Read Konyak Naga JOHN 4 Bible Online

JOHN 4 - Konyak Naga bible

JOHN 4

¹Aope Jesuwe John phei shenyei she Iye baptitam-e hüyange pin omnang she Phariseelanne jaipu shing;

²ütingpa me Jesu, Iye yeje; I pinlanne baptitam.

³Aope Jesuwe tüopa jai, Iye Judea angyange Galilee te ye.

⁵Tüokhei Jacob-e Iha Joseph jingne phapu kahtok phei owe, Samaria me ngohpu Saikhar (Sychar) she minpu ching ja te I pei.

⁶Jacob yengnung tüome ngoh, hüyange lamme kemwante nyaiteiye peiye Jesu tüome shot. Hüwante penme ni paji nanjing ngoh.

⁷Hüwante Samaria sheko ja yengshao ne pei, hüyange Jesuwe yha te i, “Üte yinglak yeng yahkhu.”

⁸Hangjingne I pinlan chingnyu te hahying shaklak jingne ongteiye ngoh.

⁹Samaria shekonyu Ite janne i, “Nanga Jehudi hüyange taowa Samaria ja, hangke nange üte yinglak yeng tongpu shi?” (Hangjingne Jehudilanne aope-o Samarialan jonpu wan hei shengme yejon.)

¹⁰Jesuwe yha te janne i, “Nange Kahwang hünghao shingshih ma-a, hüyange ‘Üte yinglak yeng yahkei,’ she nangte aowe iyapeih shingshihma-a, nange Ite tonghah shepu hüyange Iye nangte üyin yeng phahah shepu.”

¹¹Shekonyuwe i, “Üyongpa, nangme yengshaolak hango yenang hüyange yengnung lunang. Nange ümeken mepu üyin yeng tüolak shi?

¹²Nang toman üpa Jacob, aowe tomante yengnung pha, hüyange Iye-o tüopa mepu ying, hüyange I hayim hei I yinmoklan ne ying, I phei sheyongpu a?”

¹³Jesuwe yhate janne i, “Aowe tüopa yeng mepu yinglakei nishe yenglelak;

¹⁴hüyangpoi aowe Taowe Ite phapu yeng yinglakei nishe yelelak. Hangjingne Taowe Ite phalak yeng Ime üyin yenglok ne menglak, hüyange Ite jintepu üyin phalak.”

¹⁵Shekonyuwe Ite i, “Üyongpa, hatüo yeng üte yahkei; tüome nakshih tao aope-o yelelak, yejema-a tüopa mepu yengshao ne yepeilak.”

¹⁶Jesuwe yha te i, “Taitüoh nang netanpa te nyik kei, hüyange tüome yekei.”

¹⁷Shekonyuwe jan, “Taowe netanpa yenang.” Jesuwe yha te i: “Netanpa yenang she, nange ipu shunang.

¹⁸Hangjingne nang netanlan nga phei ngoh, hüyange sha-a nang ao phei ngoh I nangjing ütingpa netanpa yeje. Tüopa me nange üte üting iyangki.”

¹⁹Shekonyuwe Ite i, “Üyongpa, taowe nanga hipa ja she ngenang.”

²⁰“Toman Samaria puyimlanne tüopa kahtang me Kahwang te khüm, hüyangpoi kahtalanne Kahwang te khümlak nyoi Jerusalem üja she nange inang.”

²¹Jesuwe yhate i: “Shekonyu, üte ütinglak yah, numan-e üpate tüopa kahtangme jeyah, Jerusalem me jeyah yekhümlak hipak ja peikülak.

²²Numan-e hangheyeih, yeshingpu ja te khümnang; toman-e hanghe shing tüopate toman-e khümnang, hangjingne yinyepupa-a Jehudilan mepu ngohnang.

²³Hüyangpoi hipak ja peiküki, hüyange hatüowa sha-a ngohnang, aope ütingme khümpa lanne üpate yaha me hüyange ütingpa me khümlakei, ütingpa khümpalanne mengetamlak jingne üpawe hükihpu kahtalan yamnang.

²⁴Kahwang-a Yaha, hüyange aoyinne Ite khümlakei yaha me hüyange ütingpa me khümlak yang.”

²⁵Shekonyuwe Ite i, “Khrista she nyikpu, Messiah peilak taowe shingnang. Aope I peilakeih Iye tomante khongkümpu iphalak!”

²⁶Jesuwe yhate janne i, “Tao, aowe nangphei ngaonang, Tao I ngohnang.”

