Read Konyak Naga JOHN 5 Bible Online

JOHN 5 - Konyak Naga bible

JOHN 5

¹Tüophei me, Jehudilan mo ja ngoh, hüyange Jesu Jerusalem te ong.

²Jerusalem me Nyee Peten ü-o me Hebrew ngaome Beth-za-tha she nyikpu yeng-i ja panha nga pheipu ngoh.

³Tüopa panha me mükmüopa, yafaipa, hüyange yimtin dakpu mokye-okpu kahtalan maawe peiye ngoh. (Iman yeng popu tanne ngohyangki;

⁴hangjingne sha-a sha-a Kahwang shongmokpa yeng-i te yu hüyange yengte wuk. Ja jakihpu dak ne jeyapoi, yeng wukke potam wante aome shonge yengte yuwe jonlakei mei okke ngohyangki.)

⁵Tüome wangpeng delüm me tet dakpu kahta ja ngoh.

⁶Aope Jesuwe I lamyange nge, hüyange tüopa kahta hipak laowe dakyangki she Iye shing; tüokhei Iye Ite i, “Nang meihu nangkü a?”

⁷Dakpawe jan, “Üyongpa, aope yeng polakei hüwante tao laitamlak tüome ao-o yenang; aope tao laine yonglakei, kahta ütam üwangne yuteiye shaha ngohnangki.”

⁸Jesuwe Ite i, “Yongtüoh, nang leng yayah, hüyange kemtüoh.”

⁹Hüwante muh tüopa kahta mei; Iye yoi shinleng aam yah, hüyange kem. Tüopa nyih Sabbath ne ngoh,

¹⁰tüokhei Jehudilanne tüopa kahta te aowe meitam ei she tong, “Hatüowa Sabbath, hüyange nang shinleng aam paiyange kempu kaiye toman Ngaokeng mengnang.”

¹¹Iye jan, “Aope kahtawe tao meiye tam Iye üte i, nang leng paiyah hüyange kemtüoh.”

¹²Iman-e Ite tong, “Aowe nangte lengpaiyah hüyange kemtüoh she i, tüopa kahta ao shi?”

¹³Hüyangpoi tüopa kahtawe aowe meiye tam yeshing, hangjingne tüopa me kahta üngang ngohpu nanjingne Jesu pitte taimah.

¹⁴Tüophei me, Jesuwe I khümjing me nge hüyange i, “Leihu, sha-a nang meiteki. Ünu shaaji tahling; yejema-a shemengpu nangte ngaine ok.”

¹⁵Tüophei me tüopa kahta tai hüyange I meiye tampuwa Jesu üja she Jehudilan te i.

¹⁶Tüopa jingne Jehudilanne Jesu shange tamne wang, hangjingne tüopa meitampu toi Iye Sabbath me ling.

¹⁷Hüpoi Jesuwe imante janne i, “Üpawe nyihjeih toi lingnang, hüyange Taowe-o linglak wongpong.”

¹⁸Tüopa ngao ipu kaiye ünyei ne Jehudilan ne I toihuwe teih; hangjingne Iye Sabbath shaha mengpu ne yeje, hüyangpoi I nying nyingke Kahwang phei ja ne menge Kahwang-a Ipa üja she i.

¹⁹Tüokhei Jesuwe imante janne i, “Üting tingha me Taowe numante ipha ning: Ühawe Iye mongpu toi hango yeling; Ipawe hanghe linge nge tüo hei Iye lingnang, Ipawe hanghe ling, Ihawe tüo lingnang.

²⁰Hangjingne Üpawe Üha te kennang hüyange Iye hangyin ling üshei hüonang. Iye Ite tüophei sheyongpu toi linglak hüolak.

²¹Hangjingne Üpawe lipulan yange yetam hüyange imante üyin pha, tüokih-e Üha-o aoyinte Iye mongyapeih üyin phanang.

²²Üpawe ao te-o ngao yephün, hüyangpoi ngaophün lak wong khongkümpu Iye Üha te phayangki.

²³Hümme nakshih Üpate wangshüm hüopu kih Ha te-o kahta üsheiye wangshüm hüolak. Aoyinne Ühate ye-i-yeshe, I shonpu Üpate ye-i-yeshe.

