Read Konyak Naga JOHN 7 Bible Online

JOHN 7 - Konyak Naga bible

JOHN 7

¹Tüophei me, Jesu Galilee yekaote kem; I Judea me yekemhu, hangjingne I toihupu Jehudilan tüome ngoh.

³Tüokhei Inaolanne Ite i: “Tüopa nyoi tüohyange Judea te taitüoh, hüyange nang pinlanne nange lingpu toi ngelak.

⁴Hangjingne Iye lingpu shingne tamhuküma-a aowe-o lowe yeling. Nange tüolan toi lingpu ne mengma-a; kahtoknyu khongkümpu te tüolan nge ne tamtüoh!”

⁵Hangjingne Inaolanne nehoi Ite üting yelak.

⁶Jesuwe imante i, “Ü-hipak manngoi, hüyangpoi numan hipak jinte ngohnang.

⁷Kahtoknyuwe numante yekhahlak, hüyangpoi üte khahnang, hangjingne tüolan toi ünu üja she tüopa jingne Taowe saki pha.

⁸Numan mo te ongtüoh. Tao tüopa mo te min ong; hangjingne ü-hipak wangngoi-e manpei.”

⁹Imante Iye tüopa ngao i, hüyange Galilee me ngoh.

¹⁰Hüyangpoi Inaolan mo te ong te phei me Jesu-o ong. Tüoyangpoi ütahte ngaiye ye-ong, lowe ongyangki.

¹¹Mo me Jehudilanne I yam. Iman-e i, “I üpu?”

¹²Ükhong yo me I jingne yeonge mongpongpu ngoh, kahta ütam-e i, “I kahta ümei üja,” ütam-e i, “Yejeja, Iye kahtalan ünyong yete woinang ja she i.”

¹³Hüyangpoi I jeng ütahte ngaiye aowe-o yengao ok, hangjingne iman Jehudilan te nyam.

¹⁴Mo üwo nanjing hipak me Jesu khümjing te ong hüyange konnyüo ne wang.

¹⁵Jehudilan yeonge yashan hüyange i, “Iye nyüopu yenangpeta, tüo kahtawe teshinne hangke shingpu shi?”

¹⁶Tüokhei Jesuwe imante jan, “Taowe hanghe nyüo, üjing yeje, hüyangpoi tao aowe shon I mepu.

¹⁷Kahta ütam-e Iye mongpu linghuküma-a, hatüowa Kahwang mepu heiya, yejema-a taowe ü-nying nyingke ngaopu tüopa nyüopu jeng Iye shinglak.

¹⁸I aowe yoi wong okpu me ngao, Iye yoi müktishiwa yamnang; hüyangpoi aowe I shonpupa müktishiwa yamyapeih tüopa-a üting; Ime ütingpa yejepu hango yenang.

¹⁹Mosawe numante ngaokeng yepha a? Phayapoi numan aowe-o ngaokeng yejon. Numan-e Tao toine hangne yamnangki?”

²⁰Ükhonge janne i, “Nang me laa ngohnangki! Aowe nang toine yampu?”

²¹Jesuwe imante jan: “Taowe kahnyingwüngha ja ling hüyange numan üshei yashan.

²²Mosawe numante shokhüplak pha, tüoyangpoi Mosawe yeje numan puyimlanne ükong wang, hüyange numan-e Sabbath me shokhüp.

²³Naha ja Sabbath me shokhüppu kaiye Mosa Ngaokeng yemengpune mengma-a, Taowe Sabbath me kahta ja lanshe meiye tampu jingne numan-e üte hangne mongmengpu?

²⁴Ütah me leiyange numan-e ngao tahphün, hüyangpoi ütingpa me ngao phüntüoh.”

²⁵Tüokhei Jerusalem mepu kahta ütam-e hüke i: “Iman-e toine yampu kahta tüo yejepu a?

²⁶Hüyange leihu, hatüome Iye yelope ngao nangki, hüyange iman-e Ite hango ye-i: woipa lanne ütingme Iya Messiah she shingyapushi?

²⁷Hüyange aope Messiah peilakeih, I ü-mepu aowe-o yeshinglak; hüyangpoi tüopa kahta ümeken mepu pei teman üsheiye shingnang.”

