Read Konyak Naga JOHN 8 Bible Online

JOHN 8 - Konyak Naga bible

JOHN 8

²Napning shomme I khümjing te leihye. Kahta üngang I neikonne jem, hüyange I shot hüyange imante nyüone wang.

³Ngaokeng nyüopalan hüyange Phariseelanne phwngngampu linge ngohwante phopu sheko ja woipei, hüyange iman üshei sheshao me yongne tam.

⁴Iman-e Jesute i, “Konnyüopa,” “Hatüo sheko phwngngampu toi linge ngohwante pho.

⁵Mosa phapu ngaokeng me hükihpu sheko-a longe shüppe toilak she ngohnang. Sha-a nange hangke ilakshi?”

⁶Iye püokülak hüyange pholak she teihyange iman-e Ite tokke hatüo ngao iyangki. Hüyangpoi Jesu khuhta hüyange I yaklanne kahtok te nyan.

⁷Iman-e yelakpe Ite ngao tonge yonge ngoh, Iye nganne lei hüyange imante i, “Numan yo me aome ünu yenang Iye tüopa shekote üwangne long shüppe wangtüoh.”

⁸Nishe I khuhta hüyange kahtok te nyan.

⁹Aope iman-e tüopa ngao jai, jeiyongpa me wange ja phei me ja she taiye küm. Shekonyu yha yongjing me, hüyange Jesu shaha tüoh.

¹⁰I nganne lei hüyange yha te i, “Iman-a üpu, sheko? Sheja nehoi nangte yeyao yeli a?”

¹¹Yha jan, “Üyongpa, ja nehoi yenang,” Jesuwe i, “Hüma-a Taowe-o nang min yao minle. Taitüoh, shaaji ünu tahling.”

¹²Jesuwe üne-o imante i: “Tao kahtoknyu wangngai. Ao ü-pheite woilakei wangnyak me aope-o yekemlak, hüyangpoi üyin wangngai tüolak.”

¹³Phariseelanne Ite i, “Nange nang jingne saki phanangki; nang saki üting yeje.”

¹⁴Jesuwe imante i, “Üjingne Taowe saki phayapoi, ü saki üting, hangjingne Tao ümeken mepu pei hüyange Tao ümeken te tailak Taowe shingnang; hüyangpoi Tao ümeken mepu pei yejema-a ümekente tailak numan-e yeshing.

¹⁵Numan-e meiye mongpu kih ngao phünnang, Taowe ao ngao-o yephün.

¹⁶Hüyangpoi Taowe ngaophün küma-a ütingme phünlak, hangjingne tüome ü-shaha yeje; Tao shonpupa Üpa ü-phei ngohnang.

¹⁷Numan ngaokeng me hatüo nyanne ngohnang, aope kahta niye saki phalakei, iman-e hanghe I tüopa-a üting.

¹⁸Taowe üjingne saki phanang, hüyange Üpa aowe Tao shon Iye üjingne saki phanang.”

¹⁹Iman-e Ite tong, hüma-a “Nangpa ümeken me ngohnangki?” Jesuwe janne i, “Numan-e Üpa jeyah Tao jeyah yeshing;” “Numan-e Tao shingma-a, numan-e Üpa-o shinglak.”

²⁰Jesuwe tüoyin ngao, ngin angjing khümjing me ngao. Hüyange aowe-o I yepho, hangjingne I hipak manngoipe ngoh.

²¹Jesuwe üne-o imante nishe i, “Tao taimahlak; numan-e Tao yamlak, hüyangpoi numan ünu me numan lilak. Tao ümekente tai numan taine ye-ok.”

²²Jehudilanne i, “Iye hüke inang, tao ümekente tai numan taine ye-ok, tüote leppuwa, Iye yoi nying nyingke toilak ipu a?”

²³Jesuwe janne i: “Numan-a üphangpa mepu, Taowa ütokpa mepu. Numan tüopa kahtok jing; Tao tüopa kahtok jingne yeje.

²⁴Tüokhei taowe numante iyangki, numan ünu me numan lilak. Hüyange ‘Taowa I’ she üting manlak manlak numan ünu me numan lilak.”

²⁵Iman-e Ite tong, “Nanga aoshi?” Jesuwe janne i; “Hanghepa taowe numante üwangne muh iyangki,

²⁶Taowe numante ilak maawe ngohnangki hüyange numan jingne ngao phünlak ngohnang. Aowe Tao shon I üting, hüyange Imepu Taowe hanghe jai kahtoknyu te inang.”

²⁷Iye Ipa jeng imante inangshe iman-e yeshing.

²⁸Tüokhei Jesuwe imante i, “Aope numan-e Kahta Üha nowe inpu ngelakei ‘Tao ao shi’ numan-e shinglak, tüophei me nakshih Taowa ü-mepu yeje, hüyangpoi Üpawe üte hanghe nyüowe tam, tüopa toi ling she numan-e shinglak.

²⁹Hüyange aowe Tao shon, I ü-phei ngohnang; Iye ü-shaha yetüoh, hangjingne Taowe jinte Iye mongpu ling.”

³⁰Iye hüke ngaopu jaipu üshei Ite ütinglak.

