Read Konyak Naga JOHN 9 Bible Online

JOHN 9 - Konyak Naga bible

JOHN 9

¹Aope Jesu kemme ngoh, puhwante muh mük müoteiye puhpu kahta ja Iye nge.

²I pinlanne Ite tong, “Rabbi, (konnyüopa) ao ünu kaiye I mükmüo teiye puh ne tampu shi? I heiya Inyu Ipa ünu shi?”

³Jesuwe jan, “Hatüowa I yejema-a Inyu Ipa ünuwe yeje. Hüpoi Kahwang toi ütahte ngailak jingne I mükmüo teiye puh.

⁴Wangngai wante Tao aowe shon I toi teman-e linglak yang. Aowe-o toi yeling oklak, wangnyak peiküki,

⁵Tao kahtoknyu me ngohpu mongme Tao kahtoknyu wangngai.”

⁶Iye tüo ngaoyang phei me, Jesuwe kahtok te iyphao phao hüyange shamne menge ling, Iye sham yahpuwe kahta mükte shit.

⁷Hüyange Ite i, “Taitüoh Siloam yeng me nang sheta layah.” (leppu taine tampu) Tüophei me I taiye sheta la, hüyange ngepu okke ye.

⁸Yupilan hüyange üshongwante Iye hahyuwe ngeyang palan-e i, “Shotyange hahyuwe ngohpu kahta hatüo yejepu a?”

⁹Ütamme i, “Hatüo I üja,” hüpoi ülaolanne i, “Yejeja, hüyangpoi I tüokih-e ngenangki.” Tüokhei tüopa kahtawe Iye ngaiye i, “Taowa I.”

¹⁰Iman-e Ite tong, “Hümma-a nang mük hangke eppushi?”

¹¹Iye jan, “Jesu she minpu kahta jawe sham ütam nyüt, ü mükte pho, hüyange üte i, Siloam te taitüoh hüyange nang sheta layah: tüokhei tao tai, hüyange taowe poiyangpu phei jamshe ngepu ok.”

¹²Iman-e tong, “I ümeken me ngohnangki?” Iye jan, “Taowe yeshing.”

¹³Tüophei me iman-e mükmüopa ne ngohyangpu pa Phariseelan tangte woipei.

¹⁴Jesuwe sham linge mük eppe tampu nyih-a Sabbath ne ngoh.

¹⁵Phariseelanne-o nishe I mük hangke mei ei she tong. Iye imante i, “Iye ü-mükte sham phowe tam hüyange taowe sheta la, tüophei me taowe nge.”

¹⁶Phariseelan ütamme i, “Hatüo kahta Kahwang mepu yeje, hangjingne Iye Sabbath yejon.” Ülaolanne i, “Ünu kahta jawe hükihpu kahnyingwüngha füo hangke ling ok lak?” Hüyange iman yo me tampu ngai.

¹⁷Tüokhei Phariseelanne kahta te üne-o tong, “Iye nang mük epyangki she nange inang, hümma-a, nange I ao she ilak?” Iye jan, “I hipa ja.”

¹⁸Tüopa kahta ünyu üpa lante mannyik mannyik, I mük müopane ngoh hüyange sha-a ngenang she, tüopa pungao te Jehudilanne üting yelak hu.

¹⁹Hüyange nyupa ni te tong, “Hatüo nangni ha a? I mük müoteiye puh she nang niye ipu a? Hümma-a Iye sha-a hangke nge?”

²⁰Nyupalan-e janne i, “Hatüowa toman ha, hüyange Iya mükmüo teiye puhpu she toman-e shingnang.

²¹Hüyangpoi sha-a Iye hangke iye nge, yejema-a I mük hangke ep toman-e yeshing. Ite tongtüoh, shaaji I lwngmei; I jingne Iye ngaokülak!”

²²Jehudilante iman nyam, tüokhei Inyu Ipalan-e hatüo ngao yangki; hangjingne kahta ütamme Jesuwa Messiah she yah ngohma-a I synagogue mepu teitamlak she Jehudilanne tümyange ngoh.

²³Tüokhei Inyu Ipa lanne “Shaaji I lwngmei, Ite tongyah she i!”

²⁴Tüokhei iman-e ao mükmüoyange ngoh Ite nishe nyik, hüyange Ite i, “Kahwangte yihlupu phatüoh; hatüo kahta-a ünu kahta she toman-e shingnang.”

²⁵Iye janne i, “I ünu kahta ja, heiya yejepu, taowe yeshing; taowe ja hei shingnang, tao mükmüopa ne ngoh, sha-a taowe ngenang.”

²⁶Iman-e Ite i, “Iye nangte hang ling ei? Iye nang mük hangke ep ei?”

²⁷Iye imante janne i, “Taowe numante iyangki, hüyangpoi numan-e yejai. Hangne üne-o jaihupu shi? Numan-o I pin ne menghu pu a?”

²⁸Hüwante iman-e Ite phoiye i, “Nanga I pin, hüyangpoi toman-a Mosa pinlan.

²⁹Mosa phei Kahwange ngao she toman-e shingnang, hüyangpoi tüopa kahta jingne I ü-mepu pei toman-e yeshing.”

³⁰Kahtawe jan: “Hatüowa yashanlakpa yang, I ü-mepu pei numan-e yeshing, hüyangpoi Iye ü-mük ep!

³¹Ünupa ja te Kahwange yejai she toman-e shingnang, hüyangpoi ütamme Kahwang te khüm hüyange Iye mongpu lingma-a, Kahwange Ite jainang.

³²Kahtamyenghan memuh ja me nehoi mükmüo teiye puhpu kahta eppe tampu yejai.

³³Hatüo kahta Kahwang mepu ne yeje shima-a Iye hango yeling oklak,”

³⁴Iman-e Ite janne i, “Nang ünu ümongpa me puh; hüyange nange tomante nyüolak a?” Hüyange iman-e I synagogue mepu jange tei.

³⁵Iman-e I jange tei she Jesuwe jai, hüyange aope Iye I tüo, Iye i, “Nange Kahta Üha te ütinglak nangkü a?”

³⁶Tüopa kahtawe jan, “I aoshi üte ipha, üyongpa, taowe Ite ütinglak ning!”

³⁷Jesuwe Ite i, “Nange I ngeteki, hüyange nang phei aowe ngaoyapeih tüowa I.”

³⁸Iye jan, “Youngwanpa taowe üting laknangki.” Hüyange Jesu shaome yatuhshing khüm.

³⁹Jesuwe i, “Ngaophünlak jingne hatüo kahtoknyu te Tao peiyangki, aoyinne ye-nge ok iman-e ngelak, hüyange aoyinne ngenang iman mükmüopa ne mengtamlak.”

⁴⁰Iphei jamme ngohpu Phariseelanne tüopa jai hüyange i, “Toman-o mükmüopalan a?”

⁴¹Jesuwe imante i, “Numan mükmüopa ne mengshihküma-a, numan ünu yengoh hahshepu, hüyangpoi sha-a numan-e inang, toman-e ngenang: tüokhei numan ünu ngohnang.