²⁷Hüwante Jesu pinlan ye-e ngoi; hüyange I sheko ja phei ngaowe ngohpu ngeye iman yeonge yashan. Hüyangpoi iman yo me aowe-o yha te “Nange hanghe yampu?” she yengao; yejema-a “Yha phei nang hangne ngaoki?” she Ite yetong.

²⁸Tüophei me shekonyuwe yengtük tüohyange chingte ong, hüyange tüome ngohpu kahtalante i,

²⁹“Kei, hüyange kahta te leitüoh, taowe linge peiyangpu lili üte ngaoyangki. I Messiah ne mengyalak shi?”

³⁰Tüophei me iman-e ching tüohyange Jesu tangte pei.

³¹Tüopa hipak me pinlanne Jesute tonge i, “Rabbi, (Konnyüopa) ülamja hahyah.”

³²Hüyangpoi Iye jan, “Numan-e yeshingpu hahlak ja taowe tüowe ngohnang.”

³³Pinlanne iman pa me teingaowe i, “Ütamme Ite hahlak peitüoh pu a?”

³⁴Jesuwe imante i, “Ü-hahyinga Tao aowe shonyapeih I toi linglak hüyange Iye üte phapu toishao sholak ngohnang.”

³⁵“Lekeng peli ngohnang, hüyange ‘tahyahlak hipak’ peikülak she numan-e ye-i a? Taowe numante inang, kahte leiyah; iman yahlak ne nyinteki!

³⁶Kahta aowe tahyah nang Ite nanmee phanang hüyange ülicklan jintepu üyin jingne shai jemnang; tüokhei ao kahtawe dei hüyange aowe tah yah imni moini jamshe mongmeilak.

³⁷Hangjingne jawe dei hüyange jawe yah she ipu ütingme ngainang.

³⁸Numan-e ümeken me yeham tüome tah yahlak jingne numan shonnang; ülao lanne hamyangki, hüyange iman-e hampu me numan jamnang.”

³⁹Tüopa chingme ngohpu Samarialan maawe Jesute ütinglak, hangjingne “Taowe hanghe linge pei khongkümpu Iye üte i,” she shekonyuwe ngao.

⁴⁰Tüokhei aope Samarialan peiye iman phei jamme ngohkei she Ite tong; tüoken me Jesu nyih ni nyoi.

⁴¹I ngao kaiye kahtalan maawe ütinglak-e meng,

⁴²hüyange iman-e shekonyu te i, “Sha-a toman-e ütinglak nangki; hüyangpoi nange ipu jingne shaha yeje, hüyangpoi toman-e I mepu jaiteki, hüyange I-a kahtoknyu Yinyetampa she toman-e shing.”

⁴³Nyih ni ngohyange tüomepu Jesu Galilee te tai.

⁴⁴Hangjingne Jesu Iye muh iyangki, “Hipa ja yoi chingshao kahtalanne yeyah.”

⁴⁵Aope I Galilee ngoi tüome ngohpu kahtalanne I yah, hangjingne Yinyepu Mo jingne Jerusalem te iman ong hüyange mo hipak me Iye hangyin toiling iman-e nge.

⁴⁶Tüophei me Galilee mepu Kana, ümeken me Iye yeng-a wuwüngti ne ling tüo nyoite Jesu leihye; Kapernaum me Iha dakpu sokali shaoshanpa üyong ja tüome ngoh.

⁴⁷Aope Iye Judea mepu Galilee te Jesu peiteki she jai, I tangte I wen hüyange Kapernaum te taiye Iha ao pali she dak-e ngoh meitamlak jingne Ite tong.

⁴⁸Tüokhei Jesuwe Ite i, “Numan-e füo hüyange kahnyingwüngha mannge mannge numan aowe-o üting yelak lak.”

⁴⁹Üyongpawe jan, “Üyongpa, üha manlipe ü-phei laihah kei.”

⁵⁰Jesuwe Ite i, “Taitüoh, nangha üyin me ngohlak!” Tüopa kahtawe Jesuwe Ite ngaotampu ngaote ütinglak hüyange tai.

⁵¹I nok manngoipe lamme ngohwante I shaoshanpalan ngaolan phei lamme hüo, hüyange Ite i, “Nang ha üyin me ngohnang!”

⁵²Iye imante tong hangke ting phei shuwe I ha-a meine wangpu, “Menyih nyihning ja paji me I dak mepu phünpu üja she, iman-e i,”

⁵³Tüophei me Ipawe “Nangha üyin me ngohlak,” she Jesuwe Ite ipu hipak yang she shinge pei. Tüophei me I hüyange Inok üshei ütinglak.

⁵⁴Hatüowa Judea mepu Galilee te Jesu pei pheime lingpu nishepupa kahnyingwüngha füo ne ngohyangki.