Read Konyak Naga JOHN 6 Bible Online

JOHN 6 - Konyak Naga bible

JOHN 6

¹Tüophei me Galilee yengching jayekao te Jesu tai, tüopa-a Tiberia yengching;

²hüyange ükhong üngang I pheite woi, hangjingne kahnyingwüngha füo dakpalan tang me Iye lingpu iman-e nge.

³Hüwante Jesu kahtang yete ong, hüyange I pinlan phei tüome shot.

⁴Sha-a Jehudilan Yinyepu Mo oteiye ngoh.

⁵Aope Jesuwe nganne lei hüyange ükhong üyong I tangte peipu nge, Iye Philip te i, “Tüolan kahta khongkümpu uhlak jingne teman-e ümeken mepu hahying shaklak?”

⁶Philip te toklak jingne Iye tüopa ngao i; hangjingne Iye hanghe linglak yoi nying nyingke shing.

⁷Philip-e Ite jan, “Tüolan khongkümpuwe üjing jingha hahlak jingne nehoi, ngin gho ni phei nyeiye phapu an ne nehoi yewanglak yang.”

⁸Pinlan yome ja, Simon Peter ünao Andrew-e Ite hüke i:

⁹“Tüome naha ja ngoh nangki hüyange I yak me nükmei an ükhüo nga hüyange nyah ni ngoh nangki. Hüyangpoi teshinpu kahtalan jingne tüolan hangne menglak?”

¹⁰Jesuwe i, “Kahtalan shotne tamtüoh.” Tüome hüng maawe ngoh. Tüokhei kahta üshei shot; kahta haja nga nanjing ngohyangki.

¹¹Jesuwe an jon, Kahwang te minyong pha, hüyange shotte ngohpu kahtalante tam. Hüyange Iye nyah jingne-o hüke muh ling, hüyange iman üsheiye moh hah.

¹²Aope iman üshei hahmoh, Iye yoi pinlante i, “Ükhoih ünyai topu khongküm shaitüoh; teman-e yeshailak yang.”

¹³Tüokhei khongkümpu shaijem, hüyange an khüo nga mepu iman-e hahyange topu muhto penme ni maa ngoh.

¹⁴Tüome ngohpu kahtalanne, tüopa Jesuwe lingpu kahnyingwüngha füo ngeye i, “Ütingme kahtoknyu te peilak she iye ngohpu hipa-a hatüo!”

¹⁵I pho ne hüyange kange ahngne mengtamlak jingne iman peine ngohpu Jesuwe shing; tüokhei I nying nyingke nishe kahtang yete onge mah.

¹⁶Aope ün ngoi, I pinlan yengching te tai,

¹⁷Lisheng ja me ong, hüyange yengching kaiye Kapernaum yete tai. Wangnyak, hüyangpoi iman tangte Jesu yepei.

¹⁸Hüwante wangyang üyong lei hüyange yengching po.

¹⁹Aope pinlanne mile lüm yejema-a peli lisheng yeih phei me, iman-e yengching nahme Jesu kemme nge hüyange lisheng phei owe pei. Iman nyam.

²⁰Hüpoi Jesuwe imante i, “Tahnyam,” “Hatüowa Tao!”

²¹Iman-e I lisheng me inhuwe teih, hüyangpoi iman-e ngoi lak she teihpu kahtok nyoi mamshe ngoi.

²²Üne nyih yengching jaye kaome ngohpu ükhonge tüoye me lisheng ja shaha ngohpu nge. Jesu ye-ompe I pinlan shaha lisheng me taipu she iman-e shing.

²³Youngwanpawe minyong pha phei me iman-e ümeken me anhah tüopa nyoi me Tiberia mepu ülao lishenglan pei.

²⁴Aope Jesu yejema-a I pinlan lisheng me yenangpu ükhonge shing, iman lisheng te ong hüyange I yamme Kapernaumte tai.

²⁵Aope kahtalanne yengching janye me Jesu tüo iman-e Ite i, “Rabbi (Konnyüopa) tüome nang aope pei ei?”

²⁶Jesuwe imante jan: “Üting tingha me Taowe numante iphaning: numan-e Tao yampuwa kahnyingwüngha füo ngeyange yampu yeje, hüpoi numan-e an moh hah-wangyange yamnang.

²⁷Meng tailak hahying jingne toi tahling; hüyangpoi jintepu üyin jingne ngohlak hahying jingne toi lingtüoh. Tüopa hahying Kahta Ühawe numante yahphalak, hangjingne Ime Ipa Kahwange yoi füosang phayangki.”

²⁸Tüophei me iman-e Ite tong, “Kahwang toi linglak jingne toman-e hangke linglak shi?”

²⁹Jesuwe jan, “Kahwange numante lingne tamhupu toi hatüo: Iye shonpupate üting lakyah.”

³⁰Iman-e jan: “Toman-e ngeyange ütinglak lak jingne nange hanghe kahnyingwüngha füo tomante hüolak?” Nange hanghe toi linge hüolak?

³¹Toman puyimlanne wanwüng jengme manna hah, laingaowe hüke ipukih: “Iye imante hahlak jingne wangmepu an pha.”

³²Hüwante Jesuwe imante i, “Üting tingha me Taowe numante ipha ning.” “Aowe numante wang mepu hahying pha tüopa-a Mosa ne yeje; hüyangpoi Üpawe numante ütingpa hahying wang mepu phanang.

³³Hangjingne Kahwang hahyinga ao wangmepu yu hüyange kahtoknyu te üyin pha tüopa ngohnang.”

³⁴Iman-e Ite tong, “Üyongpa, tüopa hahying tomante nyihjeih yahkei.”

³⁵Jesuwe imante i, “Tao üyin hahying,” “Ao ü-tangte pei I aope-o sea yenyaolak; hüyange aowe üte ütinglak lakei aope-o yeng yelelak.”

