Read Konyak Naga LAMPULAN 10 Bible Online

LAMPULAN 10 - Konyak Naga bible

LAMPULAN 10

¹Sha-a Kaisarea me kahta ja, Kornelias she minpu, Italylan Nyahpong she nyikpu mepu gho ja tangme nokpu ja ngoh.

²I wanglamte lahnyikpu kahta ja ne ngoh, hüyange I hei Inok üsheiye Kahwang te nyamheile. Iye kahtalan te jajangjawe maawe pha, hüyange Kahwang te jin jinte yop.

³Iye nyih ja lümpaji nanjing me himang ja yeonge kentinge nge; hüyange Kahwang shongmokpa ja I tangte pei, hüyange Ite i, “Kornelias.”

⁴Hüyange Iye Ite tingkhakke leiye nyamme i; “Youngwanpa, hanghe shi?” Hüyange Iye Ite i, “Nange yoppu hüyange nange jajang jawe phapu Kahwang shongme teihtüolak jingne ongteki.

⁵Hüyange sha-a Joppate kahta shontüoh, hüyange Simon, ao te Peter she nyik, I woi intüoh.

⁶Yengching nahme ngohpu meisho lingpa Simon she minpu nokme I ngoiye ngohnang.”

⁷Hüyange aope Ite ngaopu wangdang shongmokpa yanne tai, Iye yoi shaoshanpa ni hüyange kengphetlan yo me jinte I shaoshan ne ngohpu hüyange wanglamte lahnyikpu ja nyik,

⁸hüyange Iye imante tüolan ngao khongkümpu iyang phei me, iman Joppa te shon.

⁹Üne nyih, iman lamme kemme hüyange Joppa ngoine owante heeitam hahju me Peterwe yoplak jingne noktok te ong.

¹⁰Hüyange I seanyao, hüyange hahhu; hüyange iman-e nükyange tümwante I mükngoih shonge ta.

¹¹Hüyange Iye wangdang epyange nge, hüyange yeonge yongpu khaoja kihpu nye ünuk peli me jonyange kahtoknyu te yeipu nge.

¹²Hatüome üya peli nyimpu yinmok, kahtoknyu me shomme kempu toshitolao, hüyange wang awhalan khongkümpu ngoh.

¹³Hüyange ngaowüng ja peiye Ite i, “Lüotüoh, Peter; toitüoh hüyange hahtüoh.”

¹⁴Hüyangpoi Peterwe i, “Youngwanpa, hüke yeje, hangjingne nuwe winpu hüyange yejaopu toi taowe aope-o je-manhah.”

¹⁵Hüyange nishe ngaowünge Ite i, “Hanghe Kahwange jaowe tamyangki tüote nange ünu she tahnyik.”

¹⁶Hüyange hatüo lümme ngoiye ngai, hüyange hüwante muh tüopa khao wangdang te woi in.

¹⁷Sha-a Peterwe hatüo himang ngepu tüowa hanghete leppu she I nying nyingke yeonge nüngneiye ngohwante, leihuyah, Kornelias shonpu kahtalan, Simon nok tonge, tafün shongme yong;

¹⁸Hüyange Simon, ao te Peter she nyik, I tüome ngoiye ngohya she nyik-e yüowe tong.

¹⁹Hüyange Peterwe himang teih-e ngohwante, Yahawe Ite i: “Hüowü! Kahta lümme nang yamnang.

²⁰Nang lüowe yutüoh, hüyange hanghete-o yenüngneipe iman phei taitüoh, hangjingne taowe iman shonyangki.”

²¹Hüyange Peterwe kahtalan tangte yuwe i, “Leihu, numan-e ao yam hatüowa tao. Numan hangne pei ei?”

²²Hüyange iman-e i, “Gho ja tangme nokpu Kornelias Üjaopa hüyange Kahwang nyamlepu kahta ja, hüyange Jehudi jat üsheiye minyonge ngaohümpu, I nokte nang nyiklak hüyange nang mepu ngao jailak, Üjaopa wangdang shongmokpa jawe Ite shinge tam.”

²³Tüokhei Peterwe iman nyik-e inne yinne ngoine tam. Üne nyih I yayonge iman phei tai, hüyange Joppa mepu jeiheinaolan ütam I phei tai.

²⁴Hüyange tüophei nyih iman Kaisarea ngoipei; hüyange Kornelias Inok hüyange I nok pheipulan jamme jemme, tanne ngoh.