²⁸Tüokhei Jesuwe khümjing me nyüowante Iye üngwünne i; “Tao ümeken mepu pei, numan-e ütingme shingya? Tüoyangpoi Tao ü-nying nyingke peipu ne yeje. Aowe Tao shon, I ütingpa hüpoi numan-e I yeshing,

²⁹hüpoi Taowe I shingnang; hangjingne Tao I mepu pei hüyange Iye Tao shon.”

³⁰Tüophei me iman-e I phone ngang; hüyangpoi aowe-o Ite yak yeyu ok, hangjingne I hipak manngoipe ngoh.

³¹Hüyangpoi ükhong yomepu maawe Ite ütinglak, hüyange i, “Aope Messiah peilakeih, tüopa kahtawe lingpu shinne kahnyingwüngha füo lingyalak?”

³²I jeng iye ükhong mongpongpu Phariseelanne jai, tüokhei iman hüyange ngengpa üjenglanne khümjing yompalan ütam Jesu pho ne shonne tei.

³³Jesuwe i: “Tao numan phei hipak tenha ja laowe ngohlak, tüophei me aowe Tao shon I tangte Tao tailak.

³⁴Numan-e Tao yamlak, hüyangpoi numan-e Tao ye-ngelak, hangjingne Tao ümeken me ngohlakei numan yepei oklak.”

³⁵Jehudilanne iman yo me hüke teingaowe i: “Teman-e ye-nge oklakne I ümeken me tailak ipu shi? I Greek chingnyulan me taiye Greeklan ngohjing me nyüo ne ipu a?

³⁶Numan-e yamlak hüyangpoi Tao ye-ngelak, hüyange Tao ümeken me ngohlakei, tüokente numan yepei oklak she Iye ipuwa hanghe te leppu?”

³⁷Mo üküm nyih, nyih üyong me Jesu yongyange hüke i: “Aowe yengle nang I ü-tangte peiye yingtam tüoh.

³⁸Ngaolaiye ipuke, ‘Aowe üte ütinglak lakei üyin yengyin yenglok I mongjang mepu yinlak.’ ”

³⁹Iye hatüowa Yaha jeng ngaoyangki, aoyinne Ite ütinglak iman-e tüolak, hangjingne hüwante yaha üne-o manpha, hangjingne Jesu üne-o müktishiwa ne mantam.

⁴⁰Aope ükhong yo mepu kahta lanne tüopa ngao jai, ütam-e iyangki, “Hatüo kahta ütingme Hipa yang!”

⁴¹Ülao lanne i, “Iya Messiah yang!” Hüyangpoi ülaolanne i, “Messiah Galilee mepu peilak ne yeje!

⁴²Ngaolai me Messiah David nokli mepu, hüyange David ngohpu Bethlehem mepu peilak she ye-i a?”

⁴³Tüokhei I jingne ükhong yo me tampu ngai;

⁴⁴Ütam jawe I pho huwe teih, hüyangpoi aowe-o Ite yak yeyu ok.

⁴⁵Ngengpa üjenglan hüyange Phariseelan tangte khümjing yompalan leihye, aoyinne imante tong, “Hangne numan phei jamme I phowe yepei ei?”

⁴⁶Yompalan ne jan, “Tüopa kahtawe ngaopu kih aowe-o manngao ja!”

⁴⁷Phariseelanne imante tong, “Numan-o ünyong yete woitampu a?”

⁴⁸“Woipalan yejema-a Phariseelan ütam Ite ütinglakpu ngaipu numan-e shingya shi?

⁴⁹Hüyangpoi tüolan ükhonge Mosa Ngaokeng yeshing, tüokhei Kahwang mepu phoipu ngohnang!”

⁵⁰Nicodemus, iman yo me ja ao üshongpe Jesu I tangte pei, imante hüke i:

⁵¹“Kahta ja, I mepu manjai hüyange Iye hanghe ling man yampute teman Ngaokeng me ngao phünpu ngohlak a?”

⁵²Iman-e jan, “Nango Galilee mepu a? Ngaolai me yamtehu hüyange Galilee mepu hipa aope-o yengai she nange shinglak.”

⁵³Tüophei me iman yoi yoi nok te ye.