³⁶Sha-a Taowe numante inang, numan-e Tao ngeyangki hüyangpoi üting yelak.

³⁷Üpawe üte phayangpu üshei ü-tangte peinang. Ü-tangte aoyin pei Taowe jange yeteilak;

³⁸hangjingne aowe Tao shon Iye mongpu linglak jingne Tao wangdang mepu yu, Taowe mongpu lingne yeje.

³⁹Tao shonpupawe üte lingne tamhupu hatüo: Iye phayangpu ja nehoi Taowe yemahlak, hüpoi üküm nyih me üshei yinne yene tamlak.

⁴⁰Hangjingne Üpawe mongpu hatüo: aoyinne Üha ngeyangki hüyange Iye ütinglak üsheiye jintepu üyin tüolak; hüyange üküm nyih me Taowe iman yange yene tamlak.

⁴¹Jehudilanne mongponge I jingne ngaone wang, hangjingne Iye i, “Tao wangmepu yupu üyin hahying.”

⁴²Tüokhei iman-e i: “Hatüowa Joseph üha Jesu yeje a? Inyu Ipa teman-e shingnang. Hümma-a, sha-a I wangmepu yupuweih she hangke ngaopu shi?”

⁴³Jesuwe imante jan, “Numan pa me mongponge tahngoh.

⁴⁴Tao shonpu Üpawe ü-tangte peine yetampute ao-o ü-tangte peipu ye-ok; hüyange üküm nyih me Taowe I yange yetamlak.

⁴⁵Hipalanne hüke nyan, ‘Kahwange kahta üshei te nyüotamlak.’ Kahta aoyinne Üpa ngao jai hüyange I mepu shing üshei ü-tangte peinang.

⁴⁶Tüokhei she ütamme Üpa ngeyangpune yeje; ao Kahwang mepu pei I ja shinge Üpa ngeyangki.

⁴⁷“Üting tingha me Taowe numante iphaning: aowe ütinglak nang I jintepu üyin ngohnang.

⁴⁸Taowa tüopa üyin hahying.

⁴⁹Numan puyimlan ne phaonyu jongme manna hah, hüpoi iman li.

⁵⁰Hüyangpoi hanghepa hahying wangmepu yu aowe hah, yelilak.

⁵¹Tao wangmepu peipu üyin hahying. Kahta ütamme tüopa hahying hahma-a I jintepu üyin ngohlak. Hüyange Taowe Ite phalak hahyinga ü-mei, Taowe hatüo kahtoknyu üyin jingne pha.”

⁵²Hüwante Jehudilan yo me yeonge shemme teingaone hüke wang: “Hatüo kahtawe temante I mei hahne hangke phalak?”

⁵³Tüokhei Jesuwe imante i. “Üting tingha me Taowe numante iphaning: Numan-e Kahta Üha mei yehahma-a hüyange I iy yingma-a numan nying nyingke numan me üyin yenang.

⁵⁴Aowe ü-mei hah hüyange ü-iy yinglakei jintepu üyin ngohnang, hüyange üküm nyih me Taowe I yange yene tamlak.

⁵⁵Hangjingne ü-meiya ütingpa hahying, ü-iy yinglakpa üting.

⁵⁶Aowe ümei hahnang hüyange ü-iy ying ü-phei ngohnang hüyange Tao I me ngohnang.

⁵⁷Üyin ngohpu Üpawe Tao shon, hüyange I kaiye Tao üyin ngoh nang. Hatüo kih-e, aowe Tao hah lakei Tao kaiye üyin ngohlak.

⁵⁸Hatüowa wangdang mepu peipu hahying ngohnang; numan puyimlanne hahyange lipu kihpu hahying yeje. Aowe hatüo hahying hahlakei jinte üyin ngohlak.”

⁵⁹Jesuwe hatüowa Kapernaum mepu synagogue me nyüowante i.

⁶⁰I pinlan maawe tüopa jai hüyange i, “Hatüo nyüopuwa jamloi wannangki. Aowe tüopate jailak shi?”

⁶¹I pinlan mongpongpu Jesuwe shing; tüokhei Iye imante i; “Hatüowa numan-e angtam hupu a?

⁶²Hümma-a numan-e Kahta Üha I üshongwante ngohpu nyoite onge ngema-a, hangke sheilak?

⁶³Üyin phapuwa Yaha ngohnang; meiye hangheme-o yejam. Taowe numante hanghe ngao ngaoyangki Yaha hüyange üyin ngao ngohnang.

⁶⁴Hüyangpoi numan ütamme üting yelak.” Hangjingne aowe üting yelak hüyange aowe I lowe tamlak, Jesuwe üwang memuh shing.

⁶⁵Hüyange Iye hüke muh i, “Tüokhei Üpawe Ite yehüo küma-a aowe-o ü-tangte peine ye-ok she Taowe numante iyangki.”

⁶⁶Tüophei me, I pinlan maawe lüppe ye hüyange shaaji I phei yekem.

⁶⁷Tüokhei Jesuwe pinlan penme ni te i, “Numan-o taihunang kü a?”

⁶⁸Simon Peterwe Ite jan: “Youngwanpa, ao tangte toman tailak? Nang me jintepu üyin ngao ngohnang.

⁶⁹Hüyange sha-a nang Kahwang mepu üjaopa she toman-e ütinglak nang.”

⁷⁰Jesuwe imante janne i, “Taowe numan penme ni lepu ne yeje a? Hüyangpoi numan yo me ja kahshih ngohnang!”

⁷¹Iye Simon Iskariot üha, Judas jeng ngaoyangki. Hangjingne Judas penme ni yo me ja ne I ngohyah poi, I lowe tamlak.