge tam, tüokih-e Kahta Üha-o yonge tamlak yang,

¹⁵tüopa kaiye aoyinne Ite ütinglak jintepu üyin Imepu tüolak.

¹⁶Hangjingne Kahwange kahtoknyu te hüke kenpuwe aoyinne Ite ütinglak lakei yemahlak hüyangpoi jintepu üyin ngohlak jingne Iye yoi halom pha.

¹⁷Hangjingne Kahwange Iha kahtoknyu ngaophünlak jingne yeje; hüpoi I toiye kahtoknyu yinlak jingne shon.

¹⁸Aoyinne Iha te ütinglak yapeih ngao yephünlak; aoyinne üting yelakyapeih ngaophün yangki, hangjingne Iye Kahwang üha ja min me üting yelak.

¹⁹Hatüokih ngaophünpu phanang: kahtoknyu te wangngai pei, hüyangpoi kahtalanne wangngai nanleiye wangnyak ken, hangjingne, iman-e ünu toilan ling.

²⁰Hüyange aoyinne ünu toi ling wangngai te nunang, hüyange wangngaite yepei külak, hangjingne Iye lingyangpu ünu toi Iye yehüohu.

²¹Hüyangpoi aoyinne ütingpa toiling, wangngai te peinang, tüopa kaiye Kahwangte nyimmei hüowe I toi lingpu she hüonang.

²²Tüophei me, Jesu hüyange I pinlan Judea kahtok te tai. Tüome I iman phei ngoh, hüyange baptitam.

²³Sha-a Johnne Salim phei o-pu Aenon chingme baptiye ngoh; hangjingne tüoyeme yeng wangmanne ngoh. Kahtalan I tangte maawe pei hüyange Iye imante baptitam.

²⁴Hatüowa John küpnok me angshao me ngohyangki.

²⁵Sha-a wanglam me jaopu jengme Jehudi hei John pinlan pa me mop ngai.

²⁶Tüokhei iman John tangte pei hüyange Ite i: “Konnyüopa, leihu! Jordan jayekao me nang phei ao ngoh, ao jingne saki pha, Iye baptinangki, hüyange kahta lili I tangte tai nangki.”

²⁷Johnne jan: “Kahwange Ite yepha pute kahta jawe hango tüone ye-ok.”

²⁸Tao Messiah yeje, hüyangpoi taowa I sheshao me shonpupa ngohnang. Tüopa numante taowe iyangki, hüyange numan ü-saki ngohnang.

²⁹Nyemnyanyu nokpupa-a nyemthepa ngohnang; nyemthepa shümpa yongnang hüyange jainang, hüyange aope Iye nyemthepa ngao wüng jaiyapeih I mongmei nang. Hatüo kih-e ümong meipu wangteki.

³⁰I sheyong she yonglak, hüyangpoi tao sheshoi she shoilak.

³¹Ao ütangye mepu yu I üshei phei sheyongpupa; ao kahtok mepu pei kahtok jingne hüyange Iye kahtoknyu jeng inang. Ao wangdang mepu pei I üshei phei ütahpa.

³²Iye hanghe nge hüyange hanghe jai tüopa jeng saki pha nang, hüyangpoi aowe-o I saki yeyah.

³³Ao kahtawe I saki yahyapeih Iye Kahwang-a üting she shingteki.

³⁴Ao Kahwange shon, Kahwang ngaolan inang; hangjingne Kahwange Yaha hünghao tokyange yepha.

³⁵Ipawe Iha te ken, hüyange I yak me üshei phayangki.

³⁶Aoyinne Iha te ütinglak lakei jintepu üyin tüolak; aoyinne Iha ngao yejailakei aope-o üyin yetüolak hüyangpoi Kahwang mongshihpu I tangme jinte ngohlak.