³¹Tüokhei Jesuwe Ite, ütinglakpu Jehudilan te i, “Taowe nyüopu numan-e jaima-a ütingme numan-a ü-pinlan;

³²numan-e ütingpa-a shinglak, hüyange ütingpawe numan lantamlak.”

³³Iman-e Ite jan, “Toman Abraham nokli, hüyange toman aope-o ao rhane-o yemeng; hümma-a, ‘Numan lantamlak,’ she nange hanghete leppu?”

³⁴Jesuwe imante i, “Üting tingha me Taowe numante iphaning: aowe ünu ling I ünu rhapa.

³⁵Rhapa aope-o jinte nokme yengoh; hüyangpoi, Ha jinte ngohnang.

³⁶Hüma-a ühawe numan lantamküma-a numan ütingme lanteki.

³⁷Taowe shingnang numan Abraham noklilan. Hüyangpoi numan-e Tao toine yamnang, hangjingne numan me ü-ngao yenang.

³⁸Taowe Üpa mepu hanghe nge tüopa ngao nang; hüyange numan-e numan Üpa mepu hanghe jai tüo lingnang.”

³⁹Iman-e Ite jan, “Toman üpa-a Abraham.” Jesuwe imante i, “Numan ütingpa Abraham hayim ne jeshihma-a, Iye lingpu toikih numane-o linghah shepu;

⁴⁰Hüyangpoi Taowe lingpu lili Kahwang mepu hanghepa üting jai numan te ilak jingne! Hüyangpoi numan-e Tao toine ngangnang. Abraham-e hükih hango yeling!

⁴¹Numan üpawe hanghe ling numan-e hatüo lingnang.” Iman-e jan, “Toman chingyang halan yeje.” “Toman-e Üpa ja ngohnang, Kahwang I.”

⁴²Jesuwe imante i: “Kahwang ütingme numan Üpa ne mengshihma-a, numan-e üte kenhah shepu; hangjingne Tao Kahwang mepu pei hüyange tüome ngohnang. Tao ü-nying nyingke peipu ne yeje, hüyangpoi Iye Tao shon.

⁴³Taowe hanghe i numan-e hangne yeshingpu shi? Hatüowa hangne ima-a, numan-e ü-ngao jaine ye-ngangpu jingne!

⁴⁴Numan-a numan üpa kahshih hayim, hüyange numan üpawe mongpu pheite numan woihunang. Üwang memuh I lüntoi lingpupa, hüyange ütingpa phei linglak hango yenang, hangjingne I me üting yenang. Aope Iye tahleih ilakei, I wanglamme hangke mong hüke ngaonang, hangjingne I tahleih ipa hüyange leihpa üpa.

⁴⁵Hüyangpoi Taowe ütingpa ngao, hüyange tüojingne numan-e üte üting yelak.

⁴⁶Numan yo me aowe tao ünu kahta she iye oklak? Taowe numante üting ipu ne mengma-a, hümma-a hangne üte üting yelakpushi?

⁴⁷Ao Kahwang mepu pei Iye Kahwang ngao jai hunang, numan-e yejai hupute leppuwa numan Kahwang mepu yeje.”

⁴⁸Jehudilanne Jesute jan, “Toman-e nanga Samaria mepu ja hüyange nangme laa ngohnang she ilak yeshu a?”

⁴⁹Jesuwe jan, “Üme laa yenang. Taowe Üpate iyeshenang, hüyangpoi numan-e üte ye-i-yeshe.

⁵⁰Taowe üjingne müktishiwapu yeyam, ja ngohnang Iye müktishiwapu yamnang hüyange ngao phün nang.

⁵¹Üting tingha numante iphaning: kahta ütam-e ü-ngao tükke angma-a, Iye aope-o lipu ye-ngelak.”

⁵²Jehudilanne Ite i: “Sha-a toman-e shingnang nangme laa ngohnang. Abraham li, hüyange hipalan li, hüyangpoi nange i, kahta ütamme ü-ngao ngohma-a, Iye aope-o lipu ye-ngelak.

⁵³Toman üpa Abraham li; Abraham phei sheyongpu she nange ine ye-ok, jeya? Hüyange hipalan-o li. Nanga ao she nange teihnangki?”

⁵⁴Jesuwe jan, “Taowe Ü-nying nyingke müktishiwama-a, ü-müktishiwapu hangne-o yemeng. Aowe Tao müktishiwa ne tam hatüowa Üpa, ao te numan-e Üpa üja she inang.

⁵⁵Hüyang-poi numan-e I yeshing, hüpoi Taowe I shingnang; hüyange Taowe I yeshing she ima-a, taowe numan kih-e tahleih inang. Hüyangpoi Taowe I shingnang hüyange I ngao angnang.

⁵⁶Numan üpa, Abraham-e, ü-hipak ngelak jingne hoongli-e teih; tüopa Iye nge hüyange mongmei.”

⁵⁷Jehudilanne Ite i, “Nang wangpeng denga nehoi manngoi, hüyange nange Abraham ngetekü a?”

⁵⁸Jesuwe imante i, “Üting tingha me Taowe numante ipha ning, Abraham manpuhpe muh Tao ngohyangki.”

⁵⁹Tüokhei iman-e Ite shüplak jingne long toon; hüyangpoi Jesu I nying nyingke lo, hüyange khümjing mepu tai.