Read Konyak Naga LAMPULAN 1 Bible Online

LAMPULAN 1 - Konyak Naga bible

LAMPULAN 1

¹Üwangpa laitep me, O Theophilus, Jesuwe lingne hüyange nyüone ipu üshei taowe nyan;

²I wangte inpu nyih manngoi manngoi, Iye leye ngaipu lampulante Yaha Üjao kaiye ngaokeng pha.

³I shang pong phei me iman tangte nyih deli ngoiye üyin me ngaiye, Iye Kahwang Ahngching jeng ngaowe, saki maawe phawe yoi nying nyingke imante ngai-e hüo.

⁴Hüyange iman phei jamme jemme ngohwante, Iye imante ngaokeng phawe i, “Jerusalem mepu tahtai, hüyangpoi Üpawe janpu (hünghao) hanghe numan-e ü-mepu jai, hatüo jingne tanne ngohkei.

⁵Hangjingne Johnne yengme baptitam, hüyangpoi nyih meiyange yengohpe numan Yaha Üjao me baptilak.”

⁶Aope lampulan Jesu phei jamme jem iman-e Ite tong, “Youngwanpa, nange Israelte ahngchinga sha-a pu hipak me nishe phatamlak jeya?”

⁷Iye imante i, “Hanghepa juwan Üpawe yoi üngan me angnang, tüoyin numan-e shinglak wongpongne yeje.

⁸Hüyangpoi aope Yaha Üjao numan tangte peilakeih numan-e üngan yahlak; hüyange Jerusalem me, hüyange Judea hei Samaria üshei me, hüyange kahtoknyu üküm ngoiye numan ü-saki ne menglak.”

⁹Iye tüolan ngaoyang phei me, iman-e leiye ngohwante, I woi in, hüyange iman mük mepu I wangphomme büange yah.

¹⁰Aope iman-e yelakpe I ongpute wangyete nganne lei ngoh, leihu, inkhek-üheng inyange kahta ni iman shongme yong;

¹¹hüyange iman-e i, “Galilee kahtalan, numan-e hangne wangyete nganne yongpu shi? Hatüo Jesu, ao numan mepu wangdang te woi in, numan-e hangke I wangte onge nge, hatüo kih muh I yukülak.”

¹²Tüophei me Olive she nyikpu kahtang mepu iman Jerusalem te ye; hatüo kahtang Jerusalem phei owe, Sabbath me kemjangpu lam ne hei ngoh.

¹³Aope iman Jerusalem ngoi, iman ngohjing ütangpa tüp te iman Peter, John, Jeams hüyange Andrew, Philip hüyange Thomas, Bartholomeo hüyange Mattheu, Alphaeus üha Jeams, Zealot Simon, hüyange Jeams üha Judas ong.

¹⁴Iman üshei shekolan phei, hüyange Jesu ünyu Mary, hüyange Inaolan phei, mongja ne sheiyange yoppu me yeonge wongnange yelakpe ngoh.

¹⁵Tüopa nyih hei hipak me jeiheinaolan yo me Peter yong (jemme ngohpu ükhong ghoja phei me da jaju ngohyangki), hüyange i,

¹⁶“Jeiheinaolan, aowe Jesu phopalan te lam hüo, hatüo Judas jeng hanghe Yaha Üjaowe üshong memuh David juwe ngao, hatüo ngaolai ütahte ngailak wongpong ne ngoh yangki.

¹⁷Hangjingne I teman yo me ja ne i, hüyange hatüo shaoshanpu me Iye yoi meitam yah.”

¹⁸(Sha-a hatüo kahtawe yoi ünu toi ümeeye kahtok ja shak; hüyange shangme shonge yeita, seanyu shüohngai, hüyange üyei ümong üshei shüoh ngai.

¹⁹Jerusalem me ngohpulan üsheiye hatüo shinge pei, tüokhei hatüo kahtokte iman ngao me Akeldama she nyik, leppu “Iy Kahtok”.)

²⁰Hangjingne Tüowelaihem laitep me hatüo nyanne ngohnang. “I ngohjing nuwe wintüoh, hüyange hatüo me ao-o ngohne tahtam; hüyange I toishao mihte yahne tamtüoh.”

²¹“Tüokhei teman yomepu kahta ja ao Youngwanpa Jesu teman mepu tai hüyange ye-e ngohpu üshei me teman phei omme ngoh,

²²Johnne baptipu mepu I teman mepu mantaipu nyih ngoiye tüolan kahta yo mepu ja teman phei I yange yepu saki phapa ne menglak yang.”

²³Hüyange iman-e Barsabbas she nyikpu Joseph (Ite Justus she-o nyiknang) hüyange Matthias ni leye ngai.

²⁴Hüyange iman-e yoppe i, “Youngwanpa, aowe kahta lili mongjang shing, hatüo ni yo mepu nange ao le tomante hüopha;

²⁵hatüo shaoshanpu toime meitam yahlak jingne hüyange Judaswe Ite nyingyangpu toite leih yelak jingne tüohyangpu lampu toishao.”

²⁶Tüophei me iman-e imni jingne phongyeng, hüyange phongyengpu Matthias te hüt, hüyange I lampulan penme ja phei om.