²⁴“Üting tingha me Taowe numante iphaning: Aoyinne ü-ngao jai, hüyange Tao shonpupa te ütinglak, jintepu üyin tüolak. Ite ngaophünpu yengohlak, hüyangpoi lipu mepu üyin chingte taiteki.

²⁵Üting tingha me taowe numante iphaning: hipak peiküki, hüyange hatüowa sha-a ngohnang; aope lipulanne Kahwang Üha ngaowüng jailakei, hüyange aoyinne tüopa jai üyin ngohlak.

²⁶Hangkih-e Üpa Ime üyin ngoh, hatüokih Iye yoiha me üyin ngohlak pha.

²⁷Hüyange Iha te ngaophünlak wong pha, hangjingne I-a Kahta Üha.

²⁸Hatüo ngaote yatahshan: hangjingne liye mangkoksa me ngohpu üsheiye I ngao jailak hipak peiküki;

²⁹hüyange iman üshei mangkoksa mepu ngailak; aoyinne ümei lingyangki yange yelak hüyange üyin ngohlak, hüyangpoi aoyinne ümeng lingyangki yange yelak hüyange ngaophün lak.”

³⁰“Taowe ü-wonge hango yeling, Taowe hangke jai, Taowe hüke ngaophün nang; hüyange Taowe phünpu ngao shunang, hangjingne Taowe hanghe mong, linglak jingne Tao ye-ngang, hüpoi aowe Tao shon Iye mongpu ling.

³¹“Taowe üjing saki phama-a, ü-saki üting yeje.

³²Hüyangpoi üjingne saki phapu ütam ngohnang, hüyange Taowe shingnang Iye hanghe üjingne saki pha üting ngohnang.

³³Numan-e John tangte shon, hüyange Iye ütingpa jingne saki pha.

³⁴Hanghe saki Taowe phanang hatüo kahta mepu ne yemeng; hüyangpoi numan yinyelak jingne Taowe hatüolan ngao inang.

³⁵John I vüntük jakih tee; hüyange loonge ngoh, hüyange üten japu jingne I vüntee me numan mongmei.

³⁶Hüyangpoi üme ngohpu saki John jing phei sheyong, hangjingne Üpawe hanghe toi lingkümlak üte pha, hüyange hangyin toi Taowe lingnang, tüolanne Üpawe, Tao shon she üjeng saki phanang.

³⁷Hüyange Üpa aowe, Tao shon, Iye üjing saki phayangki. Numan-e hangkih tingmo I ngao yejai, numan-e aope-o I sheta mannge;

³⁸tüokhei numan me I ngao yenang, hangjingne Iye ao shon, numan-e Ite üting yelak.

³⁹Numan-e laingao yam hangjingne iman me jintepu üyin tüolak she numan-e teih. Hüyange tüolan laingaowe ü-jeng ngaonang!

⁴⁰Tüoyangpoi numan üyin tüolak jingne ü tangte peilak yemong.

⁴¹“Taowe kahtalan mepu minyong pute yelei.

⁴²Hüyangpoi Taowe numan shingnang; Taowe shingnang numan mongjang me Kahwang te kenpu yenang.

⁴³Tao Üpa min me pei, hüyangpoi numan-e Tao yeyah; hüyange aope ülao jawe yoi min me peilakeih, numan-e I yahlak.

⁴⁴Aope numan-e eiha mepu minyong phapu teileng, hüyange Kahwang mepu peipu minyongpu yamne ye-ngang, hümma-a numan hangke ütinglak lak?

⁴⁵Üpa sheshao me Taowe numante ümeng phalak she tahteih; numante ümeng phapa ja ngohnang tüowa Mosa aote numan-e yoi monghümpu ang.

⁴⁶Numan-e ütingme Mosa te ütinglakpu ngoh shihma-a, numan-e üte ütinglak hahshepu, hangjingne Iye ü-jeng nyan.

⁴⁷Hüyangpoi Iye hanghe nyan tüote numan üting yelakpute, numan-e ü-ngao hangke ütinglak lak?”