²⁵Hüyange hatüo ngai, aope Peter noksate ong, Kornelias I phei hüowe I yashong me lamme ta hüyange Ite khüm.

²⁶Hüyangpoi Peterwe I loiye i, “Lüotüoh, taowa kahta ja hei.”

²⁷Hüyange Iye I phei teingaowe ong, hüyange maawe jemme nge.

²⁸Hüyange Iye imante i, “Jehudi kahta jawe eiha jat kahta phei jamlak yejema-a nokte teingoilak yeshu she, numan-e numan nying nyingke shingnang. Tüoyangpoi kahta ao to nuwe winpu hüyange yejaopu she nyiklak yeshu she, üte Kahwange hüoyangki.

²⁹Tüokhei aope üte nyik-e pei, tao mong ye-ape peinang; tüokhei hanghe teihyange numan-e üte nyikne shon, taowe shinghu nangki.”

³⁰Hüyange Kornelias i, “Nyih peli linteki, tao ü-nok me lümpa ji nanjing me yoppu hipak yah ngoh, hüyange leihu, ü-sheshao me kahta ja phihlangpu nye inyange yong;

³¹hüyange Iye i, ‘Kornelias, nange yoppu jai ngohnang, hüyange nange jajang jawe phapu Kahwang shaome teih-e ngohnang.

³²Tüokhei Joppate shonne Simon, ao te Peter she nyik, I nang tangte nyiktüoh. I yengching nahme meisho lingpa Simon nokme ngoi ngohnang.’

³³Tüokhei hüwante muh taowe nang nyikne shon; hüyange nang pei ngoipu yeong meiteki. Tüokhei sha-a Youngwanpawe nangte lingne tamhupu khongküm jailak toman üshei Kahwang shongme jemme ngohnang.”

³⁴Hüyange Peterwe jukawe i, “Kahwange kahta sheta yelei she taowe ütingme nge ok nangki.

³⁵Hüyangpoi hanghe jat hei li mepu ne jeyapoi aowe Ite wangshüm hüonang hüyange khakshupu ling, Kahwange I yahlak jingne okke ngohnang.

³⁶Jesu Khristawe pungao ümei toloimei jeng konnyüowe Israel hayimlan tangte Iye hanghepa ngao shon, I üshei tangte Youngwanpa hatüo ngao numan-e shingnang.

³⁷Johnne konnyüowe baptiyang phei me, Galilee mepu wange Judea üshei me hanghe pongne tam,

³⁸hüyange hangke Kahwange Yaha Üjao hüyange üngan wong kaiye Nazarethlan Jesu leye ngai, hüyange Kahwange I phei omme ngohpu jingne Iye toimei linge, hüyange kahshih tükpu khongküm meitamme kem, hatüo numan-e shingnang.

³⁹Jerusalem hüyange Jehudilan kahtok me Iye lingpu üshei jingne toman saki ngohnang. Iman-e pee me I takke toi;

⁴⁰hüyangpoi Kahwange I nyih lüm shepupa me yange yene tam, hüyange ütahte ngaiye hüo;

⁴¹kahta üshei te yeje, hüyangpoi Kahwange toman aoyin saki ne le, hüyange I yange yephei me aoyinne I phei hahying yangki, tomante I ütahte ngai hüo.

⁴²Hüyange üyin me ngohpalan hüyange lipulan ngao phünpa ao Kahwange le-ngai, hatüowa I she kahtalan te konnyüolak hüyange saki phalak tomante ngaokeng pha.

⁴³Ite mengpalan liliye I min kaiye ünu winpu tüolak she, hipalan üsheiye I jingne saki phanang.”

⁴⁴Peterwe yelakpe tüolan ngao ngaowante, jaipalan üshei tangme Üjao Yaha pei.

⁴⁵Hüyange Peter phei hangshin Jehudi mengpalan pei, iman-e yashan, hangjingne yinhulan tangme-o Yaha Üjao hünghao shoktam.

⁴⁶Hangjingne iman-e ülao ngaome ngaopu hüyange Kahwang yonge tampu jai. Hüwante Peterwe ngaowe i;

⁴⁷“Tüolanne toman-e hangke tüo hüke Yaha Üjao tüoteki. Hümma-a, iman yengme baptilak mepu ütamme büangpu oklak a?”

⁴⁸Hüyange Iye iman Jesu Khrista min me baptilak jingne ngaopha. Hüwante iman-e Ite nyih üjingha ngohlak jingne tong.